ప్రముఖ సంగీత దర్శకుడు దేవిశ్రీ ప్రసాద్ (Devi Sri Prasad) ఇప్పుడు హీరోగానూ ప్రేక్షకుల ముందుకు రాబోతున్న సంగతి తెలిసిందే. ‘బలగం’ ఫేం వేణు యెల్దండి (Venu Yeldandi) దర్శకత్వంలో తెరకెక్కుతున్న ‘ఎల్లమ్మ’ (Yellamma) సినిమాతో ఆయన నటుడిగా కొత్త ప్రయాణాన్ని ప్రారంభించాడు. ప్రముఖ నిర్మాత దిల్రాజు (Dil Raju) ఈ చిత్రాన్ని పాన్ ఇండియా స్థాయిలో నిర్మిస్తున్నారు. ఇప్పటికే విడుదలైన టైటిల్ గ్లింప్స్కు మంచి స్పందన రావడంతో సినిమాపై ఆసక్తి మరింత పెరిగింది.
తాజాగా మూవీ టీమ్ విడుదల చేసిన స్పెషల్ వీడియో ప్రేక్షకులను ఆకట్టుకుంటోంది. ఈ వీడియోలో దేవిశ్రీ ప్రసాద్ తన సొంతూరు వెదురుపాకలో (Vedurupaka) జరిగే అమ్మవారి జాతర విశేషాలను భావోద్వేగంగా పంచుకున్నాడు. చెన్నైలో పెరిగినా కూడా తండ్రిగారి ఊరు వెదురుపాకకు తరచూ వచ్చేవాడినని గుర్తు చేసుకున్నాడు. తమ మూలాలను ఎప్పటికీ మర్చిపోకూడదనే ఉద్దేశంతో అక్కడ ఒక అందమైన ఇల్లు కూడా నిర్మించుకున్నట్లు తెలిపాడు.
తూర్పుగోదావరి జిల్లా వెదురుపాక గ్రామ సంస్కృతి (Culture), అక్కడి జానపద కళలు తనను ఎంతగానో ఆకట్టుకున్నాయని దేవిశ్రీ వివరించాడు. అదే కారణంగా ‘ఎల్లమ్మ’ కథ విన్న వెంటనే ఒప్పుకున్నానని చెప్పాడు. గ్రామీణ జీవితానికి అద్దం పట్టేలా ఈ సినిమా ఉండబోతుందనే సంకేతాలు ఈ వీడియో ద్వారా కనిపించాయి.
వీడియోలో పోలేరమ్మ, ఎల్లమ్మ జాతర సందడి ప్రత్యేక ఆకర్షణగా నిలిచింది. శివసత్తుల పూనకాలు, సంప్రదాయ పులి వేషాలు, డప్పుల మోతతో ఊరంతా కళకళలాడిన దృశ్యాలు ఆకట్టుకున్నాయి. గ్రామస్తులతో కలిసి దేవిశ్రీ ఎంతో ఆప్యాయంగా మెలుగుతూ డ్యాన్స్ చేయడం అభిమానులను మరింత ఫిదా చేసింది.
గ్రామీణ సంస్కృతి, జానపద సంప్రదాయాలు, భావోద్వేగాల మేళవింపుగా తెరకెక్కుతున్న ‘ఎల్లమ్మ’ సినిమాపై ఈ స్పెషల్ వీడియోతో అంచనాలు మరింత పెరిగాయి.
