రేవంత్ పాలనపై హరీశ్ రావు ఫైర్.. “ముఖ్యమంత్రిగా, హోంమంత్రిగా పూర్తిగా ఫెయిల్!”

తెలంగాణలో (Telangana) శాంతిభద్రతలు పూర్తిగా దిగజారిపోయాయని మాజీ మంత్రి, బీఆర్ఎస్ డిప్యూటీ ఫ్లోర్ లీడర్ హరీశ్ రావు (Harish Rao) తీవ్ర స్థాయిలో మండిపడ్డారు. ముఖ్యమంత్రిగా, హోంమంత్రిగా రేవంత్ రెడ్డి (Revanth Reddy) పూర్తిగా విఫలమయ్యారని ఆయన ఆరోపించారు. తాజా ఎన్‌సీఆర్‌బీ (NCRB) గణాంకాలు రాష్ట్రంలో నేరాల భయానక పరిస్థితిని బట్టబయలు చేస్తున్నాయని పేర్కొన్నారు.

నేరాల గణాంకాలు ఆందోళన కలిగిస్తున్నాయన్న హరీశ్ రావు, 2024లో తెలంగాణలో 27,230 సైబర్ నేరాలు (Cyber Crimes) నమోదయ్యాయని తెలిపారు. 2023తో పోలిస్తే ఇవి దాదాపు 49 శాతం పెరిగాయని చెప్పారు. హైదరాబాద్ (Hyderabad) దేశంలోనే అత్యధిక సైబర్ నేరాలు నమోదవుతున్న నగరాల్లో ఒకటిగా మారిందని ఆందోళన వ్యక్తం చేశారు. రాష్ట్రంలో 25,500 మిస్సింగ్ కేసులు (Missing Cases) నమోదవగా, వారిలో వేలాది మందికి ఇప్పటికీ ఆచూకీ దొరకలేదన్నారు.

చిన్నారులు, మహిళల భద్రతపై తీవ్ర ఆందోళన

ప్రతి రోజు సగటున ఆరుగురు చిన్నారులు అదృశ్యమవుతున్నారని హరీశ్ రావు పేర్కొన్నారు. 2024లో చిన్నారులపై 6,767 కేసులు నమోదయ్యాయని తెలిపారు. మహిళలపై నేరాలు కూడా గణనీయంగా పెరిగాయని, 2022లో 22,066 కేసులు ఉండగా 2024 నాటికి అవి 24,495కు చేరాయని చెప్పారు. మానవ అక్రమ రవాణా కేసుల్లో తెలంగాణ దేశంలోనే అగ్రస్థానంలో ఉండటం పోలీస్ వ్యవస్థ వైఫల్యానికి నిదర్శనమని విమర్శించారు.

పోలీస్ వ్యవస్థ పనితీరుపై ప్రశ్నలు

కరీంనగర్‌లో (Karimnagar) పట్టపగలు జరిగిన నగల దుకాణం దోపిడీ కేసులో నిందితులను ఇప్పటికీ పట్టుకోలేకపోవడం ప్రభుత్వ వైఫల్యమని హరీశ్ రావు అన్నారు. ఎమ్మెల్యే క్యాంపు కార్యాలయాలపై దాడులు, ఐఏఎస్ క్వార్టర్స్‌లో (IAS Quarters) ఐపీఎస్ అధికారిణి (IPS Officer) భార్య (Wife) హత్య(Murder) వంటి ఘటనలు రాష్ట్రంలో భద్రతా పరిస్థితి ఎంత దారుణంగా ఉందో చెబుతున్నాయన్నారు. సీపీ సుమతి నిర్వహించిన ఆపరేషన్‌తో హైదరాబాద్‌లో మహిళల భద్రత ఎంత బలహీనంగా మారిందో బయటపడిందన్నారు.

ప్రచారంపైనే దృష్టి.. ప్రజల భద్రతపై నిర్లక్ష్యం

ప్రభుత్వం కేవలం సమీక్షా సమావేశాలు నిర్వహించడం కాకుండా క్షేత్రస్థాయిలో భద్రతపై దృష్టి పెట్టాలని హరీశ్ రావు సూచించారు. కాంగ్రెస్ ప్రభుత్వం ప్రచారం, రాజకీయ కక్షసాధింపు, మీడియా మేనేజ్‌మెంట్‌పైనే దృష్టి పెట్టి ప్రజల భద్రతను పూర్తిగా నిర్లక్ష్యం చేస్తోందని ఆరోపించారు. తెలంగాణలో క్షీణిస్తున్న శాంతిభద్రతలపై ప్రభుత్వం వెంటనే బాధ్యత వహించాలని డిమాండ్ చేశారు. ప్రజల భద్రతను రాజకీయ ప్రయోజనాల కోసం బలి చేయొద్దని హెచ్చరించారు.