తెలంగాణ జల హక్కులను కాపాడాల్సిన రాష్ట్ర ప్రభుత్వం వాటిని పక్క రాష్ట్రాలకు తాకట్టు పెడుతోందని మాజీ మంత్రి హరీశ్ రావు తీవ్ర ఆరోపణలు చేశారు. తుంగభద్ర నదిపై కర్ణాటక చేపడుతున్న అక్రమ ప్రాజెక్టులను వెంటనే అడ్డుకోవాలని కోరుతూ ముఖ్యమంత్రి రేవంత్ రెడ్డికి బహిరంగ లేఖ రాశారు. రాజోలిబండ డైవర్షన్ స్కీమ్, తుమ్మిళ్ల ఎత్తిపోతల పథకం, భీమా ప్రాజెక్టుల ప్రయోజనాలను పరిరక్షించాలని ఆయన డిమాండ్ చేశారు.
సమైక్య రాష్ట్రంలో తెలంగాణకు జరిగిన అతిపెద్ద అన్యాయాల్లో జలాల పంపిణీ కూడా ఒకటేనని హరీశ్ రావు పేర్కొన్నారు. కృష్ణా, గోదావరి జలాల్లో తెలంగాణకు రావాల్సిన వాటా దశాబ్దాల పాటు ఇతర ప్రాంతాలకు మళ్లించడంతో లక్షల ఎకరాలు సాగుకు దూరమయ్యాయని గుర్తు చేశారు. తెలంగాణ ఏర్పడిన తర్వాత బీఆర్ఎస్ ప్రభుత్వం కృష్ణా, గోదావరి జలాలను తెలంగాణకు మళ్లించి పాలమూరు వంటి జిల్లాల్లో సాగునీటి పరిస్థితిని మెరుగుపరిచిందన్నారు.
ప్రస్తుతం కాంగ్రెస్ ప్రభుత్వం అదే జల హక్కులను నిర్లక్ష్యం చేస్తోందని ఆయన విమర్శించారు. గోదావరి జలాలను ఆంధ్రప్రదేశ్కు మళ్లించే ప్రయత్నాలకు సహకరించిన ప్రభుత్వం, ఇప్పుడు తుంగభద్రపై కర్ణాటక చేపడుతున్న అక్రమ నిర్మాణాల విషయంలో కూడా మౌనం పాటిస్తోందని మండిపడ్డారు.
పాలమూరు రైతుల భవిష్యత్తును ప్రమాదంలోకి నెట్టేలా ప్రభుత్వం వ్యవహరిస్తోందని హరీశ్ రావు ఆరోపించారు. కేంద్ర జల సంఘం, కృష్ణా రివర్ మేనేజ్మెంట్ బోర్డు, తెలంగాణ, ఆంధ్రప్రదేశ్ అనుమతులు లేకుండానే కర్ణాటక ప్రాజెక్టులు నిర్మిస్తున్నా ప్రభుత్వం ఎందుకు స్పందించడం లేదని ప్రశ్నించారు. ఈ వ్యవహారంలో ఏవైనా రహస్య ఒప్పందాలు ఉన్నాయా అని కూడా నిలదీశారు.
ప్రభుత్వం వెంటనే 4 కీలక చర్యలు చేపట్టాలని హరీశ్ రావు డిమాండ్ చేశారు. కర్ణాటక అక్రమ ప్రాజెక్టులను అడ్డుకోవడం, కేంద్ర జల సంఘం సహా సంబంధిత సంస్థలకు అధికారిక అభ్యంతరాలు తెలియజేయడం, అవసరమైతే సుప్రీంకోర్టును ఆశ్రయించడం, అలాగే కొడంగల్ ఎత్తిపోతల పథకం కోసం తెలంగాణ జల హక్కులను బేరసారాల అంశంగా మార్చలేదని ప్రజలకు స్పష్టత ఇవ్వాలని కోరారు.
కొడంగల్ ఎత్తిపోతల పథకానికి కర్ణాటక అనుమతి తెచ్చే పేరుతో తెలంగాణ జల హక్కులను తాకట్టు పెట్టారా అని ప్రశ్నించిన హరీశ్ రావు, కురిడి, చిక్కాలపర్వి, చిక్కాలమంచి ప్రాంతాల్లో నిర్మిస్తున్న బ్రిడ్జ్ కమ్ బ్యారేజీలకు రాష్ట్ర ప్రభుత్వం అంగీకారం తెలిపిందా అని నిలదీశారు. ఏడాదికిపైగా అక్రమ నిర్మాణాలు కొనసాగుతున్నా తెలంగాణ ప్రభుత్వం ఒక్క అధికారిక అభ్యంతరం కూడా వ్యక్తం చేయకపోవడం వెనుక కారణమేంటని ప్రశ్నించారు.
రాజోలిబండ డైవర్షన్ స్కీమ్ ఎగువన నిర్మిస్తున్న ప్రాజెక్టులు పూర్తయితే ఆర్డీఎస్కు వచ్చే నీటి ప్రవాహాలు భారీగా తగ్గిపోతాయని ఆయన హెచ్చరించారు. ఇప్పటికే కర్ణాటకకు కేటాయించిన 1.2 టీఎంసీలకు బదులుగా సగటున 5 టీఎంసీల వరకు నీటిని వినియోగిస్తున్నట్లు గణాంకాలు చెబుతున్నాయని పేర్కొన్నారు. కొత్త ప్రాజెక్టులు పూర్తయితే ఆర్డీఎస్, తుమ్మిళ్ల, భీమా ప్రాజెక్టులతో పాటు పాలమూరు రైతాంగం తీవ్రంగా నష్టపోతుందని అన్నారు.
పాలమూరు రంగారెడ్డి ప్రాజెక్టును ఉద్దేశ్యపూర్వకంగానే ప్రభుత్వం పక్కనబెట్టిందని హరీశ్ రావు ఆరోపించారు. కొడంగల్ ఎత్తిపోతల పథకం పేరుతో భీమా ప్రాజెక్టుకు కేటాయించిన జలాలను మళ్లించడం వల్ల 2 లక్షల ఎకరాలకు సాగునీరు అందించే అవకాశం దెబ్బతిందని విమర్శించారు.
తుంగభద్రపై కర్ణాటక చేపడుతున్న అక్రమ ప్రాజెక్టుల ప్రభావం కేవలం ఆర్డీఎస్కే పరిమితం కాదని, శ్రీశైలం జలాశయానికి వచ్చే ప్రవాహాలు తగ్గితే కల్వకుర్తి, పాలమూరు రంగారెడ్డి వంటి ప్రధాన సాగునీటి ప్రాజెక్టులతో పాటు తాగునీటి అవసరాలపై కూడా తీవ్ర ప్రభావం పడుతుందని ఆయన హెచ్చరించారు.
తెలంగాణకు హక్కుగా రావాల్సిన ప్రతి నీటి చుక్కను కాపాడటం ప్రభుత్వ రాజ్యాంగబద్ధమైన బాధ్యత అని హరీశ్ రావు స్పష్టం చేశారు. రాష్ట్ర ప్రయోజనాలను దెబ్బతీసే ప్రతి నిర్ణయాన్ని బీఆర్ఎస్ తీవ్రంగా వ్యతిరేకిస్తుందని, తెలంగాణ జల హక్కులు, పాలమూరు రైతుల ప్రయోజనాల కోసం పోరాటం కొనసాగిస్తామని తన లేఖలో పేర్కొన్నారు.
