కావేరి నీటిపై కర్ణాటకకు సుప్రీంకోర్టు షాక్.. తమిళనాడు ప్రభుత్వానికి భారీ ఊరట!

కర్ణాటక (Karnataka) ప్రభుత్వానికి సుప్రీంకోర్టులో (Supreme Court) ఎదురుదెబ్బ తగిలింది. కావేరి జలాల (Cauvery Water) విడుదల విషయంలో కీలక ఆదేశాలు జారీ చేసిన అత్యున్నత న్యాయస్థానం.. తమిళనాడుకు (Tamil Nadu) నీటిని విడుదల చేయాలని స్పష్టం చేసింది. కావేరి జల నిర్వహణ అథారిటీ ఆదేశాలను (Cauvery Water Management Authority – CWMA) కర్ణాటక తప్పనిసరిగా అమలు చేయాలని ఆదేశించింది.

తాజా ఆదేశాల ప్రకారం తమిళనాడుకు 12 రోజుల పాటు రోజుకు 12 వేల క్యూసెక్కుల చొప్పున కావేరి నీటిని విడుదల చేయాల్సి ఉంటుందని సమాచారం. దీంతో ఇప్పటికే కొనసాగుతున్న కర్ణాటక, తమిళనాడు కావేరి జల వివాదం మరోసారి హాట్‌టాపిక్‌గా మారింది.

కావేరి నీటి విడుదల విషయంలో కర్ణాటక అభ్యంతరాలు వ్యక్తం చేసింది. రాష్ట్రంలోని నీటి లభ్యత, జలాశయాల పరిస్థితి, రైతుల అవసరాలను దృష్టిలో ఉంచుకోవాలని కర్ణాటక వాదించింది. అయితే కావేరి జల నిర్వహణ అథారిటీ తీసుకున్న నిర్ణయాలను అమలు చేయాల్సిందేనని సుప్రీంకోర్టు స్పష్టం చేసింది.

అసలు కావేరి వివాదం ఎక్కడ మొదలైంది?

కర్ణాటక, తమిళనాడు మధ్య కావేరి జలాల విషయంలో వివాదం ఇప్పటిది కాదు. దశాబ్దాలుగా ఈ రెండు రాష్ట్రాల మధ్య నీటి పంపకంపై (Water Sharing) విభేదాలు కొనసాగుతున్నాయి. కావేరి నది కర్ణాటకలోని కొడగు ప్రాంతంలో పుట్టి.. తమిళనాడు మీదుగా ప్రవహించి బంగాళాఖాతంలో (Bay of Bengal) కలుస్తుంది.

కావేరి నదిపై ఆధారపడి కర్ణాటక, తమిళనాడులో లక్షలాది మంది రైతులు వ్యవసాయం చేస్తున్నారు. దీంతో ఈ నది నీటి పంపకం రెండు రాష్ట్రాల రైతులకు అత్యంత కీలకంగా మారింది. నీటి వినియోగంపై బ్రిటిష్ పాలన (British Rule) కాలం నుంచే వివాదాలు ఉన్నాయి.

1892, 1924లో కుదిరిన ఒప్పందాల నుంచే కావేరి జలాల పంపకంపై విభేదాలు కొనసాగుతున్నాయి. ఎగువ ప్రాంతంలో ఉన్న కర్ణాటకలో సాగు విస్తరణ, కొత్త నీటిపారుదల ప్రాజెక్టుల కారణంగా తమకు రావాల్సిన నీటి లభ్యత తగ్గుతోందని తమిళనాడు చాలాకాలంగా ఆరోపిస్తోంది.

1986లో తమిళనాడు కేంద్ర ప్రభుత్వాన్ని (Central Government) ఆశ్రయించడంతో కావేరి వివాదం అధికారికంగా అంతర్రాష్ట్ర జల వివాదంగా మారింది. 1990లో కావేరి జల వివాదాల ట్రైబ్యునల్ ఏర్పాటైంది. 2007లో ట్రైబ్యునల్ తుది తీర్పును వెల్లడించింది. అయినప్పటికీ నీటి పంపకంపై వివాదం పూర్తిగా పరిష్కారం కాలేదు.

కర్ణాటక, తమిళనాడుతో పాటు కేరళ(Kerala), పుదుచ్చేరి (Puducherry) మధ్య కూడా కావేరి జలాల వాటాపై న్యాయపోరాటం కొనసాగింది. చివరకు 2018లో సుప్రీంకోర్టు ట్రైబ్యునల్ తీర్పులో కొన్ని మార్పులు చేస్తూ తుది తీర్పు ఇచ్చింది. అనంతరం కావేరి జల నిర్వహణ అథారిటీతో పాటు సంబంధిత వ్యవస్థలను కేంద్ర ప్రభుత్వం ఏర్పాటు చేసింది.

కర్ణాటక అభ్యంతరం ఎందుకు?

కావేరి జలాల పంపకం ప్రధానంగా వర్షపాతంపై ఆధారపడి ఉంటుంది. కర్ణాటకలో వర్షాలు తక్కువగా కురిసి జలాశయాల్లో నీటి నిల్వలు తగ్గిన సమయంలో తమిళనాడుకు నీటిని విడుదల చేయడం వల్ల తమ రాష్ట్ర రైతులు ఇబ్బందులు ఎదుర్కొంటారని కర్ణాటక చెబుతోంది.

మరోవైపు తమిళనాడు మాత్రం కావేరి డెల్టాలో(Cauvery Delta) పంటలకు నీరు అత్యవసరమని వాదిస్తోంది. తమకు కేటాయించిన నీటి వాటాను కర్ణాటక తప్పనిసరిగా విడుదల చేయాలని కోరుతోంది. ఈ నేపథ్యంలో రోజుకు 12 వేల క్యూసెక్కుల నీటిని విడుదల చేయాలన్న ఆదేశాలపై కర్ణాటక అభ్యంతరం వ్యక్తం చేసింది.

కర్ణాటక అభ్యంతరాల నేపథ్యంలో తమిళనాడు సుప్రీంకోర్టును ఆశ్రయించింది. విచారణ అనంతరం కావేరి జల నిర్వహణ అథారిటీ ఆదేశాలను కర్ణాటక అమలు చేయాల్సిందేనని సుప్రీంకోర్టు స్పష్టం చేసింది. దీంతో కర్ణాటక నుంచి తమిళనాడుకు కావేరి నీటి విడుదలపై తదుపరి పరిణామాలు ఆసక్తికరంగా మారాయి.

రైతుల జీవనాధారంతో ముడిపడిన వివాదం

కావేరి జల వివాదం కేవలం నీటి పంపకానికి సంబంధించిన సమస్య కాదు. రెండు రాష్ట్రాల రైతుల జీవనాధారం, ప్రాంతీయ భావోద్వేగాలు, రాజకీయ పరిణామాలు ఈ అంశంతో ముడిపడి ఉన్నాయి.

కర్ణాటకలో తమిళనాడుకు నీరు విడుదల చేయడాన్ని వ్యతిరేకిస్తూ ఆందోళనలు జరిగే సందర్భాలు ఉన్నాయి. అదే సమయంలో తమకు రావాల్సిన కావేరి నీటిని కర్ణాటక అడ్డుకుంటోందంటూ తమిళనాడులోనూ నిరసనలు వ్యక్తమవుతుంటాయి.

వర్షపాతం, జలాశయాల్లో నీటి నిల్వలు, పంటల అవసరాలు మారిన ప్రతిసారీ కావేరి వివాదం మళ్లీ తెరపైకి వస్తోంది. తాజాగా సుప్రీంకోర్టు ఇచ్చిన ఆదేశాలతో కర్ణాటక, తమిళనాడు మధ్య కావేరి నీటి వివాదం మరోసారి దేశవ్యాప్తంగా చర్చనీయాంశంగా మారింది.