ఆంధ్రప్రదేశ్ విద్యా వ్యవస్థలో ఆందోళనకర అంశాలు!

ఆంధ్రప్రదేశ్‌లో (Andhra Pradesh) ప్రభుత్వ పాఠశాలల (Government Schools) విద్యార్థుల నమోదు (Student Enrollment) గణనీయంగా తగ్గిపోతుండటం విద్యారంగంలో తీవ్ర చర్చకు దారితీస్తోంది. గత కొన్నేళ్లతో పోలిస్తే 2024-25 విద్యా సంవత్సరంలో ప్రభుత్వ పాఠశాలల్లో విద్యార్థుల సంఖ్య భారీగా పడిపోవడం విద్యావేత్తలు(Education Experts), తల్లిదండ్రులు మరియు హక్కుల సంఘాల్లో ఆందోళన కలిగిస్తోంది.

కేంద్ర విద్యాశాఖ గణాంకాల ప్రకారం, 6 నుంచి 14 ఏళ్ల వయస్సు గల విద్యార్థుల ప్రభుత్వ పాఠశాలల నమోదు శాతం 2022లో 70.8 శాతంగా ఉండగా, 2024 నాటికి అది 61.8 శాతానికి పడిపోయింది. ఈ తగ్గుదలకు పలు కారణాలు ఉన్నప్పటికీ, పేద కుటుంబాలకు కీలకంగా భావించిన ‘అమ్మఒడి’(Amma Vodi) వంటి పథకాల ప్రభావం తగ్గడం కూడా ఒక కారణంగా పలువురు అభిప్రాయపడుతున్నారు.

అదేవిధంగా, 2022-23లో 1 నుంచి 8వ తరగతి వరకు ప్రభుత్వ పాఠశాలల్లో 31,71,466 మంది విద్యార్థులు ఉండగా, 2024-25 నాటికి ఆ సంఖ్య 26,15,935కు తగ్గింది. అంటే దాదాపు 5.5 లక్షల మంది విద్యార్థులు ప్రభుత్వ పాఠశాలల నుంచి తగ్గిపోయినట్లు గణాంకాలు సూచిస్తున్నాయి. రాష్ట్రంలోని సుమారు 4,750 పాఠశాలల్లో ఒక్క విద్యార్థి కూడా మొదటి తరగతిలో చేరకపోవడం పరిస్థితి తీవ్రతను తెలియజేస్తోంది.

ప్రభుత్వం మెగా పేరెంట్-టీచర్ సమావేశాలు(Mega Parent-Teacher Meetings – PTMs), డిజిటల్ ట్రాకింగ్ (Digital Tracking) వంటి కార్యక్రమాలను చేపడుతున్నప్పటికీ, ప్రభుత్వ పాఠశాలలపై తల్లిదండ్రుల విశ్వాసం తగ్గుతోందనే విమర్శలు వినిపిస్తున్నాయి. గణాంకాల ప్రకారం లక్షలాది మంది విద్యార్థులు ప్రైవేట్ విద్యాసంస్థల వైపు మొగ్గు చూపినట్లు తెలుస్తోంది.

ఇక జూనియర్ కాలేజీల పరిస్థితి కూడా ఆందోళనకరంగానే కనిపిస్తోంది. ప్రభుత్వ జూనియర్ కాలేజీల్లో (Junior Colleges) మొదటి సంవత్సరం అడ్మిషన్లు గత ఏడాది 1,27,270 ఉండగా, ఈ ఏడాది 99,323కు పడిపోయాయి. విద్యార్థుల సంఖ్య తగ్గుదలను ప్రభుత్వం డేటా లేదా ఆధార్ ధృవీకరణ ప్రక్రియల ఫలితంగా పేర్కొంటున్నప్పటికీ, తల్లిదండ్రుల సంఘాలు మాత్రం దీనిపై పూర్తి స్థాయి వివరణ కోరుతున్నాయి.

గత ఏడాది స్కూళ్లు, జూనియర్ కాలేజీలలో కలిపి 2.66 లక్షల మంది విద్యార్థుల నమోదు తగ్గిందని గణాంకాలు సూచిస్తున్న నేపథ్యంలో, ఈ విద్యార్థులు ఎక్కడికి వెళ్లారు? డ్రాప్‌ఔట్ అయ్యారా? లేక ఇతర విద్యాసంస్థల్లో చేరారా? అనే ప్రశ్నలకు స్పష్టమైన సమాధానం ఇవ్వాలని తల్లిదండ్రుల సంఘాలు ప్రభుత్వాన్ని కోరుతున్నాయి. ఈ నేపథ్యంలో డ్రాప్‌ఔట్ విద్యార్థులపై శ్వేతపత్రం విడుదల చేయాలనే డిమాండ్ కూడా బలపడుతోంది.

జాతీయ గణాంక కార్యాలయం నివేదిక ప్రకారం, 66.4 శాతం అక్షరాస్యతతో ఆంధ్రప్రదేశ్ దేశంలోనే అత్యల్ప అక్షరాస్యత కలిగిన రాష్ట్రాల్లో ఒకటిగా నిలిచింది. ఈ పరిస్థితుల్లో విద్యార్థులు ప్రభుత్వ పాఠశాలలకు దూరమవుతున్న అంశాన్ని ప్రభుత్వం అత్యంత ప్రాధాన్యంతో తీసుకుని, చదువు మానేసిన విద్యార్థులను గుర్తించి తిరిగి విద్యా వ్యవస్థలోకి తీసుకురావడానికి తక్షణ చర్యలు చేపట్టాల్సిన అవసరం ఉందని విద్యారంగ నిపుణులు సూచిస్తున్నారు.