కాంగ్రెస్ పార్టీ 2026 (Congress Party 2026) రాజ్యసభ ఎన్నికల (Rajya Sabha Elections) కోసం తమ అభ్యర్థుల జాబితాను అధికారికంగా ప్రకటించింది. పార్టీ అధ్యక్షుడు మల్లికార్జున్ ఖర్గే (Mallikarjun Kharge) ఆమోదంతో విడుదలైన ఈ జాబితాలో పలువురు కీలక నేతలకు అవకాశం దక్కింది. ముఖ్యంగా జాతీయ అధికార ప్రతినిధి పవన్ ఖేరాకు (Pawan Khera) కర్ణాటక కోటా నుంచి రాజ్యసభ టికెట్ కేటాయించడం రాజకీయ వర్గాల్లో చర్చనీయాంశంగా మారింది.
2022లో టికెట్ దక్కకపోవడంతో పవన్ ఖేరా సోషల్ మీడియాలో చేసిన “బహుశా నా తపస్సులో ఏదో లోపం ఉందేమో” వ్యాఖ్యలు అప్పట్లో వైరల్ అయ్యాయి. ఇప్పుడు నాలుగేళ్ల తర్వాత ఆయనకు కాంగ్రెస్ రాజ్యసభ టికెట్ ఇవ్వడం ఆసక్తిని రేకెత్తిస్తోంది.
కర్ణాటక (Karnataka) నుంచి కాంగ్రెస్ ముగ్గురు కీలక నేతలను బరిలోకి దింపింది. మల్లికార్జున్ ఖర్గేతో పాటు పవన్ ఖేరా, మన్సూర్ అలీ ఖాన్లకు (Mansoor Ali Khan) అవకాశం కల్పించింది. మధ్యప్రదేశ్ నుంచి మాజీ ఎంపీ మీనాక్షి నటరాజన్కు (Meenakshi Natarajan) టికెట్ ఇవ్వగా, రాజస్థాన్ నుంచి నీరజ్ డాంగీకి (Neeraj Dangi) మరోసారి అవకాశం దక్కింది.
తమిళనాడు నుంచి కాంగ్రెస్ డేటా అండ్ అనలిటిక్స్ విభాగం ఛైర్మన్ ప్రవీణ్ చక్రవర్తికి, జార్ఖండ్ నుంచి ఏఐసీసీ నేత ప్రణవ్ ఝాకు కూడా రాజ్యసభ సీట్లు కేటాయించారు.
ప్రధాన అభ్యర్థుల జాబితా:
- మల్లికార్జున్ ఖర్గే – కర్ణాటక
- పవన్ ఖేరా – కర్ణాటక
- మన్సూర్ అలీ ఖాన్ – కర్ణాటక
- మీనాక్షి నటరాజన్ – మధ్యప్రదేశ్
- నీరజ్ డాంగీ – రాజస్థాన్
- ప్రవీణ్ చక్రవర్తి – తమిళనాడు
- ప్రణవ్ ఝా – జార్ఖండ్
షర్మిలను పక్కన పెట్టిన కాంగ్రెస్
ఆంధ్రప్రదేశ్ కాంగ్రెస్ అధ్యక్షురాలు వైఎస్ షర్మిలకు (YS Sharmila) ఈసారి రాజ్యసభ సీటు దక్కకపోవడం పార్టీ వర్గాల్లో చర్చకు దారితీసింది. కర్ణాటక నుంచి ఆమెకు అవకాశం దక్కుతుందనే ప్రచారం జరిగినప్పటికీ, చివరకు జాబితాలో ఆమె పేరు లేకపోవడం గమనార్హం.
మరోవైపు, తెలంగాణ (Telangana) కాంగ్రెస్ ఇంచార్జ్ మీనాక్షి నటరాజన్కు మధ్యప్రదేశ్ నుంచి రాజ్యసభ టికెట్ లభించడంతో, తెలంగాణ కాంగ్రెస్ వ్యవహారాల్లో మార్పులు చోటుచేసుకునే అవకాశాలపై రాజకీయ వర్గాల్లో చర్చ జరుగుతోంది.
సామాజిక సమీకరణాలు, ప్రాంతీయ సమతుల్యత, మహిళలకు ప్రాధాన్యత, సంస్థాగతంగా పనిచేసిన నేతలకు గుర్తింపు వంటి అంశాలను దృష్టిలో పెట్టుకుని కాంగ్రెస్ ఈ జాబితాను రూపొందించినట్లు రాజకీయ విశ్లేషకులు భావిస్తున్నారు.
