భారత అంతరిక్ష పరిశోధనా సంస్థ ఇస్రో (Indian Space Research Organisation – ISRO) ప్రైవేటీకరణ (Privatisation) దిశగా వెళ్లడం లేదని సంస్థ చైర్మన్ డాక్టర్ వి. నారాయణన్ (Dr. V. Narayanan) స్పష్టం చేశారు. భారత అంతరిక్ష రంగంలో ప్రైవేట్ కంపెనీల భాగస్వామ్యం (Private Companies Participation) పెరుగుతున్న నేపథ్యంలో ఇస్రో ఉద్యోగుల్లో నెలకొన్న ఆందోళనలను పరిష్కరిస్తామని ఆయన హామీ ఇచ్చారు. బెంగళూరు స్పేస్ ఎక్స్‌పోలో (Bengaluru Space Expo) పాల్గొన్న నారాయణన్ ఈ విషయంపై స్పష్టత ఇచ్చారు.
అంతరిక్ష రంగంలో సంస్కరణలు 6 ఏళ్ల క్రితమే ప్రారంభమయ్యాయని నారాయణన్ తెలిపారు. ప్రైవేట్ రంగానికి సరైన మార్గనిర్దేశం చేయడంతో పాటు భారత అంతరిక్ష వ్యవస్థను మరింత విస్తరించడమే ఈ సంస్కరణల ప్రధాన ఉద్దేశమని వివరించారు. అంతరిక్ష పరిశ్రమలో ప్రైవేట్ రంగం కొత్తగా ప్రవేశించినది కాదని, రాకెట్ల తయారీతో(Rocket Manufacturing) పాటు వివిధ కార్యకలాపాల్లో ఇప్పటికే వందలాది భారతీయ కంపెనీలు ఇస్రోతో కలిసి పనిచేస్తున్నాయని చెప్పారు.
పీఎస్‌ఎల్‌వీ(PSLV), జీఎస్‌ఎల్‌వీ(GSLV) ప్రయోగాల సమయంలో మొత్తం పనిని ఇస్రో ఒక్కటే చేస్తుందని భావించకూడదని నారాయణన్ పేర్కొన్నారు. ఇస్రోకు సంబంధించిన సుమారు 80 శాతం బడ్జెట్ పెట్టుబడులు భారతీయ పరిశ్రమల (Indian Industries) నుంచే వస్తున్నాయని తెలిపారు. ప్రస్తుతం దాదాపు 450 పరిశ్రమలు ఇస్రోతో కలిసి పనిచేస్తున్నాయని వెల్లడించారు.
భారతదేశానికి (India) ప్రతి ఏడాది సుమారు 50 ప్రయోగ వాహనాల అవసరం ఉంటుందని ఇస్రో చైర్మన్ తెలిపారు. ఇంత భారీ స్థాయిలో రాకెట్ల అవసరాలను తీర్చాలంటే ఇస్రోతో పాటు బలమైన పారిశ్రామిక వ్యవస్థ కూడా అవసరమని వివరించారు.
ఇస్రోలో ప్రస్తుతం సుమారు 20 వేల మంది ఉద్యోగులు పనిచేస్తున్నారని నారాయణన్ తెలిపారు. ఉద్యోగుల్లో నెలకొన్న ఆందోళనలను పరిష్కరించేందుకు చర్యలు తీసుకుంటామని హామీ ఇచ్చారు. ప్రైవేట్ రంగ భాగస్వామ్యాన్ని పెంచడం వల్ల ఇస్రో పాత్ర తగ్గిపోదని ఆయన స్పష్టం చేశారు.
