ఆంధ్రప్రదేశ్ (Andhra Pradesh) ప్రభుత్వం సినీ, టెలివిజన్, రంగస్థల కళల అభివృద్ధికి కీలక నిర్ణయం తీసుకుంది. ఏపీ స్టేట్ ఫిల్మ్, టెలివిజన్ అండ్ థియేటర్ డెవలప్మెంట్ కార్పొరేషన్కు (AP State Film, Television and Theatre Development Corporation) కొత్త చైర్మన్, వైస్ చైర్మన్తో పాటు 14 మంది డైరెక్టర్లను నియమిస్తూ అధికారిక ఉత్తర్వులు జారీ చేసింది. ఈ నిర్ణయం ద్వారా రాష్ట్రంలో సినీ పరిశ్రమకు కొత్త ఊపిరి పోసే ప్రయత్నం చేస్తున్నట్టు ప్రభుత్వం స్పష్టం చేసింది.
కార్పొరేషన్ చైర్మన్గా పి. భరత్ భూషణ్ను (P. Bharat Bhushan) నియమించారు. సంస్థ భవిష్యత్ ప్రణాళికలు, అభివృద్ధి కార్యక్రమాలను ఆయన ముందుండి నడిపించనున్నారు. వైస్ చైర్మన్గా చిక్కాల మెహర్ రమేష్ కుమార్కు(Chikkala Mehar Ramesh Kumar) బాధ్యతలు అప్పగించారు. పరిశ్రమలో అనుభవం ఉన్న వ్యక్తులను ఎంపిక చేసి సమతుల్యమైన కమిటీని ఏర్పాటు చేయడం విశేషంగా మారింది.
చైర్మన్, వైస్ చైర్మన్లతో పాటు మొత్తం 14 మందిని డైరెక్టర్లుగా ప్రభుత్వం నియమించింది. ఈ జాబితాలో సుమన్ తల్వార్, ఎస్. శివాజీ, చదలవాడ శ్రీనివాసరావు, బుర్రా సాయిమాధవ్, వై. ఝాన్సీ, కూచిభొట్ల సుబ్రహ్మణ్య వివేకానంద, వి. సముద్ర, కే. ఉమామహేశ్వరరావు, మీర్ ఎస్, కందిమళ్ల సాంబశివరావు, ఏ. సత్యనారాయణ, ఎస్. వెంకట కృష్ణారెడ్డి, జీ. రాజ్ వెంకటేశ్వర యాదవ్, డి. సత్యనారాయణలకు స్థానం దక్కింది.
ఈ కొత్త బోర్డులో సీనియర్ నటులు, దర్శకులు, నిర్మాతలు, రచయితలు, సాంకేతిక నిపుణులకు అవకాశం కల్పించడం ద్వారా పరిశ్రమలోని అన్ని వర్గాలకు ప్రాతినిధ్యం కల్పించినట్టు ప్రభుత్వం భావిస్తోంది. క్షేత్రస్థాయిలో కళాకారులు ఎదుర్కొంటున్న సమస్యలను గుర్తించి పరిష్కరించే దిశగా ఈ కమిటీ పనిచేయనుంది.
రాష్ట్రంలో సినీ పరిశ్రమ అభివృద్ధిని వేగవంతం చేయడం, థియేటర్ల సమస్యలను పరిష్కరించడం, టెలివిజన్ రంగానికి మరింత ప్రోత్సాహం ఇవ్వడం, క్షీణిస్తున్న నాటకరంగానికి పూర్వ వైభవం తీసుకురావడం వంటి అంశాల్లో ఈ కమిటీ కీలక పాత్ర పోషించనుంది. ప్రభుత్వం తీసుకున్న ఈ నిర్ణయంపై సినీ, కళారంగ వర్గాలు హర్షం వ్యక్తం చేస్తున్నాయి.
