దాదాపు 2 ఏళ్లుగా ఒక్క మేజర్ టైటిల్ కూడా లేక తీవ్ర ఒత్తిడిని ఎదుర్కొన్న భారత స్టార్ షట్లర్ పీవీ సింధు (PV Sindhu) ఎట్టకేలకు గ్రాండ్ కంబ్యాక్ ఇచ్చింది. జపాన్ ఓపెన్ 2026 (Japan Open 2026) టైటిల్ను కైవసం చేసుకున్న సింధు.. ఈ టోర్నీ గెలిచిన తొలి భారతీయ క్రీడాకారిణిగా చరిత్ర సృష్టించింది. ఈ అద్భుత విజయానంతరం తన సక్సెస్ వెనుక ఉన్న అసలు సీక్రెట్ను సింధు బయటపెట్టింది. టీమిండియా స్టార్ బ్యాటర్ విరాట్ కోహ్లీ (Virat Kohli) చెప్పిన ఒక్క మాటే తన ఆలోచనా విధానాన్ని పూర్తిగా మార్చేసిందని ఆమె వెల్లడించింది.
కొంతకాలంగా వరుస వైఫల్యాలతో ఇబ్బంది పడుతున్న సమయంలో తాను విరాట్ కోహ్లీని సంప్రదించినట్లు సింధు తెలిపింది. చాలా కాలం సెంచరీ లేక ఇబ్బందులు ఎదుర్కొన్న తర్వాత మళ్లీ ఎలా ఫామ్లోకి వచ్చారనే విషయాన్ని కోహ్లీని అడిగానని చెప్పింది. అందుకు కోహ్లీ చెప్పిన సమాధానం తన జీవితానికే టర్నింగ్ పాయింట్ (Turning Point) అయిందని సింధు పేర్కొంది.
‘పరుగులు చేయడంలో ఉన్న ఆనందాన్ని మళ్లీ ఆస్వాదించడం మొదలుపెట్టాను. ఫలితాల గురించి ఎక్కువగా ఆలోచించకుండా ఆటను ఎంజాయ్ చేయడంపైనే దృష్టి పెట్టాను’ అని కోహ్లీ తనకు చెప్పినట్లు సింధు వెల్లడించింది. ఆ ఒక్క మాట తనలో ఉన్న ఒత్తిడిని పూర్తిగా తొలగించి.. ఆటను ప్రేమిస్తూ ప్రతి మ్యాచ్ను ఆస్వాదించాలనే కొత్త ఆలోచనను కలిగించిందని తెలిపింది.
విజయాలు, ఓటముల గురించి కాకుండా.. ప్రతి మ్యాచ్ను ఫ్రీ మైండ్తో ఆడాలని నిర్ణయించుకున్న తర్వాత తనలో ఆత్మవిశ్వాసం పెరిగిందని సింధు చెప్పింది. అదే తనను మళ్లీ విజయాల బాట పట్టించిందని పేర్కొంది. జపాన్ ఓపెన్ 2026 టైటిల్ సాధించడంలో కఠినమైన శిక్షణ, ఫిట్నెస్, ఆహార నియమాలతో పాటు మానసిక ధైర్యం కూడా కీలక పాత్ర పోషించిందని వెల్లడించింది.
ముఖ్యంగా విరాట్ కోహ్లీ ఇచ్చిన ఆ సలహా తనకు కొత్త ఉత్సాహాన్ని ఇచ్చిందని, అత్యున్నత స్థాయిలో మరోసారి రాణించడానికి అదే ప్రధాన కారణమైందని సింధు తెలిపింది. ఈ విజయంతో 2 ఏళ్ల టైటిల్ నిరీక్షణకు ముగింపు పలికిన సింధు.. భారత బ్యాడ్మింటన్ చరిత్రలో మరో అరుదైన ఘనతను తన ఖాతాలో వేసుకుని మరోసారి తన సత్తా చాటింది.
