తెలంగాణ రాష్ట్ర (Telangana State) ఏర్పాటుపై బీజేపీ ఎంపీ (BJP MP) తేజస్వి సూర్య (Tejasvi Surya) చేసిన వ్యాఖ్యలు రాజకీయ వర్గాల్లో దుమారం రేపుతున్నాయి. తెలంగాణ ఏర్పాటును పాకిస్థాన్ (Pakistan) ఆవిర్భావంతో పోల్చిన వ్యాఖ్యలను బీఆర్ఎస్(BRS) పార్టీ తీవ్రంగా ఖండించింది. ఈ నేపథ్యంలో పార్టీ కీలక నేత హరీష్ రావు (Harish Rao) ఘాటుగా స్పందించారు.
4 కోట్ల తెలంగాణ ప్రజల ఆత్మగౌరవాన్ని దెబ్బతీశారని విమర్శ
సోషల్ మీడియా వేదికగా స్పందించిన హరీష్ రావు, పార్లమెంట్ వంటి గౌరవప్రదమైన వేదికపై ఒక బాధ్యతాయుత ఎంపీ ఇలాంటి వ్యాఖ్యలు చేయడం సరైంది కాదన్నారు. ఇది 4 కోట్ల తెలంగాణ ప్రజల ఆత్మగౌరవాన్ని దెబ్బతీయడమేనని మండిపడ్డారు.
తెలంగాణ (Telangana) ఏర్పాటును దేశ విభజనతో పోల్చడం చారిత్రక తప్పిదమే కాకుండా ప్రజల మనోభావాలను గాయపరచడమేనన్నారు. భారత సమాఖ్య స్ఫూర్తిపై బీజేపీకి(BJP) ఉన్న అవగాహనలేమిని ఈ వ్యాఖ్యలు బయటపెడుతున్నాయని పేర్కొన్నారు.
త్యాగాలను కించపరచొద్దని హెచ్చరిక
దశాబ్దాల పాటు సాగిన ప్రజాస్వామ్య పోరాటం, విద్యార్థులు, యువకులు, అమరుల త్యాగాల ఫలితంగానే తెలంగాణ సాధ్యమైందని హరీష్ రావు గుర్తు చేశారు. రాజ్యాంగబద్ధంగా, శాంతియుత మార్గంలో సాధించుకున్న రాష్ట్రాన్ని రక్తపాతం జరిగిన విభజనతో పోల్చడం దారుణమన్నారు.
2014లో తెలంగాణ ఏర్పాటు ప్రజా ఆకాంక్షలకు ప్రతిరూపమని, దానిని తక్కువ చేసి మాట్లాడటం ప్రాంతీయ ఉద్యమాలపై ఉన్న చులకన భావానికి నిదర్శనమని విమర్శించారు.
తెలంగాణ గౌరవాన్ని కించపరిచిన తేజస్వి సూర్య, బీజేపీ వెంటనే అదే పార్లమెంట్లో తెలంగాణ ప్రజలకు బేషరతుగా క్షమాపణ చెప్పాలని హరీష్ రావు డిమాండ్ చేశారు. తెలంగాణ చరిత్రను, గౌరవాన్ని కాపాడేందుకు బీఆర్ఎస్ ఎప్పుడూ ముందుంటుందని స్పష్టం చేశారు.
