హైదరాబాద్కు చెందిన మాజీ భారత క్రికెటర్ వీవీఎస్ లక్ష్మణ్కు (VVS Laxman) బీసీసీఐ (BCCI) కీలక బాధ్యతలు అప్పగించేందుకు సిద్ధమవుతున్నట్లు తెలుస్తోంది. ఇప్పటివరకు లక్ష్మణ్కు టీమిండియా (Team India) ప్రధాన కోచ్ లేదా సెలెక్టర్ పదవి దక్కే అవకాశం ఉందనే ప్రచారం జరిగింది. అయితే తాజాగా అందుతున్న సమాచారం ప్రకారం.. వీటన్నింటికంటే కీలకమైన పదవిని ఆయనకు అప్పగించే యోచనలో బీసీసీఐ ఉన్నట్లు వార్తలు వస్తున్నాయి.
బీసీసీఐలో కీలకమైన డైరెక్టర్ ఆఫ్ క్రికెట్ (Director of Cricket) పదవికి వీవీఎస్ లక్ష్మణ్ పేరును పరిశీలిస్తున్నట్లు సమాచారం. ఈ అంశంపై జాతీయ మీడియాలోనూ కథనాలు వెలువడుతున్నాయి. అయితే లక్ష్మణ్ నియామకంపై బీసీసీఐ నుంచి ఇంకా అధికారిక ప్రకటన రావాల్సి ఉంది.
డైరెక్టర్ ఆఫ్ క్రికెట్ పదవి అంటే ఏమిటి?
డైరెక్టర్ ఆఫ్ క్రికెట్ (Director of Cricket) బాధ్యతలు చేపట్టే వ్యక్తి భారత క్రికెట్ వ్యవస్థలో కీలక పాత్ర పోషిస్తారు. టీమిండియా సీనియర్, జూనియర్ జట్లతో పాటు సెలెక్టర్లు, కోచింగ్ సిబ్బంది, సెంటర్ ఆఫ్ ఎక్సలెన్స్ మధ్య సమన్వయం చేయడం ఈ పదవిలో ప్రధాన బాధ్యతగా ఉంటుంది.
అలాగే దేశవ్యాప్తంగా క్రికెట్ అభివృద్ధికి సంబంధించిన ప్రణాళికలు, భవిష్యత్ వ్యూహాలను రూపొందించడం, వాటి అమలును పర్యవేక్షించడం వంటి కీలక బాధ్యతలు కూడా ఉండే అవకాశం ఉంది. ఈ నేపథ్యంలో లక్ష్మణ్ ఈ పదవిని చేపడితే టీమిండియా ప్రధాన కోచ్ గౌతమ్ గంభీర్తో (Gautam Gambhir) కలిసి పలు కీలక నిర్ణయాల్లో ఆయన పాత్ర మరింత పెరగనుంది.
గతంలో రవిశాస్త్రి కూడా టీమిండియాకు డైరెక్టర్గా పనిచేశారు. అయితే లక్ష్మణ్కు అప్పగించబోయే బాధ్యతలు మరింత విస్తృతంగా ఉండే అవకాశం ఉందని తెలుస్తోంది. ఈ నియామకంపై త్వరలోనే బీసీసీఐ అధికారికంగా స్పష్టత ఇచ్చే అవకాశం ఉందని సమాచారం.
