ఆంధ్రప్రదేశ్ (Andhra Pradesh) ఉప ముఖ్యమంత్రి, జనసేన పార్టీ (Jana Sena Party) అధ్యక్షుడు పవన్ కళ్యాణ్(Pawan Kalyan) మరోసారి అస్వస్థతకు గురైనట్లు సమాచారం. ఏపీ కేబినెట్ సమావేశం (AP Cabinet Meeting) జరుగుతుండగా ఆయనకు తీవ్రమైన వెన్నునొప్పి (Back Pain) రావడంతో మధ్యలోనే సమావేశం నుంచి వెళ్లిపోయినట్లు వార్తలు వెలువడ్డాయి.
ఇప్పటికే గతంలో కూడా రాష్ట్ర కేబినెట్ సమావేశాల సమయంలో పవన్ కళ్యాణ్ ఆరోగ్య సమస్యల కారణంగా గైర్హాజరైన సందర్భాలు ఉన్నాయి. 2025 ఫిబ్రవరి 5న వైరల్ ఫీవర్తో (Viral Fever) బాధపడుతున్నట్లు ఆయన బృందం వెల్లడించగా, జ్వరంతో పాటు స్పాండిలైటిస్ సమస్య కూడా ఉన్నట్లు అధికార వర్గాలు పేర్కొన్నాయి. ఆ కారణంగా ఆయన రాష్ట్ర కేబినెట్ సమావేశానికి హాజరు కాలేకపోయారు.
అలాగే 2025 ఏప్రిల్ 15న కూడా అస్వస్థత కారణంగానే కేబినెట్ భేటీకి గైర్హాజరయ్యారు. దీనితో పాటు పలుమార్లు ఆయన జ్వరం, ఇతర ఆరోగ్య సమస్యలతో బాధపడుతున్నట్లు వార్తలు వెలువడటం సాధారణమైపోయింది. ముఖ్యంగా కలెక్టర్ల సదస్సు సమయంలో కూడా ఆయన పలు సమావేశాలకు హాజరు కాలేదనే చర్చ జరిగింది. ఇటీవల ఆయనకు శస్త్రచికిత్స జరిగినట్లు కూడా వార్తలు ప్రచారంలోకి వచ్చాయి.
ఇలాంటి పరిస్థితుల్లో జనసేన పార్టీ అధ్యక్షుడిగా పార్టీని మరింత బలోపేతం చేయాలనే డిమాండ్ కార్యకర్తల నుంచి పెరుగుతోంది. అయితే తరచూ ఎదురవుతున్న ఆరోగ్య సమస్యలు ఆయన రాజకీయ కార్యకలాపాలపై ఎంత మేర ప్రభావం చూపుతాయనే ప్రశ్న పార్టీ వర్గాల్లో వినిపిస్తోంది.
వెన్నునొప్పి సహా ఇతర ఆరోగ్య సమస్యలతో ఇబ్బందులు ఎదుర్కొంటున్న పవన్ కళ్యాణ్కు పార్టీ విస్తరణ, సంస్థాగత బలోపేతం వంటి కీలక బాధ్యతలను నిర్వహించడంలో ఆరోగ్యం ఎంతవరకు సహకరిస్తుందనే సందేహాలు వ్యక్తమవుతున్నాయి. భవిష్యత్తులో ఈ పరిస్థితి జనసేన ఎదుగుదలపై ప్రభావం చూపుతుందా అనే అంశంపై రాజకీయ వర్గాల్లో ఆసక్తికర చర్చ కొనసాగుతోంది.
