పవిత్ర అమర్నాథ్ యాత్ర (Amarnath Yatra) ఈ ఏడాది ఘనంగా ప్రారంభమైంది. వర్షం కురుస్తున్నప్పటికీ వేలాది మంది శివభక్తులు (Lord Shiva Devotees) ఏమాత్రం వెనుకడుగు వేయకుండా పహల్గామ్(Pahalgam), బల్తాల్(Baltal) బేస్ క్యాంపుల నుంచి బాబా బర్ఫానీ (Baba Barfani) దర్శనం కోసం ప్రయాణం ప్రారంభించారు. తొలి రోజే 10 వేల మందికి పైగా యాత్రికులు యాత్రలో పాల్గొనడం విశేషం. ఈ సందర్భంగా ప్రధాని నరేంద్ర మోడీ (PM Narendra Modi) అమర్నాథ్ యాత్రికులకు ప్రత్యేక లేఖ రాస్తూ హృదయపూర్వక శుభాకాంక్షలు తెలియజేశారు. ప్రతి భక్తుడు ఐదు సంకల్పాలను జీవితంలో ఆచరించాలని పిలుపునిచ్చారు.
ఈ ఏడాది అమర్నాథ్ యాత్ర ఆగస్టు 28 వరకు కొనసాగనుంది. బల్తాల్ మార్గం ద్వారా ప్రయాణించే భక్తులు అదే రోజు సాయంత్రానికే బాబా బర్ఫానీ దర్శనం చేసుకునే అవకాశం ఉండగా, పహల్గామ్ మార్గాన్ని ఎంచుకునే యాత్రికులు మరుసటి రోజు పవిత్ర గుహను చేరుకుని స్వామివారిని దర్శించుకోనున్నారు. భక్తుల రద్దీని దృష్టిలో ఉంచుకుని అధికారులు అన్ని ఏర్పాట్లు పూర్తి చేశారు.
భక్తులకు రాసిన లేఖలో ప్రధాని మోడీ “హర హర మహాదేవ్(Har Har Mahadev).. జై బాబా బర్ఫానీ(Jai Baba Barfani” అంటూ తన సందేశాన్ని ప్రారంభించారు. అమర్నాథ్ యాత్రలో పాల్గొనడం ప్రతి భక్తుడికి అరుదైన ఆధ్యాత్మిక అనుభవమని పేర్కొన్నారు. దేశంలోని వివిధ రాష్ట్రాలు, భాషలు, సంప్రదాయాలకు చెందిన లక్షలాది మంది ఒకే భక్తి భావంతో మహాదేవుని దర్శించడానికి రావడం భారతదేశ ఆధ్యాత్మిక ఐక్యతకు గొప్ప ప్రతీక అని తెలిపారు.
యాత్రను విజయవంతంగా నిర్వహించేందుకు కృషి చేస్తున్న శ్రీ అమర్నాథ్జీ శ్రైన్ బోర్డు, జమ్మూ-కాశ్మీర్ ప్రభుత్వం, భారత సైన్యం, సీఆర్పీఎఫ్, జమ్మూ-కాశ్మీర్ పోలీసులు, ఐటిబీపీ, బీఎస్ఎఫ్, ఎన్డీఆర్ఎఫ్ సిబ్బంది, వైద్యులు, ఆరోగ్య సిబ్బంది, పారిశుధ్య కార్మికులు, అధికారులు, స్వచ్ఛంద సేవకులు అందరికీ ప్రధాని ప్రత్యేక అభినందనలు తెలిపారు. వారి సేవా భావం వల్లే యాత్ర సజావుగా కొనసాగుతోందని ప్రశంసించారు.
జమ్మూ-కాశ్మీర్ (Jammu & Kashmir) ప్రజలు యాత్రికులకు అందిస్తున్న ఆతిథ్యం దేశ సంస్కృతికి ప్రతిబింబమని ప్రధాని కొనియాడారు. యాత్రికులకు ప్రేమతో స్వాగతం పలుకుతూ అందిస్తున్న సేవలు భారతీయ సంప్రదాయాల గొప్పతనాన్ని చాటుతున్నాయని పేర్కొన్నారు. దేశ నలుమూలల నుంచి వచ్చిన భక్తులు నిర్వహిస్తున్న అన్నదానం, లంగర్ సేవలు ‘సర్వే భవంతు సుఖినః'(Sarve Bhavantu Sukhinah) అనే భారతీయ విలువలను ప్రతిబింబిస్తున్నాయని తెలిపారు.
ప్రతి అమర్నాథ్ యాత్రికుడు 5 సంకల్పాలను జీవితంలో భాగంగా స్వీకరించాలని ప్రధాని మోడీ కోరారు. మొదటిగా యాత్రా మార్గంలో పరిశుభ్రతను కాపాడుతూ స్వచ్ఛతకు ప్రతి ఒక్కరూ తమ వంతు బాధ్యత నిర్వర్తించాలని సూచించారు.
2వ సంకల్పంగా అధికారులు జారీ చేసే అన్ని భద్రతా మార్గదర్శకాలను తప్పనిసరిగా పాటించాలని కోరారు. ట్రాఫిక్ నిబంధనలను (Traffic Rules) గౌరవించడంతో పాటు వర్షాలు, జారుడు మార్గాలు, చలి వంటి పరిస్థితుల్లో అత్యంత అప్రమత్తంగా ఉండాలని సూచించారు.
3వ సంకల్పంగా ‘వోకల్ ఫర్ లోకల్'(Vocal for Local) భావనకు మద్దతుగా యాత్ర సందర్భంగా చేసే ఖర్చులో కనీసం 10 శాతం స్థానిక ఉత్పత్తుల (Local Products) కొనుగోలుకు కేటాయించాలని పిలుపునిచ్చారు. దీనివల్ల జమ్మూ-కాశ్మీర్ ప్రజల జీవనోపాధికి తోడ్పాటు అందుతుందని పేర్కొన్నారు.
4వ సంకల్పంగా యాత్ర ముగిసే రోజు రక్షాబంధన్ (Raksha Bandhan) సందర్భంగా తమ సోదరుడు లేదా సోదరికి ఒక మొక్కను బహుమతిగా ఇవ్వాలని సూచించారు. అలాగే ‘తల్లి పేరు మీద ఒక చెట్టు’ కార్యక్రమానికి ప్రతి ఒక్కరూ మద్దతు ఇవ్వాలని పిలుపునిచ్చారు.
5వ సంకల్పంగా ‘దేశమే ప్రథమం'(Nation First) అనే భావనతో ప్రతి ఒక్కరూ తమ బాధ్యతలను నిజాయితీగా నిర్వర్తించాలని ప్రధాని సూచించారు. అభివృద్ధి చెందిన భారత నిర్మాణంలో ప్రతి పౌరుడు భాగస్వామి కావాలని ఆయన ఆకాంక్షించారు.
చివరగా బాబా అమర్నాథ్ ఆశీస్సులు ప్రతి భక్తుడిపై ఉండాలని ప్రధాని మోడీ ఆకాంక్షించారు. ఈ యాత్ర ప్రతి ఒక్కరికీ ఆధ్యాత్మిక ప్రశాంతతతో పాటు నూతన శక్తిని అందించాలని కోరుతూ, ప్రతి యాత్రికుడి ప్రయాణం సురక్షితంగా, శుభప్రదంగా సాగాలని హృదయపూర్వక శుభాకాంక్షలు తెలిపారు.
