రాష్ట్ర రాజకీయాల్లో కూటమి ప్రభుత్వం (Coalition Government) రెండేళ్లు పూర్తికాకముందే అంతర్గత విభేదాలతో కుదేలవుతోందనే సంకేతాలు బలంగా వినిపిస్తున్నాయి. ఇన్నాళ్లు లోపలపలనే కొనసాగిన అసంతృప్తి ఇప్పుడు బహిరంగంగా బయటపడుతుండటంతో రాజకీయ వర్గాల్లో చర్చ మొదలైంది. ముఖ్యంగా చంద్రగిరి నియోజకవర్గంలో (Chandragiri Constituency) చోటుచేసుకున్న తాజా పరిణామాలు కూటమి పార్టీల మధ్య పెరుగుతున్న విభేదాలను స్పష్టంగా బయటపెడుతున్నాయి.
చంద్రగిరి మండలం తొండవాడ గ్రామానికి చెందిన తపసి మురళీ రెడ్డి (Tapasi Murali Reddy), జనసేన పార్టీకి (Jana Sena Party) కీలక నేతగా, ఎమ్మెల్యే(MLA) పులివర్తి నానికి (Pulivarthi Nani) అత్యంత సన్నిహితుడిగా పేరుపొందిన వ్యక్తి. గత ఎన్నికల్లో కూటమి అభ్యర్థి విజయం కోసం అహర్నిశలు కృషి చేసిన ఆయన, ఇప్పుడు తీవ్ర అసంతృప్తితో ఎమ్మెల్యేపై బహిరంగంగా ఆగ్రహం వ్యక్తం చేయడం సంచలనంగా మారింది.
తొండవాడ గ్రామానికి వచ్చిన ఎమ్మెల్యే పులివర్తి నానికి జనసేన నేత మురళీ రెడ్డి చెప్పు (Slipper) చూపిస్తూ తీవ్ర ఆగ్రహంతో నిలదీశారు. “చెప్పుతో కొడతా… బయటకు రా” అంటూ నడిరోడ్డుపై ఆగ్రహం వ్యక్తం చేయడంతో అక్కడ ఉద్రిక్త పరిస్థితులు నెలకొన్నాయి. గ్రామాన్ని “పాకిస్థాన్”తో(Pakistan) పోల్చిన వ్యాఖ్యలపై ముందుగా వివరణ ఇవ్వాలని మురళీ రెడ్డి డిమాండ్ చేశారు. గడచిన ఎన్నికల్లో తొండవాడ గ్రామం (Thondavada Village) కూటమికి 566 ఓట్ల మెజారిటీ ఇచ్చిందని, అలాంటి గ్రామాన్ని అవమానించేలా వ్యాఖ్యలు ఎలా చేస్తారని ప్రశ్నించారు. పరిస్థితి ఉద్రిక్తంగా మారడంతో స్థానికులు జోక్యం చేసుకుని మురళీ రెడ్డిని అడ్డుకున్నారు.
ఇది ఒక్కరోజులో జరిగిన వివాదం కాదని, గత కొంతకాలంగా పేరుకుపోయిన అసంతృప్తి ఫలితమేనని స్థానిక రాజకీయ వర్గాలు చెబుతున్నాయి. గతంలో తిరుపతి–చంద్రగిరి రహదారిపై ఉన్న తొండవాడ కూడలిలో ఎమ్మెల్యే నాని ఫోటోలతో ఉన్న బ్యానర్లను మురళీ రెడ్డి కత్తితో కోసిన ఘటన కూడా తీవ్ర చర్చకు దారితీసింది. ఆ ఘటనను ఆయన స్వయంగా సోషల్ మీడియాలో పోస్టు చేయడం ద్వారా కూటమి లోపల దాగి ఉన్న విభేదాలు బయటపడ్డాయి.
జనసేన కార్యకర్తలను, స్థానిక నేతలను పక్కనబెడుతున్నారనే భావన క్రమంగా పెరుగుతోందని సమాచారం. కష్టపడి పనిచేసిన వారికి గుర్తింపు దక్కడం లేదని జనసేన శ్రేణుల్లో అసంతృప్తి పెరుగుతోందని చెబుతున్నారు. ఇదే సమయంలో పనపాకం పంచాయతీలో జనసేన బ్యానర్లను చించివేసిన ఘటన కూడా రెండు పార్టీల మధ్య ఉద్రిక్తతలను మరింత పెంచింది.
అలాగే జనసేన ఇన్చార్జి దేవర మనోహర్ (Devara Manohar) ఎమ్మెల్యే నానిపై అక్రమాలు, అవినీతి ఆరోపణలతో ఫిర్యాదు చేయడం కూడా రాజకీయంగా కలకలం రేపింది. మరోవైపు బీజేపీ(BJP) నేతలు సైతం ఎమ్మెల్యే వ్యవహార శైలిపై అసంతృప్తిగా ఉన్నట్లు తెలుస్తోంది. కార్యక్రమాలకు ఆహ్వానం ఇవ్వకపోవడం, అధికార వ్యవస్థలో భాగస్వామ్య పార్టీలకు ప్రాధాన్యం లేకపోవడం వంటి అంశాలు కూటమి భాగస్వామ్య పార్టీల మధ్య దూరాన్ని పెంచుతున్నాయని చర్చ సాగుతోంది.
ఇసుక (Sand), గ్రావెల్ (Gravel) దందాలు (Illegal Business), భూకబ్జాలు(Land Grabbing), అవినీతి ఆరోపణలు కలిపి ఎమ్మెల్యే నానిపై వ్యతిరేక వాతావరణాన్ని మరింత పెంచుతున్నాయని స్థానికంగా ప్రచారం జరుగుతోంది. మొత్తం మీద చంద్రగిరిలో చెలరేగిన ఈ వివాదం కూటమి అంతర్గత సంక్షోభానికి కేవలం ఆరంభమా? లేక రాబోయే రోజుల్లో మరింత పెద్ద రాజకీయ పరిణామాలకు నాంది కానుందా? అన్నది ఇప్పుడు రాష్ట్ర రాజకీయాల్లో హాట్టాపిక్గా మారింది.
