తమిళనాడు రాజకీయాల్లో (Tamil Nadu Politics) అనూహ్య పరిణామం చోటుచేసుకుంది. భారతీయ జనతా పార్టీకి(BJP) మాజీ రాష్ట్ర అధ్యక్షుడు అన్నామలై (Annamalai) రాజీనామా (Resignation) చేయడం రాజకీయ వర్గాల్లో చర్చనీయాంశంగా మారింది. గత కొన్ని రోజులుగా పార్టీ కార్యక్రమాలకు దూరంగా ఉంటున్న ఆయన భవిష్యత్ రాజకీయ ప్రణాళికలపై ఇప్పటికే అనేక ఊహాగానాలు వినిపిస్తున్నాయి. ఈ నేపథ్యంలో ఆయన పార్టీకి రాజీనామా చేయడం మరింత ప్రాధాన్యత సంతరించుకుంది.
నేడు అన్నామలై కేంద్ర హోంమంత్రి అమిత్ షాకు (Amit Shah) 5 పేజీల రాజీనామా లేఖను సమర్పించినట్లు సమాచారం. పార్టీ భవిష్యత్ దిశ, రాష్ట్ర రాజకీయ పరిస్థితులు, తన వ్యక్తిగత నిర్ణయాలకు సంబంధించిన అంశాలను ఆయన లేఖలో ప్రస్తావించినట్లు రాజకీయ వర్గాలు చెబుతున్నాయి. ఇటీవల ఆయన కొత్త రాజకీయ పార్టీ స్థాపించనున్నారనే వార్తలు కూడా విస్తృతంగా ప్రచారంలోకి వచ్చాయి.
తమిళనాడులో ఎలాగైనా అధికారంలోకి రావాలని వ్యూహాలు రచిస్తున్న బీజేపీకి (BJP) అన్నామలై రాజీనామా పెద్ద ఎదురుదెబ్బగా భావిస్తున్నారు. రాష్ట్రంలో పార్టీ విస్తరణకు ఆయన చేసిన కృషి గణనీయమని పార్టీ శ్రేణులు పేర్కొంటున్నాయి. అలాంటి నాయకుడు పార్టీని వీడటం కాషాయ శిబిరంలో ఆందోళనకు కారణమైంది.
అయితే అన్నామలై సమర్పించిన రాజీనామాను పార్టీ అధిష్ఠానం (Party High Command) ఇంకా ఆమోదించలేదని సమాచారం. దీనిపై అధికారిక ప్రకటన వెలువడాల్సి ఉంది. రాజీనామా ఆమోదంపై స్పష్టత రాకపోవడంతో పార్టీ కార్యకర్తలు, నాయకుల్లో గందరగోళ పరిస్థితి నెలకొంది. రానున్న రోజుల్లో ఈ అంశంపై బీజేపీ అధిష్ఠానం తీసుకునే నిర్ణయం తమిళనాడు రాజకీయాల్లో కీలక ప్రభావం చూపే అవకాశాలు కనిపిస్తున్నాయి.
