అత్తను తల్లిలా భావించి గౌరవించాలని పెద్దలు ఎప్పటి నుంచో చెబుతుంటారు. పెళ్లి తర్వాత అత్తామామలనే తల్లిదండ్రులుగా భావిస్తూ కుటుంబాన్ని ముందుకు నడిపించాలని సూచిస్తుంటారు. అయినప్పటికీ అత్తా కోడళ్ల మధ్య చిన్న చిన్న మనస్పర్థలు చోటుచేసుకోవడం సహజమే. కొన్ని సందర్భాల్లో అవి మాటల యుద్ధానికి దారితీస్తే, మరికొన్ని సందర్భాల్లో తిరిగి సఖ్యత నెలకొంటుంది. అయితే అనంతపురం జిల్లాలో జరిగిన ఓ ఘటన మాత్రం అందరినీ ఆశ్చర్యానికి గురిచేసింది.
అత్త వేధింపులు భరించలేకపోతున్నానంటూ ఓ కోడలు నేరుగా దేవుడికే మొరపెట్టుకుంది. అంతేకాదు, తన అత్త త్వరగా చనిపోయేలా చేయాలని కోరుతూ రూ.20 నోటుపై సందేశం రాసి ఆలయ హుండీలో వేయడం ఇప్పుడు సోషల్ మీడియాలో తీవ్ర చర్చకు దారితీసింది.
ఈ ఘటన అనంతపురం జిల్లా ఆత్మకూరు మండలంలోని పంపనూరు సుబ్రహ్మణ్యేశ్వర స్వామి ఆలయంలో జరిగింది. ఆలయ హుండీలోని కానుకలను లెక్కిస్తున్న సమయంలో పూజారికి ఒక రూ.20 నోటుపై ఏదో రాసి ఉన్నట్లు కనిపించింది. ఆసక్తిగా పరిశీలించగా అందులో “స్వామీ… మా అత్త వేధింపులు తట్టుకోలేకపోతున్నా… ఆమె త్వరగా చనిపోయేలా చూడు” అని రాసి ఉండటంతో పూజారి ఒక్కసారిగా షాక్కు గురయ్యాడు.
ఈ విషయం ఆలయ సిబ్బంది ద్వారా బయటకు రావడంతో ఆ నోటు ఫోటో సోషల్ మీడియాలో వైరల్గా మారింది. దీనిపై నెటిజన్లు భిన్నంగా స్పందిస్తున్నారు. కుటుంబ సమస్యలను ఇలాంటి విధంగా దేవుడి ముందు వ్యక్తం చేయడం సరైంది కాదని కొందరు అభిప్రాయపడుతుండగా, మరికొందరు అత్త వేధింపులు ఎంత తీవ్రంగా ఉంటే ఇలాంటి పరిస్థితి వచ్చిందో ఆలోచించాలని వ్యాఖ్యానిస్తున్నారు.
ప్రస్తుతం ఈ రూ.20 నోటు సోషల్ మీడియాలో విస్తృతంగా చక్కర్లు కొడుతూ ఆసక్తికర చర్చకు దారితీసింది. అత్తా కోడళ్ల మధ్య విభేదాలు మరోసారి హాట్ టాపిక్గా మారాయి.
