పశ్చిమ బెంగాల్ (West Bengal) ఎన్నికల (Elections) వేళ అధికార తృణమూల్ కాంగ్రెస్ (Trinamool Congress), ప్రతిపక్ష భారతీయ జనతా పార్టీ (Bharatiya Janata Party – BJP) మధ్య రాజకీయ పోరు మరింత వేడెక్కుతోంది. తాజాగా కేంద్ర హోం మంత్రి అమిత్ షా (Amit Shah) చేసిన వ్యాఖ్యలపై ముఖ్యమంత్రి మమతా బెనర్జీ (Mamata Banerjee) తీవ్ర ఆగ్రహం వ్యక్తం చేశారు. ఆయన వ్యాఖ్యలపై చట్టపరమైన చర్యలు తీసుకుంటామని స్పష్టం చేశారు.
అమిత్ షా వ్యాఖ్యలతో రాజకీయ దుమారం
ఎన్నికల ప్రచారంలో అమిత్ షా మాట్లాడుతూ తృణమూల్ కాంగ్రెస్ కార్యకర్తలు ఇకపై ప్రజలను బాంబులు, బుల్లెట్లతో భయపెట్టలేరని అన్నారు. బెంగాల్ ప్రజలు వారికి ఓట్లతో సమాధానం చెబుతారని పేర్కొన్నారు. మమతా ప్రభుత్వానికి వీడ్కోలు పలకాలని, ఆ తర్వాత తృణమూల్ కార్యకర్తలను తలకిందులుగా వేలాడదీసి దారికి తీసుకువస్తామని వ్యాఖ్యానించారు.
మొదటి విడత పోలింగ్కు ముందు కూడా అమిత్ షా మరోసారి స్పందిస్తూ ఏప్రిల్ 23న తృణమూల్ కార్యకర్తలు ఇళ్లలోనే ఉండాలని, లేకపోతే మే 4 తర్వాత ఒక్కొక్కరిని పట్టుకుని జైలుకు పంపిస్తామని హెచ్చరించారు.
మమతా ఘాటు స్పందన
ఈ వ్యాఖ్యలపై స్పందించిన మమతా బెనర్జీ, ఒక కేంద్ర హోం మంత్రి ఇలాంటి భాష వాడటం తగదని మండిపడ్డారు. ఎన్నికల తర్వాత ప్రజలను తలకిందులుగా వేలాడదీస్తామని చెప్పడం పూర్తిగా ఆమోదయోగ్యం కాదన్నారు. ఇలాంటి మనస్తత్వంతో బెంగాల్లో ఎప్పటికీ గెలవలేరని ఆమె వ్యాఖ్యానించారు.
పశ్చిమ బెంగాల్లో 2వ దశ పోలింగ్ (Second Phase Polling) ఏప్రిల్ 29న జరగనుండగా, మే 4న ఓట్ల లెక్కింపు (Vote Counting) జరగనుంది. దీంతో ఎన్నికల వేళ ఈ మాటల యుద్ధం మరింత ఉత్కంఠగా మారింది.
