తమిళ రాజకీయాల్లో (Tamil Politics) మరోసారి సినీ రాజకీయాల హీట్ పెరుగుతోంది. ఇప్పటికే హీరో విజయ్ (Vijay) రాజకీయాల్లోకి ఎంట్రీ ఇచ్చి సంచలనం సృష్టించగా, ఇప్పుడు మరో కోలీవుడ్ స్టార్ హీరో ధనుష్ (Dhanush) కూడా రాజకీయాల్లోకి రావచ్చన్న ప్రచారం జోరందుకుంది. ముఖ్యంగా విజయ్కు పోటీగా ధనుష్ రాజకీయ అరంగేట్రం చేస్తారన్న చర్చ తమిళనాడు రాజకీయ వర్గాల్లో హాట్ టాపిక్గా మారింది.
తమిళనాడులో సినిమా, రాజకీయాలకు దశాబ్దాల చరిత్ర ఉంది. ఎంజీఆర్, జయలలిత, కరుణానిధి, విజయకాంత్ వంటి సినీ ప్రముఖులు రాజకీయాల్లో తమదైన ముద్ర వేశారు. ఇటీవల హీరో విజయ్ కూడా రాజకీయ పార్టీ ప్రకటించి 2026 ఎన్నికలపై ఫోకస్ పెట్టారు. ఈ నేపథ్యంలో ధనుష్ రాజకీయ ప్రవేశంపై వస్తున్న వార్తలు ఆసక్తిని పెంచుతున్నాయి.
ఈ చర్చకు కారణం ధనుష్ తండ్రి (Dhanush Father), సీనియర్ దర్శకుడు కస్తూరి రాజా (Kasthuri Raja) చేసిన వ్యాఖ్యలే. చెన్నైలో (Chennai) జరిగిన ఓ ప్రైవేట్ కార్యక్రమంలో పాల్గొన్న ఆయన, రాజకీయాల్లోకి రావడం ప్రతి ఒక్కరి హక్కు అని వ్యాఖ్యానించారు. ఎవరికైనా ప్రజలకు సేవ చేయాలనే ఆసక్తి ఉంటే రాజకీయాల్లోకి రావచ్చని చెప్పారు.
కస్తూరి రాజా వ్యాఖ్యల తర్వాత సోషల్ మీడియాలో ధనుష్ పాలిటికల్ ఎంట్రీపై (Political Entry) పెద్ద ఎత్తున చర్చ మొదలైంది. ధనుష్ అభిమానులు కూడా ఆయన రాజకీయాల్లోకి వస్తే భారీ ప్రభావం చూపుతారని కామెంట్లు చేస్తున్నారు. మరోవైపు కొందరు మాత్రం ఇది సాధారణ వ్యాఖ్య మాత్రమేనని, ఇప్పటివరకు ధనుష్ నుంచి ఎలాంటి అధికారిక ప్రకటన రాలేదని గుర్తు చేస్తున్నారు.
ప్రస్తుతం ధనుష్ వరుస సినిమాలతో బిజీగా ఉన్నారు. అయినప్పటికీ తమిళ రాజకీయాల్లో సినీ తారల ప్రభావం ఎప్పుడూ ప్రత్యేకంగానే ఉండటంతో, భవిష్యత్తులో ఆయన రాజకీయాల్లోకి వచ్చే అవకాశాలను పూర్తిగా కొట్టిపారేయలేమన్న అభిప్రాయం వ్యక్తమవుతోంది. మరి ధనుష్ నిజంగానే రాజకీయాల్లోకి వస్తారా? వస్తే విజయ్కు ప్రత్యర్థిగా నిలుస్తారా? అన్నది చూడాలి.
