ఆంధ్రప్రదేశ్‌లో (Andhra Pradesh) త్వరలో జరగనున్న స్థానిక సంస్థల ఎన్నికలకు (Local Body Elections) సంబంధించి ఎన్నికల నోటిఫికేషన్ జారీ చేయకముందే అఖిలపక్ష సమావేశాన్ని నిర్వహించాలని వైఎస్సార్ కాంగ్రెస్ పార్టీ (YSRCP) రాష్ట్ర ఎన్నికల సంఘాన్ని కోరింది. ఎన్నికల ప్రక్రియపై (Election Process) రాజకీయ పార్టీలకు, అభ్యర్థులకు, ఓటర్లకు స్పష్టత కల్పించడంతో పాటు స్వేచ్ఛాయుత, నిష్పక్షపాత, పారదర్శక ఎన్నికల నిర్వహణకు ఈ సమావేశం అవసరమని పేర్కొంది.
స్థానిక సంస్థల ఎన్నికల సన్నాహక చర్యలు, ఎన్నికల విధానాలు, వార్డు పునర్విభజన, ఓటర్ల జాబితాలు (Voter Lists) తదితర అంశాలపై రాజకీయ పార్టీలకు ఒకే విధమైన సమాచారం అందాల్సిన అవసరం ఉందని వైఎస్సార్‌సీపీ తెలిపింది. ముఖ్యంగా అవసరమైన కుల, కమ్యూనిటీ ధ్రువీకరణ పత్రాలు(Community Certificates), నో-డ్యూస్/ఎన్‌ఓసీ సర్టిఫికెట్ల (NOC Certificates) జారీకి రాష్ట్రవ్యాప్తంగా సర్వర్ సమస్యలను కారణంగా చూపుతూ ఏర్పడుతున్న ఇబ్బందులను పరిశీలించాలని కోరింది. ఈ వ్యవహారంలో సీనియర్ జీఎస్‌డబ్ల్యూఎస్ (GSWS) అధికారుల పాత్రపై నిష్పక్షపాత విచారణ జరిపి, జిల్లా అధికారులకు తక్షణ ఆదేశాలు ఇవ్వాలని విజ్ఞప్తి చేసింది.
వార్డు పునర్విభజన ప్రక్రియను రాష్ట్రవ్యాప్తంగా సమీక్షించి, తుది నిర్ణయం తీసుకునే ముందు అవసరమైన సవరణలు చేయాలని వైఎస్సార్‌సీపీ కోరింది. అలాగే ఎన్నికల సమయంలో జోక్యం, బెదిరింపులు, అధికార యంత్రాంగం దుర్వినియోగంపై ఉన్న ఆందోళనల నేపథ్యంలో కేంద్ర సాయుధ పోలీసు బలగాలను (CAPF) మోహరించడంపై పరిశీలన చేయాలని పేర్కొంది.
మున్సిపల్ ఎన్నికలకు (Municipal Elections) సంబంధించి వార్డు వారీగా ఓటర్ల జాబితాలను ప్రత్యేక సమగ్ర సవరణ ప్రక్రియ పూర్తయి, తుది ఓటర్ల జాబితాలు ప్రచురించిన తర్వాతే సిద్ధం చేయాలని వైఎస్సార్‌సీపీ(YSRCP) కోరింది. ఈ అంశంలో న్యాయస్థానాల ఆదేశాలు వర్తించే మేరకు వాటిని పాటించాలని పేర్కొంది.
అదే విధంగా స్థానాల రిజర్వేషన్లు, రొటేషన్ విధానం, ఎన్నికల షెడ్యూల్, దశల వారీగా ఎన్నికల నిర్వహణ, నామినేషన్లు, పరిశీలన ప్రక్రియ, మేయర్లు, చైర్‌పర్సన్ల ఎన్నిక విధానం, పోలింగ్ ఏర్పాట్లు, ఎన్నికల ప్రవర్తనా నియమావళి అమలు, అధికారుల తటస్థత, పోలింగ్-కౌంటింగ్ సమయంలో భద్రత, ఫిర్యాదులపై నిర్ణీత గడువులో పరిష్కారం వంటి అంశాలపై ఎస్‌ఈసీ స్పష్టత ఇవ్వాలని కోరింది.
ప్రతి అర్హత కలిగిన అభ్యర్థికి సమాన అవకాశాలు కల్పించడం, ప్రతి అర్హత కలిగిన ఓటరు తన ఓటు హక్కును వినియోగించుకునేలా చూడటం, ఎన్నికల సంఘం నిష్పక్షపాతంపై ప్రజల్లో విశ్వాసాన్ని పెంపొందించడం కోసం అన్ని రాజకీయ పార్టీలతో సంప్రదింపులు అవసరమని వైఎస్సార్‌సీపీ పేర్కొంది.
అందువల్ల ఎన్నికల నోటిఫికేషన్ జారీకి ముందే, చట్టపరమైన మరియు న్యాయపరమైన గడువులను పరిగణనలోకి తీసుకుని వీలైనంత త్వరగా అఖిలపక్ష సమావేశాన్ని నిర్వహించాలని వైఎస్సార్‌సీపీ ఎస్‌ఈసీని కోరింది. సంబంధిత సీనియర్ అధికారులను సమావేశానికి ఆహ్వానించడంతో పాటు, ముందుగానే అజెండాను అన్ని పార్టీలకు పంపించి, సమావేశం అనంతరం రాతపూర్వక స్పష్టీకరణలు, ఏకరీతి మార్గదర్శకాలను జారీ చేయాలని విజ్ఞప్తి చేసింది.
