ఆంధ్రప్రదేశ్లో భూ వివాదాలు మరోసారి రాజకీయ రంగు పులుముకుంటున్నాయి. కాకినాడ జిల్లాలో చోటుచేసుకున్న ఈ ఘటన ప్రస్తుతం తీవ్ర చర్చకు దారి తీస్తోంది. వరుసకు సోదరి అయిన మహిళ భూమిని కబ్జా చేసేందుకు జనసేన నేత, డీసీసీబీ చైర్మన్ తుమ్మల బాబు ప్రయత్నాలు చేస్తున్నారనే ఆరోపణలు వెలుగులోకి వచ్చాయి.
యర్రవరంలో సుమారు రూ.50 లక్షల విలువైన 94 సెంట్ల భూమి విషయంలో అమలకంటి తులసీ కిరణ్మయి తీవ్ర ఇబ్బందులు ఎదుర్కొంటున్నట్లు తెలిపారు. భర్త అనారోగ్యాన్ని ఆసరాగా తీసుకుని భూమి వ్యవహారాన్ని తాను చూసుకుంటానని నమ్మించి, ఆస్తిపై పూర్తి ఆధిపత్యం చెలాయిస్తున్నారని ఆమె ఆరోపించారు. పాస్పుస్తకాలు తన పేరిట ఇవ్వకుండా అడ్డంకులు సృష్టిస్తున్నారని పేర్కొన్నారు.
స్థానిక అధికారుల నిర్లక్ష్యం కూడా ఈ వివాదాన్ని మరింత క్లిష్టం చేస్తోందని బాధితురాలు ఆవేదన వ్యక్తం చేశారు. తహసీల్దార్ కార్యాలయం నుంచి పట్టాదార్ పాస్పుస్తకం అందకపోవడంతో ఆమె కలెక్టరేట్లో ఫిర్యాదు చేయాల్సి వచ్చింది. తనకు న్యాయం చేయాలని ఆమె అధికారులను వేడుకుంది.
ఈ భూమి తమ తల్లిదండ్రులు పసుపు కుంకుమ మాన్యం కింద ఇచ్చినదని, ఎన్నేళ్లుగా తుమ్మల బాబు ఆధీనంలో ఉంచుకొని మానసిక వేధింపులకు గురిచేస్తున్నారని ఆమె వివరించారు. పంటల ఆదాయం కూడా ఇవ్వకుండా ఇబ్బందులకు గురి చేస్తున్నారని తెలిపారు. ఈ వివాదం కారణంగా తన కుటుంబం తీవ్ర సంక్షోభంలో పడిందని, తన భర్త కూడా ఇంటి నుంచి వెళ్లిపోయినట్లు ఆమె చెప్పడం పరిస్థితి తీవ్రతను తెలియజేస్తోంది.
ఇదే కాకుండా మరో ఆస్తి వివాదంలో కూడా తన కుటుంబ భూమిని కాజేయడానికి ప్రయత్నాలు జరుగుతున్నాయని ఆరోపణలు ఉన్నాయి. ఈ అంశాన్ని పార్టీ అధినేత దృష్టికి తీసుకెళ్లినప్పటికీ ఎలాంటి పరిష్కారం లభించలేదని బాధితురాలు వాపోయారు.
ఇటీవలి కాలంలో జనసేన నేతలపై భూ కబ్జా ఆరోపణలు పెరుగుతున్నాయని రాజకీయ వర్గాల్లో చర్చ సాగుతోంది. వివిధ ప్రాంతాల్లో ప్రభుత్వ, వ్యక్తిగత భూములపై అక్రమ ఆక్రమణలు జరుగుతున్నాయనే ఆరోపణలు వెలువడుతున్నాయి. ఈ ఘటనలు రాజకీయ వ్యవస్థపై ప్రశ్నలు లేవనెత్తుతున్నాయి.
ఈ ఆరోపణల నేపథ్యంలో నిజానిజాలు వెలికితీయాల్సిన అవసరం ఉందని, బాధితులకు న్యాయం చేయాల్సిన బాధ్యత అధికార యంత్రాంగంపై ఉందని ప్రజలు అభిప్రాయపడుతున్నారు.
