ఆంధ్రప్రదేశ్లో (Andhra Pradesh) ప్రస్తుతం కొనసాగుతున్న పరిపాలనపై తీవ్ర విమర్శలు వెల్లువెత్తుతున్నాయి. ప్రజాస్వామ్య విలువలను (Democratic Values) పక్కనబెట్టి, ప్రభుత్వ వైఫల్యాలను (Government Failures) ప్రశ్నించే వారిపై పోలీసు యంత్రాంగాన్ని వినియోగిస్తూ అక్రమ నిర్బంధాలు(Illegal Detentions), సోషల్ మీడియా సెన్సార్షిప్కు (Social Media Censorship) పాల్పడుతున్నారనే ఆరోపణలు రోజురోజుకూ బలపడుతున్నాయి. ప్రజల తరఫున నిలబడి సమాధానాలు ఇవ్వాల్సిన ప్రభుత్వం, విమర్శలను అణచివేసే మార్గాన్ని ఎంచుకుందనే అభిప్రాయాలు వ్యక్తమవుతున్నాయి.
విశాఖపట్నంలోని అడవివరం–ముదసర్లోవ ప్రాంతంలో ప్రతిపాదిత గూగుల్–అదానీ డేటా సెంటర్ ప్రాజెక్టు (Google–Adani Data Center Project) నుంచి అమరావతి భూ వ్యవహారాలు, ఇందాపూర్–హెరిటేజ్ (Indapur-Heritage Foods) సంబంధాల వరకు అనేక అంశాల్లో పారదర్శకత లోపించిందని విమర్శకులు ఆరోపిస్తున్నారు. ముఖ్యంగా డేటా సెంటర్ ప్రాజెక్టు వల్ల ముదసర్లోవ రిజర్వాయర్కు (Mudasarlova Reservoir) ముప్పు ఉందని, పర్యావరణ ప్రభావ అంచనాలు లేకుండానే పనులు కొనసాగుతున్నాయని హ్యుమన్ రైట్స్ ఫోరం ప్రశ్నించగా, ఆ సంస్థ సోషల్ మీడియా పోస్టులను తొలగించాలంటూ అధికార యంత్రాంగం చర్యలు తీసుకోవడం వివాదానికి దారితీసింది.
ప్రజా ప్రయోజనాలకు సంబంధించిన ప్రశ్నలకు సమాధానాలు ఇవ్వాల్సిన ప్రభుత్వం, వాటిని చట్టవిరుద్ధ ప్రచారంగా చిత్రీకరిస్తోందని పౌరసమాజ సంస్థలు విమర్శిస్తున్నాయి. అమరావతి భూ వ్యవహారాలు, ప్రభుత్వ ఖర్చులు, ఇందాపూర్–హెరిటేజ్ సంబంధాలపై సోషల్ మీడియాలో వచ్చిన పోస్టుల నేపథ్యంలో కేసులు నమోదు చేయడం, నోటీసులు జారీ చేయడం వంటి చర్యలు ప్రజాస్వామ్య హక్కులపై దాడిగా అభివర్ణించబడుతున్నాయి.
మాజీ ముఖ్యమంత్రి వైఎస్ జగన్ మోహన్ రెడ్డి (Y. S. Jagan Mohan Reddy) కూడా ఇటీవల ఇదే అంశంపై ప్రభుత్వాన్ని లక్ష్యంగా చేసుకుని విమర్శలు గుప్పించారు. గంజాయి(Cannabis), మద్యం(Liquor), ఇసుక మాఫియాలపై (Sand Mafia) పోస్టులు చేసి ఆదారాలు చూపిస్తే నిందితులపై చర్యలు తీసుకోకుండా, ప్రభుత్వానికి వ్యతిరేకంగా వచ్చిన కంటెంట్ తొలగింపుపైనే అధిక శ్రద్ధ చూపుతున్నారని ఆయన ఆరోపించారు.
ఈ వ్యవహారం జాతీయ, అంతర్జాతీయ మీడియా దృష్టిని కూడా ఆకర్షించింది. పర్యావరణ, భూ హక్కుల అంశాలపై వచ్చిన కథనాలు, వీడియోలను అడ్డుకునే ప్రయత్నాలపై పలు మీడియా సంస్థలు ప్రశ్నలు లేవనెత్తాయి. డేటా సెంటర్ ప్రాజెక్టు కోసం భూసేకరణ, పర్యావరణ ప్రభావాలపై వచ్చిన నివేదికలను నిరోధించే ప్రయత్నాలు మరింత చర్చకు దారితీశాయి.
ఇక రాష్ట్రంలో మహిళల భద్రత, మాదకద్రవ్యాల నియంత్రణ, ప్రజా సమస్యల పరిష్కారం వంటి కీలక అంశాల కంటే సోషల్ మీడియా పర్యవేక్షణపైనే ప్రభుత్వం ఎక్కువ దృష్టి పెడుతోందనే విమర్శలు వినిపిస్తున్నాయి. ప్రజలకు సమాచారం తెలుసుకునే హక్కును హరించే ఏ చర్య అయినా ప్రజాస్వామ్య స్ఫూర్తికి విరుద్ధమని ప్రజాస్వామ్యవాదులు హెచ్చరిస్తున్నారు.
ప్రశ్నించే గొంతుకలను అణచివేయడం ద్వారా సమస్యలు పరిష్కారం కావని, ప్రజల్లో అసంతృప్తి మరింత పెరిగే ప్రమాదం ఉందని విశ్లేషకులు అభిప్రాయపడుతున్నారు. ప్రభుత్వం పారదర్శకత, జవాబుదారీతనం, ప్రజాస్వామ్య విలువలకు ప్రాధాన్యత ఇస్తూ ప్రజల సందేహాలకు సమాధానాలు ఇవ్వాల్సిన అవసరం ఉందని వారు సూచిస్తున్నారు.
