రాష్ట్రంలో శాంతిభద్రతలు పూర్తిగా క్షీణించాయని, అధికార పార్టీ నేతలకు రక్షణ కల్పిస్తూ ప్రతిపక్ష నాయకులు, కార్యకర్తలపై అక్రమ కేసులు నమోదు చేస్తున్నారని వైఎస్సార్ కాంగ్రెస్ పార్టీ అధ్యక్షుడు వైఎస్ జగన్ మోహన్ రెడ్డి తీవ్ర స్థాయిలో విమర్శించారు. సోషల్ మీడియా వేదికగా స్పందించిన ఆయన, “నారాసుర పాలనలో అరాచకం పరాకాష్టకు చేరింది” అంటూ చంద్రబాబు నాయుడు ప్రభుత్వంపై మండిపడ్డారు.
ఆలూరు ఎమ్మెల్యే విరూపాక్షిపై అర్ధరాత్రి భారీ పోలీసు బలగాలతో దాడి చేసి, ఇంటి తలుపులు బద్దలుకొట్టి అరెస్టు చేయడం ప్రజాస్వామ్యానికి విరుద్ధమని జగన్ ప్రశ్నించారు. దాడికి గురైన వైఎస్సార్సీపీ నాయకులకే హత్యాయత్నం కేసులు పెట్టడం, బాధితులకు అండగా నిలిచిన ప్రజాప్రతినిధులపై కూడా కేసులు నమోదు చేయడం రాజకీయ కక్షసాధింపేనని ఆరోపించారు.
ఎమ్మెల్యే ఇంట్లోని సీసీటీవీ హార్డ్డిస్కులను పోలీసులు స్వాధీనం చేసుకోవడం వెనుక అర్ధరాత్రి జరిగిన పోలీసు చర్యల దృశ్యాలను దాచిపెట్టే ప్రయత్నమేనని జగన్ అనుమానం వ్యక్తం చేశారు. శ్రీకాకుళం జిల్లాలో మాజీ మంత్రి సీదిరి అప్పలరాజు అరెస్టు, గుంటూరు మాజీ ఎమ్మెల్యే షేక్ మొహ్మద్ ముస్తఫాపై నమోదైన కిడ్నాప్ కేసును కూడా రాజకీయ వేధింపుల ఉదాహరణలుగా పేర్కొన్నారు.
డీఎస్సీ-2025 అక్రమాలు, విద్యాదీవెన-వసతిదీవెన బకాయిలు, నిరుద్యోగ భృతి హామీలపై ప్రభుత్వం సమాధానం చెప్పకుండా ప్రజల దృష్టి మళ్లించేందుకే అక్రమ కేసులు, అర్ధరాత్రి అరెస్టులకు పాల్పడుతోందని జగన్ విమర్శించారు.
“అధికారం శాశ్వతం కాదు. పోలీసు బలం శాశ్వతం కాదు. ఎన్ని కేసులు పెట్టినా, ఎన్ని అరెస్టులు చేసినా వైఎస్సార్ కాంగ్రెస్ పార్టీ వెనక్కి తగ్గదు. బాధితులకు అండగా నిలుస్తాం, అన్యాయాన్ని ప్రశ్నిస్తాం” అంటూ చంద్రబాబు ప్రభుత్వ తీరుపై జగన్ తీవ్ర స్థాయిలో విమర్శలు గుప్పించారు.
