గుంటూరు జిల్లా ఉండవల్లిలో రైతులు, రైతు పరిరక్షణ కమిటీ నేతలపై టీడీపీ నేతలు దాడికి పాల్పడిన ఘటన రాజకీయంగా తీవ్ర చర్చనీయాంశమైంది. రైతు పరిరక్షణ కమిటీ నేతలు ప్రయాణిస్తున్న కారుపై టీడీపీ కార్యకర్తలు రాళ్లు, కర్రలతో దాడి చేయడంతో కారు అద్దాలు ధ్వంసమయ్యాయి. ఈ ఘటనపై ప్రతిపక్ష నాయకుడు వైఎస్ జగన్మోహన్రెడ్డి తీవ్రంగా స్పందిస్తూ కూటమి ప్రభుత్వ తీరును తప్పుబట్టారు.
సోషల్ మీడియా వేదికగా స్పందించిన జగన్, “చంద్రబాబు గారూ… మీరు ప్రభుత్వాన్ని నడుపుతున్నారా? లేక గూండాల రాజ్యాన్ని నడుపుతున్నారా?” అంటూ ప్రశ్నించారు. రాజధాని రైతుల ఆహ్వానం మేరకు సీఆర్డీఏ పరిరక్షణ కమిటీతో కలిసి వెళ్తున్న వైఎస్సార్సీపీ మాజీ మంత్రులు, ఎమ్మెల్సీలపై దాడులు చేయించడం ప్రజాస్వామ్యాన్ని ఖూనీ చేయడమేనని విమర్శించారు.
అమరావతి పేరుతో జరుగుతున్న అవినీతి, దోపిడీ, రైతులపై దౌర్జన్యాలు బయటకు రాకుండా అడ్డుకునేందుకే ఈ దాడులు జరిగాయని జగన్ ఆరోపించారు. పోలీసులు భద్రత కల్పించాల్సింది పోయి దాడులకు సహకరిస్తున్నారని, కొందరు పోలీసు అధికారులు స్వయంగా ఈ దాడిని సమన్వయం చేశారని తీవ్ర ఆరోపణలు చేశారు.
భూములు ఇవ్వని రైతులను భూసేకరణ నోటీసుల పేరుతో వేధిస్తున్నారని, వారి పొలాలకు వెళ్లే మార్గాలను ధ్వంసం చేస్తున్నారని జగన్ పేర్కొన్నారు. రైతుల పొలాల్లో అక్రమంగా మట్టి తవ్వడం, కొండవీటి వాగు నీటిని బలవంతంగా వారి భూముల్లోకి మళ్లించడం, రైతుల అనుమతి లేకుండానే రిటర్నబుల్ ప్లాట్ల పేరుతో రిజిస్ట్రేషన్లు చేయించడం వంటి చర్యలతో వారిని తీవ్ర ఇబ్బందులకు గురిచేస్తున్నారని ఆరోపించారు.
ఇలాంటి పరిస్థితుల్లో బాధిత రైతులను పరామర్శించి వారికి భరోసా ఇవ్వడానికి వెళ్తే తమ నాయకులపై దాడులు చేయించడం దారుణమని జగన్ అన్నారు. ఇప్పటికే అమరావతి పేరుతో వేలాది ఎకరాలు సేకరించిన ప్రభుత్వం ఇంకా భూములు ఎందుకు కావాలనుకుంటోందని ప్రశ్నించారు. ఈ భూములు బినామీలు, అధికార పార్టీ నాయకుల కోసం సేకరిస్తున్నారా అనే రైతుల ప్రశ్నలకు ముఖ్యమంత్రి చంద్రబాబు సమాధానం చెప్పాలని డిమాండ్ చేశారు.
రాష్ట్రంలో జంగిల్ రాజ్యాన్ని నెలకొల్పారని, అధికార దుర్వినియోగంతో పోలీసులను అడ్డుపెట్టుకుని పచ్చముఠాలతో స్వైరవిహారం చేయిస్తున్నారని జగన్ ఆరోపించారు. ప్రజా గొంతుకలను అణచివేస్తూ ప్రజాస్వామ్యాన్ని ఖూనీ చేస్తున్నారని విమర్శించారు. ఈ తరహా చర్యలపై ఇప్పటికే పలుమార్లు హెచ్చరించినా ప్రభుత్వం తన వైఖరిని మార్చుకోలేదని, రోజురోజుకూ దుర్మార్గాలు పెరుగుతున్నాయని అన్నారు.
చివరగా, ప్రభుత్వం ప్రారంభించిన ఈ దుష్ట సంప్రదాయానికి ప్రజల నుంచి తగిన ప్రతిస్పందన తప్పదని జగన్ హెచ్చరించారు. ప్రజలు ఈ ప్రభుత్వాన్ని క్షమించరని, కూటమి ప్రభుత్వాన్ని ప్రజలే కూకటివేళ్లతో పెకలిస్తారని వ్యాఖ్యానించారు. అమరావతి పేరుతో రైతులపై జరుగుతున్న అన్యాయాలు, అవినీతి, దోపిడీ, దౌర్జన్యాలను వైఎస్సార్సీపీ నిరంతరం ప్రజల ముందుకు తీసుకువస్తుందని, బాధిత రైతులకు తమ పార్టీ ఎల్లప్పుడూ అండగా నిలుస్తుందని స్పష్టం చేశారు.
