బడి బాగుకోసం కూడా జోలే పడుతున్నారా? ప్రభుత్వ ప్రాధమిక బాధ్యతలపై కొత్త చర్చ!

ఆంధ్రప్రదేశ్‌లో (Andhra Pradesh) తెలుగుదేశం పార్టీ (Telugu Desam Party) అధికారంలోకి వచ్చిన ప్రతిసారి ఒక నిర్దిష్ట రాజకీయ ధోరణి స్పష్టంగా కనిపిస్తోందనే విమర్శలు మళ్లీ తెరపైకి వస్తున్నాయి. భవిష్యత్తులో ప్రపంచ స్థాయి అభివృద్ధి, అంతర్జాతీయ నగరాలు, స్వర్ణాంధ్ర కలలు చూపిస్తూ ప్రజల్లో భారీ అంచనాలు పెంచడం ఒక వైపు కొనసాగుతుండగా, మరోవైపు ప్రభుత్వ ప్రాథమిక బాధ్యతల నిర్వహణకే విరాళాలపై ఆధారపడే పరిస్థితి ఏర్పడుతోందన్న అభిప్రాయం రాజకీయ వర్గాల్లో, సామాన్య ప్రజల్లో వ్యక్తమవుతోంది.

తెలుగు ప్రజలకు ఆత్మగౌరవం, స్వాభిమానం ప్రత్యేకమైన విలువలు. చరిత్రపరంగా స్వీయ గౌరవం కోసం పోరాడిన సమాజంగా తెలుగు వారి గుర్తింపు ఉంది. అలాంటి పరిస్థితుల్లో ప్రజల చేత ఎన్నుకోబడిన ప్రభుత్వం ప్రతి అంశానికీ ఆర్థిక లోటును కారణంగా చూపిస్తూ విరాళాల కోసం ముందుకు రావడం రాష్ట్ర ప్రతిష్టను దెబ్బతీస్తుందా అనే ప్రశ్నలు వినిపిస్తున్నాయి.

2014లో రాష్ట్ర విభజన అనంతరం అమరావతి రాజధాని (Amaravati Capital) నిర్మాణం పేరుతో హుండీలు (Donation Boxes) ఏర్పాటు చేయడం, అనంతరం “మై బ్రిక్ – మై అమరావతి” (My Brick – My Amaravati) పేరుతో ఈ-ఇటుకల ద్వారా విరాళాలు సేకరించడం అప్పట్లో పెద్ద చర్చకు దారి తీసింది. ప్రజలు రాష్ట్ర పరిస్థితిని దృష్టిలో పెట్టుకుని సహకరించినప్పటికీ, ఆ నిధుల వినియోగంపై పూర్తి స్థాయి పారదర్శకత కనిపించలేదనే విమర్శలు అప్పట్లో వచ్చాయి.

ఇప్పుడు అదే తరహాలో “డొనేట్ ఫర్ అమరావతి”(Donate for Amaravati) వంటి కార్యక్రమాలు మళ్లీ ప్రారంభమవడం రాజకీయంగా చర్చనీయాంశమైంది. రాజధానిని స్వయం సమృద్ధి నగరంగా అభివర్ణిస్తూనే నిధుల కోసం ప్రజలపై ఆధారపడటం విరుద్ధ సంకేతాలు ఇస్తోందని విమర్శకులు పేర్కొంటున్నారు.

ఈ విరాళాల సంస్కృతి కేవలం రాజధానికే పరిమితం కాకుండా పేదల సంక్షేమం, అన్నా క్యాంటీన్లు(Anna Canteens), ఇప్పుడు విద్యా రంగం వరకు విస్తరించడం గమనార్హం. సంపన్నులు పేదలను దత్తత తీసుకోవాలని కోరడం, అన్నా క్యాంటీన్ నిర్వహణకు విరాళాలు సేకరించడం, ఇప్పుడు ప్రభుత్వ పాఠశాలల అభివృద్ధి కోసం ప్రత్యేక దాతల పోర్టల్ ఏర్పాటు చేయడం ప్రభుత్వ బాధ్యతలపై ప్రశ్నలు లేవనెత్తుతున్నాయి.

తాజాగా ప్రభుత్వం జారీ చేసిన G.O.MS.NO. 8 (14-05-2026) ప్రకారం “ఏపీ స్కూల్ ఇన్‌ఫ్రా డెవలప్‌మెంట్ సొసైటీ”(AP School Infra Development Society) ఏర్పాటు చేసి, ప్రభుత్వ పాఠశాలలు మరియు జూనియర్ కళాశాలల అభివృద్ధి కోసం CSR నిధులు, ప్రవాసాంధ్రులు, పూర్వ విద్యార్థులు, ప్రజా విరాళాలను సమీకరించేందుకు ప్రత్యేక “దాతల పోర్టల్” ఏర్పాటు చేయాలని నిర్ణయించింది.

ప్రభుత్వం తన ఉత్తర్వుల్లో పాఠశాలల్లో ఇంకా మౌలిక సదుపాయాల లోపాలు ఉన్నాయని అంగీకరించింది. అయితే విమర్శకుల ప్రశ్న ఏమిటంటే — ప్రజలు ఇప్పటికే పన్నులు చెల్లిస్తుండగా, వేల కోట్ల అప్పులు రాష్ట్రంపై ఉండగా, విద్య వంటి ప్రాథమిక రంగాలకూ విరాళాలపై ఆధారపడాల్సిన పరిస్థితి ఎందుకు వచ్చిందన్నది.

మరోవైపు వైఎస్సార్ కాంగ్రెస్ పార్టీ అనుకూల వర్గాలు జగన్ హయాంలో కరోనా వంటి తీవ్రమైన ఆర్థిక పరిస్థితులు ఎదురైనా “నాడు-నేడు” కార్యక్రమం (Nadu-Nedu Program) ద్వారా వేలాది ప్రభుత్వ పాఠశాలలు ఆధునీకరించబడ్డాయని గుర్తుచేస్తున్నాయి. ఆ సమయంలో ప్రజల వద్ద విరాళాలు అడగకుండా ప్రభుత్వ నిధులతోనే విద్యా రంగాన్ని అభివృద్ధి చేశామని వారు పేర్కొంటున్నారు.

ఇక ఇప్పుడు ప్రభుత్వం జీవోలు జారీ చేసి అధికారికంగా విరాళాల సేకరణ వ్యవస్థను ఏర్పాటు చేయడం మరింత వివాదాస్పదమైంది. గతంలో “విద్య ప్రభుత్వ బాధ్యత కాదు” అనే తరహా వ్యాఖ్యలు చేసిన చంద్రబాబు, ఇప్పుడు అదే దిశగా వ్యవహరిస్తున్నారనే విమర్శలు వినిపిస్తున్నాయి.

విద్య, సంక్షేమం, ఆహార భద్రత, పేదల సంక్షేమం వంటి అంశాలు ప్రభుత్వాల ప్రాథమిక బాధ్యతలు కావాలా? లేక ప్రజల దాతృత్వంపై ఆధారపడాలా? అనే పెద్ద చర్చ ఇప్పుడు ఆంధ్రప్రదేశ్ రాజకీయాల్లో ప్రారంభమైంది.

ప్రజల నుంచి పన్నులు వసూలు చేస్తూ, మరోవైపు ప్రతి రంగానికీ విరాళాలు కోరడం రాష్ట్ర ఆత్మగౌరవాన్ని దెబ్బతీస్తుందా అనే సందేహం రోజురోజుకూ బలపడుతోంది. ప్రభుత్వం ముందుగా రాష్ట్ర ఆర్థిక పరిస్థితి, అప్పులు, ఖర్చులపై పూర్తి స్థాయి శ్వేతపత్రం విడుదల చేసి ప్రజలకు స్పష్టత ఇవ్వాలనే డిమాండ్ కూడా వినిపిస్తోంది. లేకపోతే “ప్రభుత్వ బాధ్యతలను ప్రజల భుజాలపై మోపుతున్నారా?” అనే విమర్శలు మరింత పెరిగే అవకాశం ఉందని రాజకీయ విశ్లేషకులు భావిస్తున్నారు.