కర్ణాటక రాజకీయాల్లో (Karnataka Politics) గత కొన్ని రోజులుగా కొనసాగుతున్న నాయకత్వ మార్పు చర్చలకు ఎట్టకేలకు తెరపడింది. ముఖ్యమంత్రి (Chief Minister) సిద్ధరామయ్య (Siddaramaiah) తన పదవికి రాజీనామా (Resignation) చేస్తున్నట్లు అధికారికంగా ప్రకటించడం రాష్ట్ర రాజకీయాల్లో భారీ చర్చకు దారితీసింది. కాంగ్రెస్ అధిష్ఠానం (Congress High Command) సూచనల మేరకే ఈ నిర్ణయం తీసుకున్నట్లు ఆయన స్పష్టం చేయడంతో.. అధికార మార్పిడికి మార్గం సుగమమైంది.
గురువారం ఉదయం బెంగళూరులోని (Bengaluru) తన అధికారిక నివాసంలో సిద్ధరామయ్య కేబినెట్ మంత్రులతో ప్రత్యేక బ్రేక్ఫాస్ట్ సమావేశం నిర్వహించారు. ఈ సందర్భంగా ఆయన కీలక వ్యాఖ్యలు చేశారు. “హైకమాండ్ ఆదేశాల మేరకే నేను ముఖ్యమంత్రి పదవికి రాజీనామా చేస్తున్నాను. తదుపరి ముఖ్యమంత్రి ఎవరనేది పార్టీ అధిష్ఠానమే నిర్ణయిస్తుంది. నేను మనస్ఫూర్తిగా రాజీనామా చేస్తున్నా.. నాకు ఎలాంటి బాధ లేదు. మీ అందరి సహకారానికి కృతజ్ఞతలు” అని పేర్కొన్నారు.
77 ఏళ్ల సీనియర్ నేత అయిన సిద్ధరామయ్య.. పార్టీ ఎవరిని తదుపరి సీఎంగా ఎంపిక చేసినా వారికి తన పూర్తి సహకారం ఉంటుందని ప్రకటించారు. దీంతో కాంగ్రెస్ పార్టీలో అంతర్గత విభేదాలకు చెక్ పెట్టే ప్రయత్నం చేస్తున్నారనే చర్చ రాజకీయ వర్గాల్లో సాగుతోంది.
ఈ కీలక సమావేశంలో డిప్యూటీ సీఎం డి.కె. శివకుమార్తో (D. K. Shivakumar) పాటు మంత్రివర్గ సభ్యులంతా పాల్గొన్నారు. ప్రస్తుతం సీఎం రేసులో డి.కె. శివకుమార్ పేరు ప్రధానంగా వినిపిస్తోంది. అయితే కాంగ్రెస్ అధిష్ఠానం తుది నిర్ణయం ఏమిటన్న దానిపై ఇంకా ఉత్కంఠ కొనసాగుతోంది.
ఇదిలా ఉండగా సిద్ధరామయ్య తన రాజీనామా లేఖను సమర్పించేందుకు గవర్నర్ (Governor) థావర్ చంద్ గెహ్లాట్ (Thawar Chand Gehlot) అపాయింట్మెంట్ కోరినట్లు సమాచారం. కానీ గవర్నర్ ప్రస్తుతం బెంగళూరులో లేరని.. వ్యక్తిగత కారణాలతో మధ్యప్రదేశ్లోని ఇండోర్కు వెళ్లినట్లు రాజ్ భవన్ వర్గాలు వెల్లడించాయి. దీంతో అధికారిక రాజీనామా ప్రక్రియ ఎప్పుడు పూర్తవుతుందన్న దానిపై ఆసక్తి నెలకొంది.
కర్ణాటక రాజకీయాల్లో ఈ పరిణామాలు ఇప్పుడు జాతీయ స్థాయిలో కూడా చర్చనీయాంశంగా మారాయి. కాంగ్రెస్ పార్టీ భవిష్యత్ వ్యూహం ఎలా ఉండబోతుందన్న దానిపై అందరి దృష్టి నిలిచింది.
