అమరావతి సామాన్యుల రాజధానా? భూతల స్వర్గం పేరుతో కలల నగరమా ?

ఆంధ్రప్రదేశ్ రాజధాని అమరావతిపై ముఖ్యమంత్రి చంద్రబాబు నాయుడు గతంలో చేసిన పలు వ్యాఖ్యలు, ప్రతిపాదనలు ఇప్పుడు మరోసారి చర్చనీయాంశంగా మారుతున్నాయి. అమరావతిని “కూల్ సిటీ”గా తీర్చిదిద్దుతూ, నగర ఉష్ణోగ్రతలను 14 డిగ్రీల సెల్సియస్ వరకు తగ్గించాలని, గాలి కూడా సహజంగా చల్లగా ఉండేలా ప్రణాళికలు రూపొందిస్తున్నామని ఆయన గతంలో పేర్కొన్నారు. ఈ నేపథ్యంలో అధికారులకు కూడా ఉష్ణోగ్రతలు తగ్గించే చర్యలు చేపట్టాలని సూచించినట్లు కథనాలు వెలువడ్డాయి.

అయితే, మూడు పంటలు పండే సారవంతమైన పచ్చని వ్యవసాయ భూములను రైతుల నుంచి సేకరించి, ఇప్పుడు అక్కడ “మినీ అమెజాన్ ఫారెస్ట్” పేరుతో కేవలం ఐదు ఎకరాల్లో కృత్రిమ రెయిన్ ఫారెస్ట్ ఏర్పాటు చేస్తామని చెప్పడంపై విమర్శలు వ్యక్తమవుతున్నాయి. “రైతుల భూములను తీసుకున్నది… కృత్రిమ అడవులు పెంచడానికా?” అంటూ ప్రజల్లో చర్చ సాగుతోంది.

హైదరాబాద్‌లో సుమారు 400 ఎకరాల విస్తీర్ణంలో ఉన్న కేబీఆర్ పార్క్‌ను ఎప్పుడూ “మినీ అమెజాన్”గా ప్రచారం చేయలేదని, అలాంటప్పుడు కేవలం ఐదు ఎకరాల్లో ఏర్పాటు చేసే పార్క్‌ను “అమెజాన్ ఫారెస్ట్”గా ప్రచారం చేయడం ప్రజలను తప్పుదోవ పట్టించే ప్రయత్నమనే విమర్శలు వినిపిస్తున్నాయి.

ఇదే సమయంలో అమరావతిని “దేవతల రాజధాని”గా అభివర్ణిస్తూ, అక్కడ నివసిస్తే ఆయుష్షు పెరుగుతుందని, ప్రపంచంలోనే ఎక్కడా లేని స్థాయిలో నీరు, పచ్చదనం ఉంటాయని చంద్రబాబు చేసిన వ్యాఖ్యలు కూడా ఇప్పుడు చర్చకు దారితీశాయి. రాజధానిని నిర్మిస్తున్నారా? లేక భూతల స్వర్గాన్ని నిర్మిస్తున్నారా? అనే ప్రశ్నలను ప్రజలే లేవనెత్తుతున్న పరిస్థితి కనిపిస్తోంది.

అలాగే, అమరావతిని దోమలు లేని నగరంగా తీర్చిదిద్దుతామని, ఓపెన్ డ్రెయిన్లు లేకుండా పూర్తిగా భూగర్భ డ్రైనేజ్ వ్యవస్థను ఏర్పాటు చేస్తామని ప్రభుత్వం ప్రకటించింది. అయితే, ఇదే తరహా సదుపాయాలను రాష్ట్రంలోని ఇతర నగరాలు, గ్రామాలకు ఎందుకు విస్తరించకూడదని విమర్శకులు ప్రశ్నిస్తున్నారు.

వరదల నివారణ కోసం నగరానికి రక్షణ గోడ నిర్మించడం, వరద నీటిని పంపింగ్ వ్యవస్థ ద్వారా బయటకు తరలించేందుకు భారీ లిఫ్ట్ ప్రాజెక్టులు ఏర్పాటు చేయడం వంటి ప్రతిపాదనలపై కూడా పట్టణ ప్రణాళిక నిపుణుల నుంచి సందేహాలు వ్యక్తమవుతున్నాయి. వరద ముంపు ప్రాంతంలో ఇలాంటి భారీ నిర్మాణాలు దీర్ఘకాలికంగా ఎంతవరకు ప్రయోజనకరమనే అంశంపై చర్చ జరుగుతోంది.

మరోవైపు, అమరావతిలో పేదలకు ఇళ్ల స్థలాల కేటాయింపుపై గతంలో వివాదాలు చోటుచేసుకున్నాయి. రాజధాని మాస్టర్ ప్లాన్‌లో అలాంటి కేటాయింపులకు అవకాశం లేదని, ఇది రాజధాని భూమి అని కొందరు కోర్టును ఆశ్రయించిన సంఘటనలు కూడా నమోదయ్యాయి. దీంతో అమరావతి నిజంగా అన్ని వర్గాల ప్రజల రాజధానా? లేక కొద్ది మందికే పరిమితమైన నగరమా? అనే ప్రశ్నలు మరోసారి తెరపైకి వస్తున్నాయి.

ఇదిలా ఉండగా, చంద్రబాబు నాయుడు గతంలో సింగపూర్, టోక్యో, ఇస్తాంబుల్, కజకిస్తాన్ వంటి అంతర్జాతీయ నగరాల తరహాలో అమరావతిని నిర్మిస్తామని పలుమార్లు పేర్కొన్నారు. అయితే, ఈ భారీ విజన్‌లు, ఆకర్షణీయమైన ప్రకటనలు సామాన్య ప్రజల అవసరాలకు ఎంతవరకు అనుగుణంగా ఉంటాయనే అంశంపై భిన్నాభిప్రాయాలు వ్యక్తమవుతున్నాయి.

ఏసీ నగరం, మినీ అమెజాన్ ఫారెస్ట్, దేవతల రాజధాని, దోమలు లేని నగరం, వరదలు రాని నగరం, ప్రపంచ స్థాయి మౌలిక సదుపాయాలు వంటి అనేక హామీల మధ్య అసలు అమరావతి సామాన్య ప్రజల కోసం నిర్మితమవుతున్న రాజధానా? లేక అసాధారణ కల్పనలతో రూపుదిద్దుకుంటున్న ఒక ఊహా నగరమా? అనే చర్చ రాజకీయ, సామాజిక వర్గాల్లో కొనసాగుతోంది.