కూటమి రెండేళ్ల పాలనపై వైసీపీ సంచలన ఛార్జ్‌షీట్.. ‘వెన్నుపోటుకు రెండేళ్లు’ పుస్తకం విడుదల.

ఆంధ్రప్రదేశ్‌లో (Andhra Pradesh) ప్రస్తుత కూటమి ప్రభుత్వం (Coalition Government) అధికారంలోకి వచ్చి రెండేళ్లు పూర్తైన సందర్భంగా వైయస్సార్ కాంగ్రెస్ పార్టీ(YSRCP) విడుదల చేసిన ‘వెన్నుపోటుకు రెండేళ్లు’ పుస్తకం రాజకీయంగా తీవ్ర చర్చకు దారితీస్తోంది. ఈ పుస్తకంలో ఎన్నికల సమయంలో ఇచ్చిన హామీల అమలు, సంక్షేమ పథకాల పరిస్థితి, రైతుల సమస్యలు(Farmers Issues), విద్యా-వైద్య రంగాల పరిస్థితి (Education and Health Sectors), రాష్ట్ర ఆర్థిక వ్యవస్థ(State Economy), రాజకీయ కక్షసాధింపులు వంటి అనేక అంశాలపై వైసీపీ వివరానాత్మకంగా ప్రస్తావనకు తెచ్చింది.

కూటమి ప్రభుత్వం ప్రచారం చేసిన ‘సూపర్ సిక్స్’(Super Six) హామీలు అమలు కాలేదని ఈ పుస్తకం ప్రధానంగా వివరించింది. 18 నుంచి 50 ఏళ్ల మహిళలకు నెలకు ₹1,500 ఇస్తామని చెప్పిన ‘ఆడబిడ్డ నిధి’(Aadabidda Nidhi) పథకం ఇప్పటివరకు అమలు కాలేదని, రెండేళ్లకు గాను ఒక్కో మహిళకు ₹36,000 బకాయి పడిందని పేర్కొంది. అలాగే నిరుద్యోగులకు నెలకు ₹3,000 చొప్పున ఇవ్వాల్సిన భృతి కూడా అందకపోవడంతో ఒక్కో నిరుద్యోగికి ₹72,000 బాకీ పడిందని విమర్శించింది.

‘తల్లికి వందనం’(Talliki Vandanam) పథకంలో ప్రతి విద్యార్థికి ₹15,000 ఇస్తామని ప్రకటించినా, మొదటి ఏడాది అమలు చేయకపోగా రెండో ఏడాది లబ్ధిదారుల సంఖ్యను భారీగా తగ్గించారని పుస్తకంలో పేర్కొన్నారు. అలాగే ఏడాదికి మూడు ఉచిత గ్యాస్ సిలిండర్లు (Free Gas Cylinders) ఇస్తామని చెప్పిన ‘దీపం’(Deepam) పథకంలో కూడా కోతలు విధించారని ఆరోపించారు.

విద్యా, వైద్య రంగాలపై కూడా ఈ నివేదిక తీవ్ర విమర్శలు చేసింది. జగన్ ప్రభుత్వం ప్రారంభించిన ‘నాడు-నేడు’(Nadu-Nedu) కార్యక్రమాన్ని నిలిపివేయడంతో ప్రభుత్వ పాఠశాలల మౌలిక సదుపాయాలు దెబ్బతిన్నాయని పేర్కొంది. ఆరోగ్యశ్రీ (Aarogyasri) ఆసుపత్రులకు సుమారు ₹3,746 కోట్ల బకాయిలు పెండింగ్‌లో ఉండటంతో పేదలకు ఉచిత వైద్యం అందడంలో ఇబ్బందులు ఎదురవుతున్నాయని తెలిపింది. అదేవిధంగా గత ప్రభుత్వ హయాంలో ప్రారంభమైన 17 మెడికల్ కాలేజీలలో 11ను ప్రైవేటు వ్యక్తులకు అప్పగించే ప్రయత్నాలు జరుగుతున్నాయని వివరించింది.

రైతుల సమస్యలపై కూడా పుస్తకంలో విస్తృతంగా ప్రస్తావించారు. ‘అన్నదాత సుఖీభవ’(Annadata Sukhibhava) పథకంలో రైతులకు ఏడాదికి ₹20,000 ఇస్తామని చెప్పినా పూర్తిస్థాయిలో అమలు జరగలేదని పేర్కొన్నారు. ఉచిత పంటల బీమా పథకాన్ని ఎత్తివేయడంతో రైతులకు అందాల్సిన వేల కోట్ల రూపాయల బీమా సాయం ఆగిపోయిందని ఆరోపించారు. తుపానులు, ప్రకృతి విపత్తుల కారణంగా నష్టపోయిన రైతులకు ఇవ్వాల్సిన ఇన్పుట్ సబ్సిడీలు కూడా పెండింగ్‌లో ఉన్నాయని తెలిపారు.

రాష్ట్రంలో శాంతిభద్రతలు (Law and Order) క్షీణించాయని, రాజకీయ కక్షసాధింపులు పెరిగాయని కూడా ఈ పుస్తకం ఆరోపిస్తోంది. గత రెండేళ్లలో 710 హత్యలు జరిగాయని, అందులో 24 రాజకీయ హత్యలు ఉన్నాయని పేర్కొంది. పోలీసు వ్యవస్థను రాజకీయ ప్రయోజనాలకు వినియోగిస్తూ వైసీపీ నాయకులు, కార్యకర్తలపై అక్రమ కేసులు పెడుతున్నారని ఆరోపించింది. సోషల్ మీడియా కార్యకర్తలను లక్ష్యంగా చేసుకుని వేధింపులు జరుగుతున్నాయని కూడా పేర్కొన్నారు.

దళితులపై దాడులు, అవమానకర ఘటనలు పెరిగాయని పలు ఉదాహరణలతో వివరించిన ఈ పుస్తకం, రాష్ట్ర ఆర్థిక పరిస్థితిపై కూడా తీవ్ర ఆందోళన వ్యక్తం చేసింది. రెండేళ్లలోనే సుమారు ₹3.40 లక్షల కోట్ల అప్పులు చేసినా రాష్ట్రంలో అభివృద్ధి కనిపించడం లేదని ఆరోపించింది. అమరావతి, విశాఖపట్నం ప్రాంతాల్లో విలువైన ప్రభుత్వ భూములను బినామీలకు కేటాయిస్తున్నారని కూడా పేర్కొంది.

చివరిగా, జగన్ ప్రభుత్వం హయాంలో డీబీటీ(DBT) ద్వారా ₹2.73 లక్షల కోట్ల సంక్షేమం అందించామని, ప్రస్తుతం మాత్రం హామీల ఉల్లంఘన జరుగుతోందని గణాంకాలతో వివరించింది. ఈ పుస్తకం కేవలం రాజకీయ విమర్శల సమాహారం మాత్రమే కాకుండా, కూటమి ప్రభుత్వంపై వైసీపీ విడుదల చేసిన పూర్తి స్థాయి ‘ఛార్జ్‌షీట్’(Charge Sheet) అని ఆ పార్టీ నాయకులు చెబుతున్నారు.