రైతుల (Farmers) ప్రయోజనాలను దృష్టిలో పెట్టుకుని కాళేశ్వరం ప్రాజెక్టు మోటార్లను (Kaleshwaram Project Motors) వెంటనే ఆన్ చేసి నీటిని పంపింగ్ (Water Pumping) చేయాలని మాజీ మంత్రి హరీశ్ రావు (Harish Rao) డిమాండ్ చేశారు. ఈ మేరకు మంత్రి ఉత్తమ్ కుమార్ రెడ్డికి(Uttam Kumar Reddy) ఆయన బహిరంగ లేఖ రాశారు. కాళేశ్వరం ప్రాజెక్టులో భాగమైన మిడ్ మానేరు (Mid Manair) నుంచి నీటిని ఎత్తిపోసి, ప్రాజెక్టు పరిధిలోని రిజర్వాయర్లను నింపాలని కోరారు.
వర్షాభావ పరిస్థితులు, ఎల్ నినో ప్రభావంతో (El Niño Effect) రైతులు (Farmers) తీవ్ర ఆందోళనలో ఉన్నారని హరీశ్ రావు పేర్కొన్నారు. రిజర్వాయర్లలో నీటిని సకాలంలో నింపకపోవడంతో పంటల సాగు (Crop Cultivation) ముందుకు సాగడం లేదని, రైతులు ఇబ్బందులు ఎదుర్కొంటున్నారని తెలిపారు. రాజకీయాలకు అతీతంగా రైతుల ప్రయోజనాల కోసం తక్షణమే నీటి పంపింగ్ ప్రారంభించాలని డిమాండ్ చేశారు.
ప్రతి నీటి చుక్కను ఒడిసి పట్టాలి
ఎగువ ప్రాంతాల్లో ఇటీవల కురిసిన వర్షాలతో వచ్చే వరద నీటిని వృథా కాకుండా ఒడిసి పట్టాలని (Conserve) హరీశ్ రావు సూచించారు. అందుబాటులో ఉన్న నీటిని సద్వినియోగం చేసుకునేందుకు కాళేశ్వరం ప్రాజెక్టు పంపులను సకాలంలో ఆన్ చేసి నీటి పంపింగ్ ప్రారంభించాలని కోరారు.
మిడ్ మానేరు రిజర్వాయర్ (Mid Manair Reservoir) పూర్తి నీటి సామర్థ్యం 27 టీఎంసీలు కాగా, ప్రస్తుతం సుమారు 22 టీఎంసీల నీటి లభ్యత ఉందని హరీశ్ రావు తెలిపారు. ఎగువ ప్రాంతాల్లో కురుస్తున్న భారీ వర్షాల కారణంగా గోదావరిలో కూడా వరద నీటి లభ్యత పెరిగే అవకాశం ఉందన్నారు. ఈ పరిస్థితులను దృష్టిలో ఉంచుకుని మిడ్ మానేరు నుంచి మోటార్లను ఆన్ చేసి నీటిని పంపింగ్ చేయాలని కోరారు.
మిడ్ మానేరు నుంచి నీటిని పంపింగ్ చేయడం ద్వారా కాళేశ్వరం ప్రాజెక్టులో భాగమైన అన్నపూర్ణ, రంగనాయక సాగర్, మల్లన్న సాగర్, కొండపోచమ్మ సాగర్, నృసింహ తదితర రిజర్వాయర్లను నింపాలని హరీశ్ రావు సూచించారు. వాటి పరిధిలోని చెరువులు, చెక్ డ్యామ్లను కూడా నీటితో నింపి సుమారు 4 లక్షల ఎకరాలకు సాగునీరు అందించేలా చర్యలు చేపట్టాలని కోరారు.
యాసంగి పంటను దృష్టిలో ఉంచుకోవాలి
రైతుల సాగు ప్రయోజనాలను దృష్టిలో పెట్టుకుని ఏమాత్రం ఆలస్యం చేయకుండా నీటి పంపింగ్ చేపట్టాలని హరీశ్ రావు డిమాండ్ చేశారు. మిడ్ మానేరు నుంచి లోయర్ మానేరును నింపి, ఎస్సారెస్పీ (SRSP) రెండో దశ ఆయకట్టుకు నీరు అందించి రైతులను ఆదుకోవాలని కోరారు.
గత యాసంగి పంట సమయంలో కాళేశ్వరం ప్రాజెక్టులోని ఎగువ రిజర్వాయర్ల ఆయకట్టు పరిధిలో సుమారు 4 లక్షల ఎకరాల్లో సాగు జరిగిందని హరీశ్ రావు గుర్తు చేశారు. ఈ విషయాన్ని దృష్టిలో ఉంచుకుని ప్రస్తుత వానాకాలం పంటతో పాటు వచ్చే యాసంగి పంటకు కూడా సాగునీరు అందేలా కాళేశ్వరం ప్రాజెక్టులోని అన్ని రిజర్వాయర్లను సకాలంలో నింపేందుకు చర్యలు తీసుకోవాలని కోరారు.
కోమటిరెడ్డి రాజగోపాల్ రెడ్డి వ్యాఖ్యలకు కేటీఆర్ మద్దతు.. కాంగ్రెస్ ప్రభుత్వంపై తీవ్ర విమర్శలు..!