దాడుల పరంపర ఆగేదెప్పుడు? కూటమి ప్రభుత్వంలో నిజంగా ‘రూల్ ఆఫ్ లా’ ఉందా?

ఆంధ్రప్రదేశ్‌లో(Andhra Pradesh) కూటమి ప్రభుత్వం (Coalition Government) అధికారంలోకి వచ్చినప్పటి నుంచి రాష్ట్ర రాజకీయాల్లో హింసాత్మక ఘటనలు వరుసగా చోటుచేసుకుంటున్నాయనే విమర్శలు వినిపిస్తున్నాయి. ముఖ్యంగా వైఎస్సార్‌సీపీ(YSRCP) నాయకులు, మాజీ మంత్రులు, పార్టీ కార్యాలయాలు లక్ష్యంగా దాడులు (Attacks) జరుగుతున్నాయని ప్రతిపక్షం ఆరోపిస్తోంది. మాజీ మంత్రుల నివాసాలపై దాడులు, గృహదహనాలు, పార్టీ కార్యాలయాలపై దాడులు రాష్ట్రంలో శాంతిభద్రతల పరిస్థితిపై తీవ్ర చర్చకు దారి తీశాయి.

‘రెడ్‌బుక్'(Red Book) రాజకీయాల పేరుతో ప్రారంభమైన పాలనలో రోడ్లపై దాడులు, ఘర్షణలు, రాజకీయ ఉద్రిక్తతలు పెరిగాయని విమర్శలు వ్యక్తమవుతున్నాయి. ఒకవైపు ముఖ్యమంత్రి చంద్రబాబు నాయుడు(Nara Chandra Babu Naidu), ఉప ముఖ్యమంత్రి పవన్ కళ్యాణ్(Pawan Kalyan) వైఎస్సార్‌సీపీపై తీవ్ర విమర్శలు చేస్తుండగా, మరోవైపు క్షేత్రస్థాయిలో మాత్రం దాడులకు గురవుతున్నవారు ఎక్కువగా వైఎస్సార్‌సీపీ నాయకులేనని జరుగుతున్న ఘటనలు చెబుతున్నాయి.

తాజాగా పోరంకిలో జరిగిన ఘటన మరోసారి రాష్ట్ర రాజకీయాలను వేడెక్కించింది. పెనమలూరు వైఎస్సార్‌సీపీ ఇన్‌చార్జి దేవభక్తుని చక్రవర్తి (Devabhaktuni Chakravarthy) నందివాడ పోలీస్ స్టేషన్ నుంచి విజయవాడకు వస్తుండగా, పోరంకి వద్ద టీడీపీ(TDP) నాయకులు ఆయన వాహనాన్ని అడ్డుకున్నారు. ఈ సందర్భంగా పోలీసులు ప్రేక్షకపాత్ర పోషించారనే ఆరోపణలు వచ్చాయి. అనంతరం చక్రవర్తిని అదుపులోకి తీసుకున్న పోలీసుల వాహనంపై కూడా దాడి జరిగిందని, తీవ్ర ఉద్రిక్త పరిస్థితులు నెలకొన్నాయని సమాచారం.

గత రెండేళ్లలో వైఎస్సార్‌సీపీ(YSRCP) నాయకులపై జరిగిన దాడుల ఘటనల్లో అంబటి రాంబాబు, జోగి రమేష్, వల్లభనేని వంశీ, కొడాలి నాని, పెర్ని నాని, ముద్రగడ పద్మనాభం, నల్లపురెడ్డి ప్రసన్నకుమార్ రెడ్డి, కామిరెడ్డి నాని, కేతిరెడ్డి పెద్దారెడ్డి, అబ్బయ్ చౌదరి, భూమన కరుణాకర్ రెడ్డి, దాడిశెట్టి రాజా, ఉప్పల హారిక, ఉప్పల రాము, దేవినేని అవినాష్, రెడ్డప్ప, మార్గాని భరత్, విడదల రజనీ, ఎమ్మెల్సీ రమేష్ యాదవ్, తదితరులపై దాడులు చోటుచేసుకున్నాయని ప్రతిపక్షం పేర్కొంటోంది. హిందూపురం వైఎస్సార్‌సీపీ కార్యాలయంపై కూడా దాడి జరిగిన తీరు రాష్ట్రంలో శాంతి భద్రతలపై పలు ప్రశ్నలు లేవనెత్తింది.

అదేవిధంగా మీడియా సంస్థలు కూడా లక్ష్యంగా మారాయని విమర్శలు ఉన్నాయి. డెక్కన్ క్రానికల్ కార్యాలయం, సాక్షి కార్యాలయాలు, ప్రజాశక్తి పత్రికకు చెందిన జర్నలిస్టులపై దాడులు జరిగిన ఘటనలను ప్రతిపక్షం ఉదాహరణగా చూపిస్తోంది.ఈ పరిణామాల నేపథ్యంలో ఆంధ్రప్రదేశ్‌లో ప్రస్తుతం రూల్ ఆఫ్ లా సమర్థంగా అమలవుతోందా? అనే ప్రశ్నలు ప్రజాస్వామ్య వర్గాల్లో చర్చనీయాంశంగా మారుతున్నాయి.