ఆంధ్రప్రదేశ్ రాజకీయాల్లో మరోసారి ‘క్రెడిట్ చోరీ’ వివాదం చర్చనీయాంశంగా మారింది. ముఖ్యమంత్రి చంద్రబాబు తరహాలోనే, డిప్యూటీ సీఎం పవన్ కళ్యాణ్ అధ్యక్షుడిగా ఉన్న జనసేన నాయకత్వం కూడా గత వైఎస్సార్సీపీ ప్రభుత్వ హయాంలో ప్రారంభమైన పథకాలు, ప్రాజెక్టుల విజయాలను తమ ఖాతాలో వేసుకునేందుకు ప్రయత్నిస్తోందనే విమర్శలు వినిపిస్తున్నాయి.
ఇప్పటికే దాదాపు 25 ఏళ్లుగా పదోన్నతుల కోసం ఎదురు చూస్తున్న ఎంపీడీఓలకు నాటి ముఖ్యమంత్రి వైఎస్ జగన్మోహన్ రెడ్డి ప్రత్యేక చొరవతో పదోన్నతులు కల్పించారని, గ్రామ, వార్డు సచివాలయ వ్యవస్థను మరింత సమర్థవంతంగా నిర్వహించేందుకు పంచాయతీరాజ్ శాఖలో డివిజనల్ డెవలప్మెంట్ ఆఫీసర్ (డీఎల్డీఓ) పోస్టులను కూడా సృష్టించారని పేర్కొంటున్నారు. అయితే, ఆ పోస్టు పేరులోని ‘ఎల్’ అక్షరాన్ని తొలగించి డీడీఓగా మార్చి, వేలాది మందికి పదోన్నతులు కల్పించిన ఘనతను తమ ఖాతాలో వేసుకునేందుకు పవన్ కళ్యాణ్ ప్రయత్నించారనే ఆరోపణలు అప్పట్లో జనసేనపై వచ్చాయి.
ఇప్పుడు పులివెందుల మెగా వాటర్ గ్రిడ్ ప్రాజెక్టు విషయంలోనూ ఇదే తరహా వివాదం తెరపైకి వచ్చింది. ఏడు మండలాల్లోని సుమారు ఐదున్నర లక్షల మంది ప్రజల దాహార్తిని తీర్చే లక్ష్యంతో రూ.480 కోట్ల అంచనా వ్యయంతో జల్ జీవన్ మిషన్ కింద ఈ ప్రాజెక్టు ప్రారంభమైంది. 2021లోనే అప్పటి ముఖ్యమంత్రి వైఎస్ జగన్మోహన్ రెడ్డి ఈ ప్రాజెక్టుకు శంకుస్థాపన చేసి పనులు ప్రారంభించారు.
2024 ఎన్నికల సమయానికి ప్రాజెక్టు పనుల్లో సుమారు 80 శాతం పూర్తయ్యాయని పనులు చేపట్టిన మెగా సంస్థ తన అధికారిక వేదికల ద్వారా వెల్లడించిందని పేర్కొంటున్నారు. అయితే, మిగిలిన 20 శాతం పనులను పూర్తి చేయడానికి కూటమి ప్రభుత్వం అధికారంలోకి వచ్చిన తర్వాత దాదాపు రెండేళ్ల సమయం ఎందుకు పట్టిందనే ప్రశ్న ఇప్పుడు వినిపిస్తోంది.
ఇంతకాలం పట్టిన పనులను పూర్తి చేసిన తర్వాత, మొత్తం ప్రాజెక్టు ఘనతను తమ ఖాతాలో వేసుకునేందుకు ప్రయత్నించడం ఎంతవరకు సమంజసమని విపక్షాలు ప్రశ్నిస్తున్నాయి. ముఖ్యంగా జనసేన అధికారిక సోషల్ మీడియా ఖాతాల్లో ఈ ప్రాజెక్టుకు సంబంధించి చేసిన ప్రచారం వివాదానికి కారణమైంది. జగన్ హయాంలో ప్రారంభమై, భారీ స్థాయిలో పనులు పూర్తైన ప్రాజెక్టుకు ఇప్పుడు పూర్తి క్రెడిట్ తీసుకునే ప్రయత్నం జరుగుతోందనే విమర్శలు వెల్లువెత్తుతున్నాయి.
పులివెందులకు ఎంతో కీలకమైన ఈ వాటర్ గ్రిడ్ ప్రాజెక్టులో మిగిలిన పనులను పూర్తి చేయడానికి రెండేళ్లు ఎందుకు పట్టిందో ప్రజలకు సమాధానం చెప్పాల్సిన బాధ్యత కూటమి ప్రభుత్వంపై ఉందని విమర్శకులు అంటున్నారు. ఆ ప్రశ్నకు సమాధానం చెప్పకుండా, ప్రాజెక్టు క్రెడిట్ను సొంతం చేసుకునేందుకు ప్రయత్నించడం రాజకీయంగా సరైన పద్ధతి కాదనే అభిప్రాయం వ్యక్తమవుతోంది.
ఏది ఏమైనా, గత ప్రభుత్వ హయాంలో ప్రారంభమైన ప్రాజెక్టులు, అమలైన కార్యక్రమాలకు క్రెడిట్ తీసుకునే ప్రయత్నాలు కొనసాగితే పవన్ కళ్యాణ్ రాజకీయ ప్రతిష్ఠపై ప్రభావం పడే అవకాశం ఉందని రాజకీయ విశ్లేషకులు భావిస్తున్నారు. జనసేన సోషల్ మీడియా విభాగం అత్యుత్సాహంతో చేసే ప్రచారం పార్టీకి ప్రయోజనం కంటే నష్టం ఎక్కువ చేసే పరిస్థితి ఏర్పడుతోందనే విమర్శలు కూడా వినిపిస్తున్నాయి.
