అధికార కుర్చీ కోసం రాజకీయ పార్టీలు ఎంతదూరమైనా వెళ్తాయా..? ఒక సామాన్య ప్రభుత్వ డాక్టర్ (Government Doctor) వ్యక్తిగత ఉద్రేకాన్ని రాజకీయ ప్రయోజనాల కోసం ఉపయోగించుకున్నారా..? నర్సీపట్నం మత్తు డాక్టర్ సుధాకర్ (Sudhakar) వ్యవహారం చుట్టూ తిరిగిన ఘటనలు ఇప్పటికీ ఆంధ్రప్రదేశ్ (Andhra Pradesh) రాజకీయాల్లో చర్చనీయాంశంగానే నిలిచాయి.
2019 ఆగస్టు 19న నర్సీపట్నం ఏరియా ఆసుపత్రిలో పనిచేస్తున్న మత్తు డాక్టర్ సుధాకర్, గైనకాలజిస్టు డాక్టర్ గౌతమితో (Gowthami) ఉన్న శాఖాపరమైన విభేదాల నేపథ్యంలో విధుల్లో నిర్లక్ష్యంగా వ్యవహరించారనే ఆరోపణలు వచ్చాయి. ప్రసవాల కోసం వచ్చిన గర్భిణీలకు అనస్థీషియా ఇవ్వకుండా ఆసుపత్రి నుంచి వెళ్లిపోవడంతో తీవ్ర ఆందోళన నెలకొంది. పరిస్థితిని తెలుసుకున్న స్థానిక ఎమ్మెల్యే ఉమాశంకర్ గణేష్ (Uma Shankar Ganesh) వెంటనే స్పందించి, అనకాపల్లి నుంచి మరో మత్తు డాక్టర్ను రప్పించి ప్రసవాలు సజావుగా జరిగేలా చర్యలు తీసుకున్నారని అప్పట్లో వార్తలు వెలువడ్డాయి.
విధుల నిర్వహణలో వివాదాస్పదంగా పేరున్న సుధాకర్పై గతంలో కూడా అధికారులతో ఘర్షణలు జరిగినట్లు ప్రచారం జరిగింది. ఈ పరిణామాల తర్వాత ఆయనకు స్థానిక రాజకీయాలపై తీవ్ర అసంతృప్తి పెరిగిందని చెబుతారు. అదే సమయంలో కరోనా మహమ్మారి (Corona Pandemic) దేశాన్ని కుదిపేస్తుండగా, రాష్ట్ర ప్రభుత్వంపై విమర్శలు పెంచేందుకు సుధాకర్ను రాజకీయంగా ఉపయోగించుకున్నారనే ఆరోపణలు వెల్లువెత్తాయి.
“మాస్కులు (Masks) లేవు” అంటూ ఆయన చేసిన ఆరోపణలు రాష్ట్రవ్యాప్తంగా సంచలనం సృష్టించాయి. అయితే ఆ వ్యాఖ్యల ముందు స్థానిక టీడీపీ నేత అయ్యన్నపాత్రుడితో (Ayyanna Patrudu) సుధాకర్ భేటీ అయిన సీసీటీవీ దృశ్యాలు బయటకు రావడంతో ఈ వ్యవహారం రాజకీయ మలుపు తిరిగింది. అనంతరం విచారణ ఆదేశాలు జారీ కావడం, సుధాకర్ సస్పెన్షన్కు దారితీసింది.
ఆ తర్వాత తెలుగుదేశం పార్టీ(Telugu Desam Party) ఈ అంశాన్ని కుల రాజకీయాల దిశగా మళ్లించిందనే విమర్శలు వచ్చాయి. గత వివాదాలను పక్కనబెట్టి “దళిత డాక్టర్పై వేధింపులు”(Dalit Doctor Harassment) అంటూ పెద్ద ఎత్తున ప్రచారం జరిగిందని ప్రత్యర్థులు ఆరోపించారు.
తర్వాత కూడా సుధాకర్ వివాదాల కేంద్రంగానే నిలిచారు. ముస్లింలు, క్రైస్తవులపై వివాదాస్పద వ్యాఖ్యలు చేయడం, మద్యం మత్తులో ప్రమాదానికి కారణమవడం, పోలీసులతో ఘర్షణలు వంటి ఘటనలు ఆయనను మరింత వివాదాల్లోకి నెట్టాయి. పోలీసులు వ్యవహరించిన తీరు పట్ల జగన్ ప్రభుత్వం చర్యలు తీసుకున్నప్పటికీ, ఈ అంశాన్ని కూడా రాజకీయంగా ఉపయోగించుకున్నారనే విమర్శలు వినిపించాయి.
ఈ ఘటనల అనంతరం ఏడాది గడవకముందే డాక్టర్ సుధాకర్ గుండెపోటుతో మరణించడం మరో విషాదంగా మారింది. మరణానికి ముందు “నన్ను కుక్కలా వాడుకున్నారు” అంటూ ఆయన చేసిన వ్యాఖ్యల వీడియో సోషల్ మీడియాలో వైరల్ కావడం రాజకీయంగా మరింత చర్చకు దారితీసింది.
ఒక ప్రభుత్వ డాక్టర్ వ్యక్తిగత బలహీనతలను రాజకీయ ప్రయోజనాల కోసం ఉపయోగించుకున్నారా..? చివరికి రాజకీయ లాభం కొందరికే దక్కి, పావుగా మారిన వ్యక్తి మాత్రం జీవితాన్ని కోల్పోయాడా..? అనే ప్రశ్నలు ఇప్పటికీ చర్చనీయాంశంగానే ఉన్నాయి.
