తెలుగుదేశం పార్టీ (Telugu Desam Party) వ్యవస్థాపకుడు ఎన్టీఆర్ (NTR) భారీ కాంస్య విగ్రహం (Bronze Statue) హైదరాబాద్ (Hyderabad) నగరంలోని అమీర్పేట మైత్రీవనం చౌరస్తాలో (Mytrivanam Junction) ఆవిష్కరణ కావడం రాజకీయంగా చర్చనీయాంశమైంది. జూబ్లీహిల్స్ ఉప ఎన్నికల ప్రచారంలో ఇచ్చిన హామీ మేరకు ఈ విగ్రహాన్ని ఏర్పాటు చేశామని తెలంగాణ ముఖ్యమంత్రి రెవంత్ (Revanth Reddy) ప్రకటించారు. అయితే ఈ కార్యక్రమం వెనుక కేవలం హామీ అమలు మాత్రమే కాకుండా రాజకీయ వ్యూహం కూడా దాగి ఉందనే విమర్శలు వినిపిస్తున్నాయి.
ఆంధ్రప్రదేశ్లో టీడీపీ (TDP) మహానాడు (Mahanadu) వేడుకలు జరుగుతున్న సమయంలోనే తెలంగాణలో ఎన్టీఆర్ విగ్రహాన్ని ఘనంగా ఆవిష్కరించడం యాదృచ్ఛికం కాదని తెలంగాణ వాదులు అభిప్రాయపడుతున్నారు. తెలంగాణలో మళ్లీ టీడీపీకి రాజకీయ స్థలం కల్పించేందుకు తెరవెనుక ప్రయత్నాలు జరుగుతున్నాయా అనే అనుమానాలను వారు వ్యక్తం చేస్తున్నారు. ముఖ్యంగా తెలంగాణ ప్రత్యేక రాష్ట్ర ఉద్యమం తర్వాత ఏర్పడిన రాజకీయ భావజాలాన్ని మళ్లీ ఉమ్మడి రాష్ట్ర భావోద్వేగాల వైపు మళ్లించే ప్రయత్నంగా ఈ విగ్రహాల రాజకీయాన్ని వారు విశ్లేషిస్తున్నారు.
ఇటీవల లక్డీకాపూల్లో మాజీ ముఖ్యమంత్రి రోశయ్య విగ్రహం (K.Rosaiah Statue), రవీంద్రభారతి సమీపంలో ఎస్పీ బాలసుబ్రమణ్యం విగ్రహం (SP Balasubrahmanyam Statue), ఇప్పుడు మైత్రీవనం వద్ద ఎన్టీఆర్ విగ్రహం వరుసగా ఆవిష్కరణ కావడం వెనుక ఒక దీర్ఘకాలిక వ్యూహం ఉందని తెలంగాణ ఉద్యమ వర్గాలు ఆరోపిస్తున్నాయి. ఉమ్మడి రాష్ట్ర కాలం జ్ఞాపకాలను మళ్లీ బలపరచడం ద్వారా తెలంగాణ ప్రత్యేకతను క్రమంగా నీరుగార్చే ప్రయత్నమిదని వారు భావిస్తున్నారు.
ఈ వివాదాల నడుమ తెలంగాణ సిద్ధాంతకర్త (Telangana Ideologue) ప్రొఫెసర్ కొత్తపల్లి జయశంకర్ (Professor Kothapalli Jayashankar) విగ్రహాన్ని ఆంధ్రప్రదేశ్ రాజధాని అమరావతి (Amaravati) ప్రాంతంలో ఏర్పాటు చేయాలని తెలంగాణ యంగ్ థింకర్స్ ఫోరమ్ కన్వీనర్ రోహిత్ వక్రాల (Rohith Vakral) డిమాండ్ చేయడం కొత్త చర్చకు దారితీసింది. ఈ మేరకు ఆంధ్రప్రదేశ్ ముఖ్యమంత్రి నారా చంద్రబాబు నాయుడుకు (Nara Chandrababu Naidu) లేఖ రాసారు. తెలంగాణ ఏర్పడిన తర్వాత కూడా తెలంగాణలో పలువురు ఆంధ్ర నాయకుల విగ్రహాలు ఏర్పాటు చేస్తున్న నేపథ్యంలో, అమరావతి రాజధాని ప్రాంత అభివృద్ధి ప్రాధికార సంస్థ పరిధిలో జయశంకర్ సార్ విగ్రహానికి స్థలం కేటాయించాలని కోరడం ఇప్పుడు రాజకీయంగా ఆసక్తికరంగా మారింది.
ఇప్పుడు అందరి దృష్టి ఆంధ్రప్రదేశ్ ప్రభుత్వ నిర్ణయంపైనే నిలిచింది. తెలంగాణ ఆత్మగౌరవానికి ప్రతీకగా భావించే జయశంకర్ సార్ విగ్రహానికి అమరావతిలో స్థలం కేటాయిస్తారా? లేక ఈ డిమాండ్ కూడా రాజకీయ వాదోపవాదాలకే పరిమితమవుతుందా? అన్నది వేచిచూడాల్సి ఉంది.
