విశాఖపట్నం స్టీల్ ప్లాంట్లో (Visakhapatnam Steel Plant) జరిగిన ఘోర ప్రమాదం పారిశ్రామిక భద్రతా వ్యవస్థపై (Industrial Safety System) తీవ్ర ఆందోళనలను రేకెత్తించింది. ఈ ప్రమాదంలో తొమ్మిది మంది కార్మికులు (Workers) ప్రాణాలు కోల్పోగా, మరో తొమ్మిది మంది తీవ్రంగా గాయపడ్డారు. అయితే ప్రమాదం అనంతరం బాధితులను పరామర్శించేందుకు వచ్చిన మంత్రి నారా లోకేశ్ (Nara Lokesh) చేసిన వ్యాఖ్యలు ఇప్పుడు కొత్త వివాదానికి దారితీశాయి.
ప్రాథమిక సమాచారం ప్రకారం, ద్రవ ఉక్కు ప్రక్రియలో ఉపయోగించే కొన్ని ఎల్డీటీవీల నాణ్యత లోపాల (LDTVs Quality Defects) వల్ల జరిగిన రసాయనిక ప్రతిచర్యే పేలుడుకు కారణమై ఉండవచ్చని చెబుతున్నారు. ఈ నేపథ్యంలో ప్లాంట్ నిర్వహణ వైఫల్యాలపై కార్మిక సంఘాలు (Workers’ Unions) తీవ్ర ఆరోపణలు చేస్తున్నాయి. గత కొన్నేళ్లుగా అవసరమైన స్పేర్ పార్ట్స్ (Spare Parts) కొనుగోలు చేయకపోవడం, యంత్రాల నిర్వహణను నిర్లక్ష్యం చేయడం, అనుభవజ్ఞులైన ఉద్యోగులను ఇతర విభాగాలకు బదిలీ చేయడం వంటి అంశాలు ప్రమాదాలకు దారితీస్తున్నాయని వారు పేర్కొంటున్నారు.
అలాగే, సిబ్బంది కొరత కారణంగా కార్మికులపై పని భారం పెరిగిందని, కనీస సౌకర్యాలు కూడా అందుబాటులో లేకపోవడం వారి శారీరక, మానసిక సామర్థ్యాలపై ప్రభావం చూపుతోందని కార్మిక సంఘాలు ఆరోపిస్తున్నాయి. ఈ పరిస్థితుల్లో జరిగిన ప్రమాదంపై సమాధానాలు కోరిన కార్మికులతో మంత్రి లోకేశ్ వాగ్వాదానికి దిగినట్లు ప్రచారం జరుగుతోంది.
“స్టీల్ ప్లాంట్ను మేమే కాపాడాం” అనే లోకేష్ వ్యాఖ్యకు బదులుగా కార్మికులు “అందుకే ఇంతమంది చచ్చారా?” అని ప్రశ్నలు సంధించడంతో సహనం కోల్పోయిన లోకేష్ అత్యంత అమానవీయంగా “మీ కుటుంబ సభ్యులెవరూ చనిపోలేదు కదా?” అని వ్యాఖ్యానించడం కార్మికుల ఆగ్రహాన్ని కట్టలు తెంచుకునేలా చేసింది. బాధిత కుటుంబాలను ఓదార్చాల్సిన సమయంలో కార్మికుల భావోద్వేగాలను గౌరవించకుండా మాట్లాడారని కార్మిక సంఘాలు ఆరోపిస్తున్నాయి.
కేజీహెచ్ (KGH) వద్ద బాధిత కుటుంబాలను పరామర్శించే సమయంలో కూడా పరిహారం అంశంపై ప్రశ్నలు లేవనెత్తిన వామపక్ష నేతలపై మంత్రి అసహనం వ్యక్తం చేశారని విమర్శలు వినిపిస్తున్నాయి. మరోవైపు, కార్మికులను “ఘోస్ట్ ఎంప్లాయిస్”(Ghost Employees) లుగా చిత్రీకరించే ప్రయత్నాలు వారి సేవలను, త్యాగాలను అవమానించడమేనని పలువురు మేధావులు అభిప్రాయపడుతున్నారు.
విశాఖ ఉక్కు కర్మాగారం వేలాది కుటుంబాల జీవనాధారం. భద్రతా ప్రమాణాల అమలులో లోపాలు, నిర్వహణ సమస్యలు, ఉద్యోగుల కొరత వంటి అంశాలపై సమగ్ర విచారణ జరిపి బాధ్యులపై చర్యలు తీసుకోవాలని కార్మిక సంఘాలు డిమాండ్ చేస్తున్నాయి. అలాగే ప్రమాదంలో మరణించిన కార్మికుల కుటుంబాలకు తగిన పరిహారం, శాశ్వత ఉపాధి అవకాశాలు కల్పించాలని కోరుతున్నాయి.
