ఆంధ్రప్రదేశ్ (Andhra Pradesh)రాష్ట్ర విద్య, ఐటీ, ఎలక్ట్రానిక్స్ శాఖల మంత్రి నారా లోకేష్(Nara Lokesh) రష్యా పర్యటనలో (Russia Tour) భాగంగా పలువురు ప్రముఖ ప్రతినిధులతో సమావేశాలు నిర్వహించడం రాజకీయ, పారిశ్రామిక వర్గాల్లో చర్చనీయాంశంగా మారింది. సెయింట్ పీటర్స్బర్గ్లో (Saint Petersburg) మాస్కో రవాణా మంత్రి, వైస్ మేయర్ మాక్సిమ్ లిక్సుటోవ్తో (Maxim Liksutov) భేటీ అయిన లోకేష్, భారతదేశంలోని మెట్రోపాలిటన్ నగరాల్లో మాస్కో తరహా ఏఐ ఆధారిత ట్రాన్సిట్ ట్రాకింగ్, స్మార్ట్ ట్రాఫిక్ మేనేజ్మెంట్ సాఫ్ట్వేర్ అమలుకు సహకారం అందించాలని కోరినట్లు సమాచారం.
అలాగే రస్ కెమ్ గ్రూప్ డిప్యూటీ సీఈఓ ఇల్యా కోసిహ్ (Ilya Kosikh), ఇంటర్నేషనల్ బిజినెస్ హెడ్ దర్యా అషానియాలతో (Darya Ashaniya) జరిగిన సమావేశంలో విశాఖ–కాకినాడ పీసీపీఐఆర్ పరిధిలో అత్యాధునిక పెట్రోకెమికల్ ప్రాసెసింగ్ ప్లాంట్ ఏర్పాటు అవకాశాలపై చర్చించినట్లు తెలుస్తోంది. భారత్ దిగుమతి చేసుకునే పెట్రోకెమికల్, స్పెషాలిటీ కెమికల్స్ ఫీడ్స్టాక్ను అత్యాధునిక సాంకేతికతతో ప్రాసెస్ చేసే కేంద్రంగా ఆ ప్రాంతాన్ని అభివృద్ధి చేయాలన్న ప్రతిపాదనను మంత్రి ముందుంచినట్లు సమాచారం.
అయితే ఈ పరిణామాల నేపథ్యంలో గత అనుభవాలను గుర్తు చేస్తూ పలువురు సందేహాలు వ్యక్తం చేస్తున్నారు. 2016లో చంద్రబాబు నాయుడు రష్యా పర్యటన సందర్భంగా కూడా అనేక రష్యన్ సంస్థలు ఆంధ్రప్రదేశ్లో పెట్టుబడులు పెట్టనున్నట్లు పెద్దఎత్తున ప్రచారం జరిగింది. కానీ దాదాపు పదేళ్లు గడిచినా ఆ ప్రకటనల్లో చెప్పిన సంస్థల పెట్టుబడులు రాష్ట్రంలో కార్యరూపం దాల్చిన ఉదాహరణలు కనిపించలేదని విమర్శకులు పేర్కొంటున్నారు.
ముఖ్యంగా ఈ పదేళ్ల కాలంలో చంద్రబాబు ఐదేళ్లు ముఖ్యమంత్రిగా ఉన్నప్పటికీ, అప్పట్లో ప్రకటించిన ప్రాజెక్టుల పురోగతి కనిపించలేదనే అభిప్రాయం వ్యక్తమవుతోంది. ఈ నేపథ్యంలో ప్రస్తుతం లోకేష్ చేస్తున్న రష్యా పర్యటన ద్వారా కోరుతున్న పెట్టుబడులు, పారిశ్రామిక భాగస్వామ్యాలు నిజంగా రాష్ట్రానికి వస్తాయా అనే ప్రశ్న రాజకీయ వర్గాల్లో వినిపిస్తోంది.
దావోస్ పర్యటనలు (Davos Visits) సహా గతంలో విదేశీ పెట్టుబడుల విషయంలో ప్రభుత్వం ప్రకటించిన అనేక ఒప్పందాలు ఆశించిన స్థాయిలో ఫలితాలు ఇవ్వలేదనే విమర్శలు కూడా ఉన్నాయి. అందువల్ల రష్యా పర్యటనలో జరిగిన చర్చలు కేవలం వార్తలకే పరిమితమవుతాయా, లేక వాస్తవ పెట్టుబడులుగా మారి రాష్ట్ర పారిశ్రామిక అభివృద్ధికి దోహదపడతాయా అన్నది రాబోయే రోజుల్లో తేలనుంది. ఈ పర్యటన ఫలితాలపై ఇప్పుడు రాజకీయ, పారిశ్రామిక వర్గాల దృష్టి కేంద్రీకృతమైంది.
