నారా లోకేష్‌ డీఎస్సీ పోస్టులు డబ్బులకు అమ్మేశారు.. సీబీఐ విచారణ జరిపించాలని అంబటి డిమాండ్!

గుంటూరులో (Guntur) మెగా డీఎస్సీ నియామకాల (Mega DSC Recruitments) వ్యవహారం మరోసారి రాజకీయంగా హాట్ టాపిక్‌గా మారింది. మాజీ మంత్రి, వైసీపీ(YSRCP) సీనియర్ నేత అంబటి రాంబాబు (Ambati Rambabu) మెగా డీఎస్సీ నియామకాలపై తీవ్ర ఆరోపణలు చేశారు. మొత్తం 441 పోస్టుల భర్తీలో భారీ అక్రమాలు జరిగాయని ఆరోపిస్తూ, పూర్తి స్థాయి దర్యాప్తు చేపట్టాలని డిమాండ్ చేశారు. ఈ మేరకు వైసీపీ నేతలతో కలిసి గుంటూరు జాయింట్ కలెక్టర్‌కు (Guntur Joint Collector) వినతిపత్రం సమర్పించారు. డీఎస్సీ నియామకాల విషయంలో రాష్ట్ర ప్రభుత్వం ముందుగానే ప్రణాళికాబద్ధంగా వ్యవహరించిందని విమర్శించారు.

విద్యాశాఖ మంత్రి నారా లోకేష్(Nara Lokesh) అక్రమాలకు (Illegal Activities) పాల్పడ్డారని అంబటి రాంబాబు తీవ్ర ఆరోపణలు చేశారు. ముఖ్యంగా స్పోర్ట్స్ కోటా ఉద్యోగాలను (Sports Quota Jobs) తనకు అనుకూలంగా ఉన్న వారికి కేటాయించారని, కొన్ని పోస్టులను డబ్బులు తీసుకుని అమ్ముకున్నారని అన్నారు. స్పోర్ట్స్ కోటా నిబంధనలను కూడా కొందరికి లబ్ధి చేకూరేలా మార్చారని ఆరోపించారు. పరీక్ష నిర్వహణకు ముందు అమల్లో ఉన్న జీవోను(GO) రద్దు చేసి కొత్త జీవో తీసుకువచ్చి, నియామకాలు పూర్తయ్యాక మళ్లీ పాత జీవోను పునరుద్ధరించారని పేర్కొన్నారు. దీనిపై ప్రభుత్వం ప్రజలకు సమాధానం చెప్పాలని డిమాండ్ చేశారు.

సాధారణంగా స్పోర్ట్స్ కోటాలో 2 శాతం రిజర్వేషన్ (Reservation) ఉండాల్సి ఉండగా దానిని 3 శాతానికి పెంచారని అంబటి తెలిపారు. అంతేకాకుండా స్పోర్ట్స్ కోటా అభ్యర్థులు డీఎస్సీ పరీక్ష రాయాల్సిన అవసరం లేకుండా జీవోలో మార్పులు చేశారని ఆరోపించారు. ఈ మార్పుల వల్ల పలువురు అభ్యర్థులు నష్టపోయారని, నవీన్(Naveen) అనే అభ్యర్థి ఉద్యోగం కోల్పోయి కోర్టును ఆశ్రయించాల్సిన పరిస్థితి వచ్చిందన్నారు. ఈ మొత్తం వ్యవహారంపై సీబీఐతో విచారణ (CBI Investigation) జరిపించాలని, నైతిక బాధ్యత వహిస్తూ విద్యాశాఖ మంత్రి నారా లోకేష్(Nara Lokesh) వెంటనే రాజీనామా (Resignation) చేయాలని డిమాండ్ చేశారు.

అసలు సమస్యను పక్కదారి పట్టించేందుకు ప్రభుత్వం చర్చల పేరుతో కాలయాపన చేస్తోందని అంబటి మండిపడ్డారు. పరీక్షకు ముందు ఒక జీవో, నియామకాల తర్వాత మరో జీవో అమలు చేయడం వెనుక అసలు ఉద్దేశం ఏమిటో ప్రభుత్వం ప్రజలకు స్పష్టం చేయాలని అన్నారు. ఈ వ్యవహారంపై పారదర్శక దర్యాప్తు జరిగితే అన్ని నిజాలు బయటపడతాయని వ్యాఖ్యానించారు.

ఎన్నికల సమయంలో కూటమి ప్రభుత్వం ప్రతి ఏడాది 4 లక్షల ఉద్యోగాలు ఇస్తామని హామీ ఇచ్చిందని అంబటి గుర్తు చేశారు. కానీ అధికారంలోకి వచ్చి 2 సంవత్సరాలు గడిచినా నిరుద్యోగులకు తగిన ఉద్యోగాలు ఇవ్వలేదని ఆరోపించారు. నిరుద్యోగ భృతి కూడా అమలు చేయకుండా యువతను మోసం చేశారని విమర్శించారు. మెగా డీఎస్సీ నియామకాలపై సమగ్ర విచారణ జరిపి బాధ్యులపై చర్యలు తీసుకోవాలని ప్రభుత్వాన్ని డిమాండ్ చేశారు.