తమిళనాడు అసెంబ్లీలో సీఎం విజయ్ కీలక ప్రకటనలు.. ఎమ్మెల్యేలు, ప్రజలకు భారీ ప్రయోజనాలు.. ఏంటంటే?

తమిళనాడు అసెంబ్లీలో (Tamil Nadu Assembly) ముఖ్యమంత్రి సి. జోసెఫ్ విజయ్ (CM C. Joseph Vijay) బుధవారం పలు కీలక నిర్ణయాలను ప్రకటించారు. ఎమ్మెల్యేలు(MLAs) తమ నియోజకవర్గాల్లో ప్రజలకు మరింత చేరువగా ఉండేందుకు ప్రభుత్వ వాహనాలు(Government Vehicles), డ్రైవర్ల జీతాలు(Drivers’ Salaries), వాహన నిర్వహణ ఖర్చుల కోసం నెలవారీ భత్యం ఇవ్వనున్నట్లు తెలిపారు. ఎమ్మెల్యేల కార్యాలయాల్లో సహాయకులను నియమించుకునేందుకు కూడా ప్రత్యేక నిధులు కేటాయించనున్నట్లు వెల్లడించారు. అదే సమయంలో రాష్ట్ర ప్రజలకు ఆరోగ్య భద్రత కల్పించే దిశగా ఆరోగ్య బీమా కవరేజీని భారీగా పెంచుతున్నట్లు ప్రకటించారు.

ప్రతి ఎమ్మెల్యేకు నియోజకవర్గ పర్యటనల కోసం ప్రభుత్వ వాహనం అందించనున్నట్లు సీఎం విజయ్ తెలిపారు. వాహనాల డ్రైవర్ల జీతాలు, నిర్వహణ, ఇతర ఖర్చుల కోసం ఒక్కో ఎమ్మెల్యేకు నెలకు రూ.75,000 భత్యం ఇవ్వనున్నారు. అలాగే ఎమ్మెల్యే కార్యాలయంలో ఒక సహాయకుడిని నియమించుకునేందుకు నెలకు రూ.25,000 అందించనున్నారు. దీంతో ఈ రెండు ఖర్చులకు కలిపి ఒక్కో ఎమ్మెల్యేకు నెలకు రూ.1 లక్ష వరకు అదనపు భత్యం అందనుంది.

ఆరోగ్య బీమా కవరేజీ రూ.25 లక్షలకు పెంపు

తమిళనాడు ప్రజలకు ప్రభుత్వం భారీ ఆరోగ్య బీమా ప్రయోజనాన్ని ప్రకటించింది. ముఖ్యమంత్రి సమగ్ర ఆరోగ్య బీమా పథకం (Chief Minister’s Comprehensive Health Insurance Scheme) కింద ప్రస్తుతం ఉన్న వార్షిక బీమా కవరేజీని రూ.5 లక్షల నుంచి రూ.25 లక్షలకు పెంచుతున్నట్లు వెల్లడించింది. ఈ నిర్ణయంతో ఖరీదైన వైద్యం, శస్త్రచికిత్సలు అవసరమైన కుటుంబాలకు మరింత ఆర్థిక భరోసా లభించనుంది.

ట్రాన్స్‌జెండర్ వ్యక్తులకు (Transgender Persons) మెరుగైన వైద్య సేవలు అందించేందుకు ప్రభుత్వ ఆసుపత్రుల్లో(Government Hospitals) అదనపు వైద్య, శస్త్రచికిత్స సేవలను కూడా అందుబాటులోకి తీసుకురానున్నారు. చెన్నై, తిరునెల్వేలి, తూత్తుకుడి, చెంగల్పట్టు, తిరువారూర్, కరూర్, కన్యాకుమారి జిల్లాల్లో ఈ సేవలను ప్రారంభించనున్నట్లు ప్రభుత్వం తెలిపింది.

వైద్య విద్యకు రూ.351 కోట్ల కేటాయింపు

రాష్ట్రంలోని ప్రభుత్వ వైద్య, ఆరోగ్య విద్యా సంస్థల్లో సీట్ల సంఖ్యను పెంచేందుకు తమిళనాడు ప్రభుత్వం రూ.351 కోట్లు కేటాయించింది. ఈ నిధులతో వివిధ ఆరోగ్య సంబంధిత కోర్సుల్లో మొత్తం 6,098 అదనపు సీట్లు అందుబాటులోకి రానున్నాయి.

బీఎస్సీ నర్సింగ్‌లో(B.Sc Nursing) 660 సీట్లు, నర్సింగ్ కాలేజీలు, పాఠశాలల్లో 1,925 అదనపు సీట్లు, 12 పారామెడికల్ కోర్సుల్లో 2,778 సీట్లు, మెడికల్ కోర్సుల్లో 735 అదనపు సీట్లు పెంచనున్నారు. దీనికి తోడు రాష్ట్రంలో 7 కొత్త ప్రభుత్వ నర్సింగ్ కాలేజీలను ఏర్పాటు చేయనున్నట్లు ప్రభుత్వం ప్రకటించింది.

పెరంబలూరులో రూ.300 కోట్లతో 400 పడకల ఆసుపత్రి

పెరంబలూరు జిల్లాలో(Perambalur District) 400 పడకల మల్టీ స్పెషాలిటీ ఆసుపత్రిని (400-Bed Multi-Speciality Hospital) ఏర్పాటు చేయాలని ప్రభుత్వం నిర్ణయించింది. ఈ ఆసుపత్రి నిర్మాణానికి సుమారు రూ.300 కోట్లు ఖర్చు చేయనున్నారు. కొత్త ఆసుపత్రి అందుబాటులోకి వస్తే పెరంబలూరు జిల్లా ప్రజలకు మెరుగైన, అధునాతన వైద్య సేవలు స్థానికంగానే అందుబాటులోకి రానున్నాయి.

పాల సేకరణ ధర లీటరుకు రూ.41కు పెంపు

పాల ఉత్పత్తిదారులకు (Milk Producers) కూడా తమిళనాడు ప్రభుత్వం కీలక ప్రకటన చేసింది. పాల సేకరణ ధరను (Milk Procurement Price)ప్రస్తుతం ఉన్న లీటరుకు రూ.38 నుంచి రూ.41కు పెంచుతున్నట్లు ప్రకటించింది. ఈ నిర్ణయంతో రాష్ట్రంలోని 3.16 లక్షలకు పైగా పాల ఉత్పత్తిదారులకు ప్రయోజనం కలగనుంది.

అలాగే పాల ఉత్పత్తిదారులకు అందించే ప్రభుత్వ ప్రోత్సాహకాన్ని లీటరుకు రూ.3 నుంచి రూ.5కు పెంచనున్నారు. పాల సేకరణ ధర పెంపు కారణంగా ప్రభుత్వంపై నెలకు సుమారు రూ.30 కోట్ల అదనపు భారం పడనుంది. ఏడాదికి ఈ వ్యయం దాదాపు రూ.360 కోట్లకు చేరుతుందని ప్రభుత్వం వెల్లడించింది.

ప్రజా సంక్షేమం, ఎమ్మెల్యేల పనితీరుపై ఫోకస్

ఎమ్మెల్యేలు తమ నియోజకవర్గాల్లో మరింత సమర్థంగా పనిచేసేందుకు వాహనాలు, సిబ్బంది సహాయం కల్పించడంతో పాటు ప్రజలకు ఆరోగ్య బీమా కవరేజీ పెంపు, వైద్య విద్యలో అదనపు సీట్లు, కొత్త ఆసుపత్రుల ఏర్పాటు, పాల ఉత్పత్తిదారులకు ప్రోత్సాహం వంటి పలు నిర్ణయాలను తమిళనాడు ప్రభుత్వం తీసుకుంది. తాజా ప్రకటనలతో ప్రజా ఆరోగ్యం, వైద్య విద్య, గ్రామీణ ఆర్థిక వ్యవస్థతో పాటు నియోజకవర్గ స్థాయిలో ఎమ్మెల్యేల పనితీరుపై ప్రభుత్వం ప్రత్యేక దృష్టి పెట్టినట్లు స్పష్టమవుతోంది.