ఆంధ్రప్రదేశ్ రాష్ట్ర అభివృద్ధిలో తీరప్రాంతం కీలక పాత్ర పోషించగలదనే దృక్పథంతో, మాజీ ముఖ్యమంత్రి వైయస్ జగన్ మోహన్ రెడ్డి (Y.S. Jagan Mohan Reddy) నాయకత్వంలో “బ్లూ ఎకానమీ” (Blue Economy) దిశగా పలు కీలక అడుగులు వేయబడ్డాయి. రాష్ట్రానికి ఉన్న 974 కిలోమీటర్ల సుదీర్ఘ సముద్ర తీరాన్ని ఆర్థిక వృద్ధికి వేదికగా మార్చాలనే లక్ష్యంతో అనేక పోర్టులు, ఫిషింగ్ హార్బర్ల (Fishing Harbors) నిర్మాణానికి శ్రీకారం చుట్టడం జరిగింది.
దాదాపు రూ. 20,000 కోట్ల వ్యయంతో నాలుగు గ్రీన్ ఫీల్డ్ పోర్టుల (Greenfield Ports) నిర్మాణం ప్రారంభించబడింది. నెల్లూరు జిల్లాలో రామాయపట్నం పోర్టు (Ramayapatnam Port), కృష్ణా జిల్లాలో (Krishna District) మచిలీపట్నం పోర్టు (Machilipatnam Port),, శ్రీకాకుళం జిల్లాలో మూలపేట పోర్టు (Mulapeta Port), కాకినాడలో గేట్వే పోర్టు (Gateway Port) వంటి ప్రాజెక్టులు రాష్ట్ర ఆర్థిక శక్తిని పెంచే దిశగా కీలకంగా భావించబడ్డాయి. వీటితో పాటు రూ. 3,521 కోట్లతో 10 ఫిషింగ్ హార్బర్లు, రూ. 127 కోట్లతో 6 ఫిష్ ల్యాండింగ్ సెంటర్ల నిర్మాణం రెండు దశల్లో చేపట్టడం ద్వారా మత్స్యకారుల జీవనోపాధిని బలోపేతం చేయాలని లక్ష్యంగా పెట్టుకున్నారు.
ఈ ప్రాజెక్టుల ద్వారా మత్స్యకారుల వలసలను నివారించడం, వారికి స్వస్థలాల్లోనే ఉపాధి కల్పించడం, ఏటా 4.5 లక్షల టన్నుల అదనపు మత్స్య సంపదను సృష్టించడం, రాష్ట్ర జీడీపీకి రూ. 9,000 కోట్ల వరకూ తోడ్పాటు అందించడం వంటి లక్ష్యాలు నిర్దేశించబడ్డాయి. సుమారు 555 మత్స్యకార గ్రామాలకు చెందిన 6 లక్షలకుపైగా ప్రజలకు ప్రత్యక్షంగా మరియు పరోక్షంగా ఉపాధి అవకాశాలు కల్పించాలనే ప్రణాళికలు రూపొందించబడ్డాయి.
ప్రతి 50 కిలోమీటర్లకు ఒక పోర్టు లేదా హార్బర్ ఏర్పాటు చేయాలనే దృక్పథంతో రూపొందించిన ఈ వ్యూహం, రాష్ట్రాన్ని నీలి ఆర్థిక వ్యవస్థలో అగ్రగామిగా నిలబెట్టే సామర్థ్యాన్ని కలిగి ఉందని అప్పట్లో విశ్లేషకులు అభిప్రాయపడ్డారు. 150 మిలియన్ మెట్రిక్ టన్నుల ఎగుమతులను 500 మిలియన్ మెట్రిక్ టన్నులకు పెంచాలనే లక్ష్యం కూడా ఈ ప్రణాళికలో భాగమైంది.
అయితే ప్రస్తుత పరిస్థితుల్లో ఈ ప్రాజెక్టుల అమలు, వినియోగంపై అనేక ప్రశ్నలు తలెత్తుతున్నాయి. గతంలో ప్రారంభించిన హార్బర్లలో చాలా వరకు పూర్తి స్థాయిలో వినియోగంలోకి రాకపోవడం, కొన్ని ప్రాంతాల్లో భూములను ప్రైవేట్ సంస్థలకు కేటాయించడం వంటి అంశాలు మత్స్యకారుల్లో ఆందోళన కలిగిస్తున్నాయి. ముఖ్యంగా జువ్వలదిన్నె హార్బర్కు సంబంధించిన భూమి కేటాయింపులపై తీవ్ర అభ్యంతరాలు వ్యక్తమవుతున్నాయి.
పోర్టులు, హార్బర్లు నిర్మాణ దశలోనే నిలిచిపోవడం లేదా ఆలస్యమవడం వల్ల మత్స్యకారుల ఆశలు నెరవేరకపోయే ప్రమాదం ఉందని భావిస్తున్నారు. ఈ ప్రాజెక్టులు పూర్తి స్థాయిలో అమలవుతాయా లేదా ప్రైవేట్ ప్రయోజనాలకు మళ్లుతాయా అన్నది ప్రస్తుతం ప్రధాన చర్చనీయాంశంగా మారింది.
మొత్తంగా చూస్తే, బ్లూ ఎకానమీ దిశగా వేయబడిన ఈ భారీ అడుగులు ఆంధ్రప్రదేశ్ భవిష్యత్తును మలుపుతిప్పగలవు. అయితే వాటి అమలు, నిర్వహణ, ప్రజల ప్రయోజనాల పరిరక్షణ వంటి అంశాలు సమర్థవంతంగా కొనసాగితేనే రాష్ట్రం నిజమైన నీలి ఆర్థిక విప్లవానికి చిరునామాగా నిలుస్తుంది. దీనికి ప్రస్తుత కూటమి సర్కార్ గండి కొట్టబోతుందా అనే అనుమానం మత్స్యకారుల్లో రోజురోజుకి బలపడుతోంది.
