ఏపీ రాజకీయాల్లో (AP Politics) మరోసారి మాటల యుద్ధం వేడెక్కింది. వైసీపీ మాజీ మంత్రి అంబటి రాంబాబు(Ambati Rambabu) కూటమి ప్రభుత్వంపై (Coalition Government) తీవ్రస్థాయిలో విమర్శలు గుప్పించారు. రాష్ట్రంలో ప్రస్తుతం దౌర్భాగ్యమైన పాలన కొనసాగుతోందని, ప్రజలకు ఉపయోగపడే పనులను పక్కనపెట్టి కేవలం ఆర్భాటాలు, ప్రచారాలకే ప్రాధాన్యత ఇస్తున్నారని మండిపడ్డారు.
చంద్రబాబు నాయుడు (Nara Chandrababu Naidu) తన పాలన అద్భుతంగా ఉందని చూపించేందుకు “సింగపూర్ కలర్”(Singapore Colour) పూయించే ప్రయత్నం చేస్తున్నారని అంబటి ఎద్దేవా చేశారు. అసత్యాలు చెప్పడంలో ఆయనకు ఆయనే సాటి అని విమర్శించారు. ఎన్నికల ముందు హామీలు ఇచ్చి, అధికారంలోకి వచ్చిన తర్వాత వాటిని పూర్తిగా మరిచిపోవడం చంద్రబాబుకు అలవాటైందని ధ్వజమెత్తారు. “ఈ రెండేళ్లలో పేదలకు ఒక్క సెంటు భూమి అయినా ఇచ్చారా?” అంటూ ప్రశ్నించారు.
సంక్షేమ పథకాలపై విమర్శలు
గత ప్రభుత్వ హయాంలో అమలైన సంక్షేమ పథకాలన్నింటినీ ప్రస్తుత ప్రభుత్వం నిర్వీర్యం చేసిందని అంబటి ఆరోపించారు. ముఖ్యంగా ఆరోగ్యశ్రీ పథకాన్ని(Aarogyasri Scheme) బలహీనపరిచారని, హాస్టల్ విద్యార్థులకు (Hostel Students) సరైన భోజనం కూడా అందడం లేదని ఆవేదన వ్యక్తం చేశారు. ఫీజు రీయింబర్స్మెంట్ (Fee Reimbursement) నిధులు విడుదల చేయకపోవడంతో చదువు పూర్తయిన విద్యార్థులు సర్టిఫికెట్లు పొందడంలో తీవ్ర ఇబ్బందులు ఎదుర్కొంటున్నారని చెప్పారు.
ఇరిగేషన్ ప్రాజెక్టులపై తీవ్ర విమర్శలు
రాష్ట్రంలో ఇరిగేషన్ ప్రాజెక్టుల పనులు నత్తనడకన సాగుతున్నాయని అంబటి మండిపడ్డారు. పోలవరం ప్రాజెక్టుకు (Polavaram Project) కేంద్రం విడుదల చేసిన నిధులను కూడా ప్రభుత్వం సక్రమంగా వినియోగించలేదని ఆరోపించారు. మంత్రి నారా లోకేష్ (Nara Lokesh), ఇతర మంత్రులు ప్రాజెక్టుల వద్ద ఫోటోలకు ఫోజులు ఇవ్వడం తప్ప ప్రజలకు ఉపయోగపడే పనులు చేయడం లేదని విమర్శించారు. వెలిగొండ ప్రాజెక్టు (Veligonda Project) వద్ద తట్టా, బుట్టా నెత్తిపై పెట్టుకుని చేస్తున్న హడావుడి కేవలం డ్రామా మాత్రమేనని అన్నారు.
అంతేకాకుండా రాయలసీమ లిఫ్ట్ ఇరిగేషన్ ప్రాజెక్టును తెలంగాణ సీఎం అనుముల రేవంత్ రెడ్డి (Anumula Revanth Reddy)కు గిఫ్ట్గా ఇచ్చేశారని ఎద్దేవా చేశారు.
రాజకీయ కక్షసాధింపులకే ప్రభుత్వ యంత్రాంగం?
రాష్ట్రంలో నేరాలను అదుపు చేయడంలో ప్రభుత్వం పూర్తిగా విఫలమైందని అంబటి ఆరోపించారు. పోలీస్ వ్యవస్థను (Police System) కేవలం రాజకీయ ప్రత్యర్థులను వేధించడానికి మాత్రమే ఉపయోగిస్తున్నారని మండిపడ్డారు. వైసీపీ నేతలపై సోషల్ మీడియా కేసులు పెట్టి భయపెట్టాలని చూస్తున్నారని, కానీ ఇలాంటి కేసులకు ఎవరూ భయపడబోరని స్పష్టం చేశారు.
సచివాలయ వ్యవస్థను నిర్వీర్యం చేశారని, రైతులు (Farmers) గిట్టుబాటు ధరలు (Remunerative Prices) లేక తీవ్ర ఇబ్బందులు పడుతున్నారని పేర్కొన్నారు. ప్రజలు ఈ పాలన తీరును గమనించాలని అంబటి రాంబాబు పిలుపునిచ్చారు.
