ఓటర్ల జాబితా ప్రత్యేక సవరణ (SIR)పై దేశవ్యాప్తంగా రాజకీయ వివాదం కొనసాగుతున్న నేపథ్యంలో వైఎస్సార్ కాంగ్రెస్ పార్టీ(YSRCP) అధ్యక్షుడు వైఎస్ జగన్‌మోహన్‌రెడ్డి (YS Jagan Mohan Reddy) కీలక ప్రతిపాదన చేశారు. ప్రధాన ఎన్నికల కమిషనర్ (CEC)తో పాటు ఇతర ఎన్నికల కమిషనర్ల నియామక ప్రక్రియలో మార్పులు తీసుకురావాలని ఆయన కేంద్ర ప్రభుత్వాన్ని కోరారు. ప్రధానమంత్రి, లోక్‌సభ ప్రతిపక్ష నేత, భారత ప్రధాన న్యాయమూర్తి (CJI)తో కూడిన ముగ్గురు సభ్యుల కమిటీ ద్వారా ఎన్నికల కమిషనర్లను నియమించే విధానాన్ని తిరిగి తీసుకురావాలని సూచించారు.
ప్రస్తుతం అమల్లో ఉన్న 2023 చట్టం ప్రకారం ఎన్నికల కమిషనర్ల ఎంపిక కమిటీలో ప్రధానమంత్రి, కేంద్ర కేబినెట్ మంత్రి, లోక్‌సభ ప్రతిపక్ష నేత సభ్యులుగా ఉంటారు. గతంలో సుప్రీంకోర్టు సూచించిన విధానంలో ప్రధానమంత్రి, CJI, లోక్‌సభ ప్రతిపక్ష నేత సభ్యులుగా ఉండేవారు.
SIR ప్రక్రియపై ప్రతిపక్ష పార్టీలు, పౌరసంఘాలు తీవ్ర అభ్యంతరాలు వ్యక్తం చేస్తున్నాయి. ఇండియన్ ఎక్స్‌ప్రెస్ (The Indian Express) నివేదిక ప్రకారం, 2025 జూన్ నుంచి 2026 సెప్టెంబర్ వరకు ఎన్నికల కమిషనర్లు సుఖ్‌బీర్ సింగ్ సంధు, వివేక్ జోషి పలు నిర్ణయాలపై కనీసం 14 సార్లు అభ్యంతరాలు వ్యక్తం చేశారు. అదే సమయంలో SIRలో 13 కోట్లకు పైగా పేర్లు డ్రాఫ్ట్ ఓటర్ల జాబితాల నుంచి తొలగించబడ్డాయని ఆ నివేదిక పేర్కొంది. అయితే ఎన్నికల సంఘం మాత్రం SIR చట్టబద్ధ ప్రక్రియలో భాగమేనని, తొలగింపుల్లో డూప్లికేట్, మరణించిన లేదా వలస వెళ్లిన ఓటర్ల పేర్లు ఉన్నాయని చెబుతోంది.
ఇదే అంశంపై అక్టోబర్ 6న ఢిల్లీలో కాంగ్రెస్ నేతృత్వంలోని INDIA కూటమి నేతలు సీఈసీ జ్ఞానేష్ కుమార్ రాజీనామా(CEC Gyanesh Kumar), SIRను ఉపసంహరించుకోవాలని డిమాండ్ చేస్తూ నిరసన చేపట్టారు. నిరసనలో పలువురు ప్రతిపక్ష నేతలను పోలీసులు అదుపులోకి తీసుకున్నారు.
ఈ నేపథ్యంలో ఎన్నికల కమిషన్ నియామక ప్రక్రియలో మరింత పారదర్శకత తీసుకురావడం ద్వారా ప్రజల్లో ఎన్నికల వ్యవస్థపై విశ్వాసాన్ని పునరుద్ధరించవచ్చని జగన్(YS Jagan) అభిప్రాయపడ్డారు. ముగ్గురు సభ్యుల కమిటీలో CJIని తిరిగి చేర్చేలా 2023 చట్టానికి సవరణ తీసుకురావాలని ఆయన కోరారు.
