తెలంగాణ రాష్ట్రంలో(Telangana State) పరిపాలనా వ్యవస్థలో ప్రభుత్వం కీలక మార్పులు చేపట్టింది. మొత్తం 13 మంది ఐఏఎస్ అధికారులను (13 IAS Officers) బదిలీ చేస్తూ (Transfers) అధికారిక ఉత్తర్వులు జారీ చేసింది. ఈ బదిలీలతో ముఖ్యమంత్రి కార్యాలయం, విపత్తుల నిర్వహణ, మున్సిపల్ పరిపాలన, పర్యాటకం, సంక్షేమం వంటి కీలక శాఖల్లో కొత్త నియామకాలు చోటుచేసుకున్నాయి. అదే సమయంలో ప్రస్తుత ప్రభుత్వ ప్రధాన కార్యదర్శి కె. రామకృష్ణారావు (K. Ramakrishna Rao) పదవీ విరమణ అనంతరం ప్రభుత్వ సలహాదారుగా సేవలందించేలా ప్రభుత్వం నిర్ణయం తీసుకుంది.
ఈ బదిలీల్లో ముఖ్యమంత్రి కార్యాలయానికి అత్యంత ప్రాధాన్యత లభించింది. సీనియర్ ఐఏఎస్ అధికారి ఎన్. శ్రీధర్ను ముఖ్యమంత్రి ప్రధాన కార్యదర్శిగా ప్రభుత్వం నియమించింది. సెలవుల అనంతరం విధుల్లో చేరిన రాహుల్ బొజ్జాకు విపత్తుల నిర్వహణ శాఖ ప్రధాన కార్యదర్శిగా బాధ్యతలు అప్పగించింది. అదే సమయంలో వెనుకబడిన తరగతుల సంక్షేమ శాఖ ప్రధాన కార్యదర్శిగా ఆయన కొనసాగనున్నారు.
పరిపాలనా సామర్థ్యాన్ని పెంచే లక్ష్యంతో పలువురు సీనియర్ అధికారులకు అదనపు బాధ్యతలను కూడా ప్రభుత్వం కేటాయించింది. సబ్యసాచి ఘోష్కు హ్యాండ్లూమ్స్, టెక్స్టైల్స్, హ్యాండీక్రాఫ్ట్స్ ప్రత్యేక ప్రధాన కార్యదర్శిగా పూర్తి అదనపు బాధ్యతలు అప్పగించడంతో పాటు టీజీ హ్యాండీక్రాఫ్ట్స్ డెవలప్మెంట్ కార్పొరేషన్ వైస్ చైర్మన్ (TG Handicrafts Development Corporation), మేనేజింగ్ డైరెక్టర్గా, టీజీకో (TGCO) మేనేజింగ్ డైరెక్టర్గా కూడా నియమించింది.
శైలజా రామయ్యర్ను (Shailaja Ramaiyer) దేవాదాయ శాఖ ప్రధాన కార్యదర్శిగా బదిలీ చేస్తూనే ఈపీటీఆర్ఐ (EPTRI – Environment Protection Training and Research Institute) డైరెక్టర్ జనరల్గా అదనపు బాధ్యతలు అప్పగించింది. అహ్మద్ నదీమ్ను రాజకీయ వ్యవహారాల ప్రధాన కార్యదర్శిగా నియమించిన ప్రభుత్వం, మైనారిటీల సంక్షేమ శాఖ బాధ్యతలను కూడా ఆయనకే అప్పగించింది. ఎం. రఘునందన్ రావుకు గనులు, భూగర్భ శాఖ కార్యదర్శిగా అదనపు బాధ్యతలు కేటాయించింది.
పారిశ్రామిక, మున్సిపల్, పర్యాటక రంగాల్లో కూడా పలు కీలక మార్పులు చోటుచేసుకున్నాయి. బి. అజిత్ రెడ్డిని ఇన్వెస్ట్ తెలంగాణ చీఫ్ ఎగ్జిక్యూటివ్ ఆఫీసర్గా నియమించగా, ముషర్రఫ్ అలీ ఫారూకీకి టీజీఆర్ఈడీసీవో వైస్ చైర్మన్, మేనేజింగ్ డైరెక్టర్గా అదనపు బాధ్యతలు అప్పగించింది.
పి. కాత్యాయనీ దేవిని హ్యాండ్లూమ్స్, టెక్స్టైల్స్, హ్యాండీక్రాఫ్ట్స్ ప్రత్యేక కార్యదర్శిగా నియమిస్తూ, స్టేట్ ఫైనాన్స్ కార్పొరేషన్ జాయింట్ మేనేజింగ్ డైరెక్టర్గా అదనపు బాధ్యతలు అప్పగించారు. కె. గంగాధర్ను రోడ్లు, భవనాల శాఖ ప్రత్యేక కార్యదర్శిగా బదిలీ చేశారు.
నగర పాలనలో కూడా కీలక మార్పులు జరిగాయి. హెచ్ఎండీఏ జాయింట్ మెట్రోపాలిటన్ కమిషనర్గా పనిచేస్తున్న టి. వెంకన్నను గ్రేటర్ వరంగల్ మున్సిపల్ కమిషనర్గా ప్రభుత్వం బదిలీ చేసింది. ఆయన స్థానంలో కే. చంద్రకళకు హెచ్ఎండీఏ (HMDA) జాయింట్ మెట్రోపాలిటన్ కమిషనర్గా పూర్తి అదనపు బాధ్యతలు అప్పగించింది. రాష్ట్ర పర్యాటక శాఖ డైరెక్టర్గా కె. విద్యాసాగర్ను నియమిస్తూ ప్రభుత్వం తాజా ఉత్తర్వులు జారీ చేసింది.
ఈ తాజా బదిలీలతో తెలంగాణ పరిపాలనా వ్యవస్థలో కీలక శాఖలకు కొత్త నాయకత్వం లభించగా, పరిపాలనను మరింత సమర్థవంతంగా నిర్వహించాలనే లక్ష్యంతో ప్రభుత్వం ఈ నిర్ణయాలు తీసుకున్నట్లు అధికార వర్గాలు పేర్కొంటున్నాయి.
