గాదె సాయికృష్ణ లాకప్ డెత్ కేసు ఆంధ్రప్రదేశ్ రాజకీయాల్లో మరింత వేడెక్కుతోంది. ఈ ఘటనపై వైఎస్సార్సీపీ నేతలు మాజీ ఎమ్మెల్యే రాచమల్లు శివప్రసాద్ రెడ్డి, మాజీ మంత్రి గుడివాడ అమర్నాథ్ తీవ్ర ఆరోపణలు చేశారు. సాయికృష్ణపై ఉన్న కేసుల పేరుతో పోలీసులు అదుపులోకి తీసుకుని హింసించి హత్య చేశారని, అనంతరం ఆధారాలను మాయం చేసే ప్రయత్నం జరిగిందని రాచమల్లు ఆరోపించారు. ఈ ఘటన వెనుక ఉన్న అసలు సూత్రధారులు, పాత్రధారులపై కూడా కేసులు నమోదు చేయాలని ఆయన డిమాండ్ చేశారు.
జగ్గయ్యపేటలో జరిగిన భూవివాదానికి సంబంధించిన ఒత్తిళ్ల నేపథ్యంలో ఈ ఘటన చోటుచేసుకుందని, ఉన్నతాధికారుల ఆదేశాల మేరకే సాయికృష్ణపై అమానుషంగా వ్యవహరించారని ఆయన విమర్శించారు. రిమాండ్ రిపోర్టులో కీలక వివరాలు లేకపోవడం అనుమానాలకు తావిస్తోందని పేర్కొంటూ, కేసును సీబీఐకి అప్పగించాలని డిమాండ్ చేశారు.
మరోవైపు మాజీ మంత్రి గుడివాడ అమర్నాథ్ మాట్లాడుతూ, సాయికృష్ణ మరణం అంశాన్ని కుల రాజకీయాల వైపు మళ్లించే ప్రయత్నం జరుగుతోందని ఆరోపించారు. ఈ ఘటనను కేవలం ఒక సీఐ చర్యగా చూపించడం ద్వారా అసలు బాధ్యులను తప్పించేందుకు ప్రయత్నిస్తున్నారని విమర్శించారు. సాయికృష్ణ మరణానికి సంబంధించిన పూర్తి నిజాలు వెలుగులోకి రావాలంటే సిట్ విచారణ సరిపోదని, సీబీఐ దర్యాప్తు అవసరమని అన్నారు.
ప్రభుత్వంపై ప్రశ్నలు లేవనెత్తుతున్న వారిపై రాజకీయ దాడులు జరుగుతున్నాయని, ఈ కేసులో ఉన్నతస్థాయి విచారణ జరిపి బాధ్యులందరినీ చట్టం ముందు నిలబెట్టాలని వైఎస్సార్సీపీ నేతలు డిమాండ్ చేశారు. సాయికృష్ణ మరణం చుట్టూ నెలకొన్న వివాదం రాష్ట్ర రాజకీయాల్లో మరింత చర్చనీయాంశంగా మారుతోంది.
