తమను వాడుకుని వదిలేస్తున్నారా? పవన్ మౌనం వెనుక కాపుల్లో పెరుగుతున్న ఆగ్రహం!

ఆంధ్రప్రదేశ్ (Andhra Pradesh) రాజకీయాల్లో జనసేన పార్టీ (Jana Sena Party) భవిష్యత్తు, కాపు సామాజిక వర్గం (Kapu Community) ఆశలు, పవన్ కళ్యాణ్ (Pawan Kalyan) వైఖరి ఇప్పుడు తీవ్ర చర్చకు దారితీస్తున్నాయి. జనసేన కార్యకర్తలు, కాపు యువకులు, స్థానిక నాయకులపై వరుస దాడులు, హత్యలు, వేధింపులు జరుగుతున్నాయనే ఆరోపణలు వస్తున్నప్పటికీ పవన్ కళ్యాణ్ నుంచి ఆశించిన స్థాయిలో స్పందన కనిపించడం లేదని పలువురు అసంతృప్తి వ్యక్తం చేస్తున్నారు. పవన్ కళ్యాణ్‌కు జనసేన కార్యకర్తల కంటే జగన్‌పై(YS Jagan) రాజకీయ ద్వేషమే ఎక్కువా అనే ప్రశ్నలు తెరపైకి వస్తున్నాయి.

పవన్ కళ్యాణ్ అధికారంలో భాగస్వామి అయితే కాపు సామాజిక వర్గానికి ప్రత్యేక గుర్తింపు, రాజకీయ ప్రాధాన్యం, కార్పొరేషన్ నిధులు, సంక్షేమ పథకాల రూపంలో లాభం చేకూరుతుందని ఎన్నో ఆశలు పెట్టుకున్న వర్గాల్లో ఇప్పుడు తీవ్ర నిరాశ నెలకొన్నట్టు చర్చ జరుగుతోంది. ప్రభుత్వ వ్యవస్థలో కానీ, పదవుల పంపకాల్లో కానీ, సామాజిక వర్గానికి తగిన స్థానం దక్కలేదనే భావన పెరుగుతోందని రాజకీయ వర్గాలు విశ్లేషిస్తున్నాయి.

ఇదే సమయంలో కూటమిలో భాగమైన తెలుగుదేశం (Telugu Desam Party) నాయకుల నుంచి కాపు వర్గానికి చెందిన జనసేన కార్యకర్తలు లక్ష్యంగా మారుతున్నారనే ఆరోపణలు మరింత కలకలం రేపుతున్నాయి. పలు ప్రాంతాల్లో దాడులు, హత్యలు, అవమానాలు, ఆత్మహత్యాయత్నాలు చోటు చేసుకున్నాయని పేర్కొంటూ జనసేన శ్రేణులు ఆవేదన వ్యక్తం చేస్తున్నాయి. అయితే ఈ ఘటనలపై పవన్ కళ్యాణ్ గట్టిగా స్పందించకపోవడం, “కూటమిలో కొన్ని ఇబ్బందులు సహజం” అన్నట్టుగా మాట్లాడటం కార్యకర్తల్లో మరింత అసహనానికి కారణమైందని అంటున్నారు.

ప్రత్యామ్నాయ రాజకీయ శక్తిగా ఎదుగుతారని ఆశించిన పవన్ కళ్యాణ్ పూర్తిగా చంద్రబాబు (Nara Chandrababu Naidu) నాయకత్వానికి లోబడిపోయి జనసేనను టీడీపీ బీ-టీమ్‌గా (TDP-B.Team) మార్చేశారనే విమర్శలు కూడా కాపు వర్గంలో వినిపిస్తున్నాయి. సామాజిక వర్గం భావోద్వేగాలను ఉపయోగించుకుని రాజకీయంగా మభ్యపెడుతున్నారనే చర్చ కూడా బలపడుతోంది.

ఇటీవల కాపు రిజర్వేషన్ పోరాట సమితి (Kapu Reservation Struggle Committee) రాష్ట్ర చైర్మన్ చనమల్ల ప్రసాదరావు (Chanamalla Prasada Rao) పవన్ కళ్యాణ్‌కు బహిరంగ లేఖ రాస్తూ, కాపు సమాజానికి జరుగుతున్న అన్యాయాలపై ఎందుకు మాట్లాడటం లేదని ప్రశ్నించడం రాజకీయంగా ప్రాధాన్యం సంతరించుకుంది. అలాగే కాపు నాయకుడు దాసరి రాము కూడా పవన్ కళ్యాణ్ వ్యవహారశైలిపై తీవ్ర అసంతృప్తి వ్యక్తం చేయడం ఇప్పుడు చర్చనీయాంశంగా మారింది.

ఇక జనసేన కార్యకర్తలపై జరిగినట్లు ప్రచారంలో ఉన్న ఘటనల జాబితా కూడా తీవ్ర చర్చకు దారితీస్తోంది. నూజివీడు, మార్కాపురం, నెల్లూరు, గుడివాడ, మచిలీపట్నం, గుంటూరు, శ్రీకాకుళం, తిరుపతి తదితర ప్రాంతాల్లో జనసేన నేతలు, కాపు యువకులు దాడులకు గురయ్యారనే ఆరోపణలు వినిపిస్తున్నాయి. కొందరు హత్యలకు గురవ్వగా, మరికొందరు ఆత్మహత్యలకు పాల్పడిన ఘటనలు కూడా రాజకీయ వర్గాల్లో చర్చనీయాంశమయ్యాయి.

ఈ పరిణామాలన్నీ చూస్తుంటే జనసేనలో అంతర్గత అసంతృప్తి పెరుగుతోందా? కాపు సామాజిక వర్గం పవన్ కళ్యాణ్ నాయకత్వంపై పునరాలోచనలో పడిందా? అన్న ప్రశ్నలు ఇప్పుడు రాష్ట్ర రాజకీయాల్లో హాట్ టాపిక్‌గా మారాయి.